وڭتۇستىك كورەيادا پرەزيدەنتتىك سايلاۋ وتەتىن كۇن بەلگىلەندى
استانا. KAZINFORM - كورەيا رەسپۋبليكاسى بيلىگى كەزەكتەن تىس پرەزيدەنتتىك سايلاۋدى 3-ماۋسىمعا بەلگىلەۋدى جوسپارلاپ وتىر، دەپ حابارلايدى تاسس.
ۇكىمەتتەگى دەرەككوز Yonhap اگەنتتىگىنە بەرگەن مالىمەتىندە، سايلاۋ وتكىزۋ ماسەلەسى سەيسەنبى كۇنى وتەتىن ۇكىمەت وتىرىسىندا قارالاتىنىن ايتتى.
- سايلاۋ كۇنىن بەلگىلەۋ ءۇشىن مينيسترلەر كابينەتىنىڭ وتىرىسىن وتكىزۋ مىندەتتى دەگەن ناقتى زاڭدىق نورما جوق. ءبىراق بۇل - داۋىس بەرۋ كۇنى ۋاقىتشا دەمالىس كۇنىن جاريالاۋدى تالاپ ەتەتىن ماڭىزدى ماسەلە بولعاندىقتان، ونى ۇكىمەت وتىرىسىندا تالقىلايدى، - دەدى دەرەككوز.
بۇعان دەيىن وڭتۇستىك كورەيا ب ا ق-تارى پرەزيدەنتتىڭ كەزەكتەن تىس سايلاۋىنىڭ ناقتى كۇنى سەيسەنبى كۇنى مينيسترلەر كابينەتى مۇشەلەرىنىڭ كەزدەسۋىنەن كەيىن جاريالانادى دەپ حابارلاعان ەدى. كورەيا رەسپۋبليكاسىنىڭ پرەزيدەنتى مىندەتىن ۋاقىتشا اتقارۋشى - پرەمەر- مينيستر حان دوك سۋ سايلاۋ كۇنىن پرەزيدەنت وتستاۆكاعا كەتكەن ساتتەن باستاپ 10 كۇن ىشىندە، ياعني 14-ساۋىرگە دەيىن بەلگىلەۋى ءتيىس.
ەسكە سالايىق، 4-ءساۋىر كۇنى كونستيتۋتسيالىق سوت بۇرىنعى پرەزيدەنت يۋن سوك يەلدى بيلىكتەن ءبىر اۋىزدان شەتتەتتى. بۇل شەشىم اسكەري توتەنشە جاعدايعا بايلانىستى وقيعالار نەگىزىندە قابىلداندى جانە پارلامەنتتىڭ بەس ايىبىنىڭ بارلىعىنا سوت كەلىسىم بەردى. پرەزيدەنت قىزمەتىنەن شەتتەتىلگەن ساتتەن باستاپ 60 كۇن ىشىندە كەزەكتەن تىس سايلاۋ ءوتۋى ءتيىس. بۇل سايلاۋدا باستى ۇمىتكەر - 2022 -جىلى يۋن سوك يەلدەن از عانا ايىرماشىلىقپەن جەڭىلگەن وپپوزيتسيا جەتەكشىسى لي جە ميەن سانالادى. بۇعان دەيىن ساراپشىلار داۋىس بەرۋ ەڭ كوپ دەگەندە 60 كۇن ىشىندە ۇيىمداستىرىلادى دەپ بولجاعان ەدى، بۇل ساياساتكەرلەرگە دايىندالۋعا ۋاقىت بەرەدى.
سونداي-اق، بۇعان دەيىن وڭتۇستىك كورەيا پرەزيدەنتىن قولداۋشىلار ونىڭ يمپيچمەنتىنەن كەيىن سەۋلدە ميتينگكە شىققانى حابارلانعان.
