وڭتۇستىك كورەياعا ءسۇت جانە جاپونياعا جىلقى ەتى جەتكىزىلەدى - قازاقستاننىڭ ەكسپورتى قانشالىقتى وزگەردى

استانا. KAZINFORM - قازاقستان اۋىل شارۋاشىلىعى ونىمدەرىنىڭ ەكسپورتىن دامىتۋعا ەكپىن قويىپ وتىر، ياعني بۇل تۇرعىدا الەمدىك نارىقتاعى ورنىمىز نىعايىپ، جەتكىزۋ باعىتتارى كەڭەيتىلىپ جاتىر. ەلىمىز ءبىرقاتار سەرىكتەس ەلدەرگە مال، ءسۇت ونىمدەرىن، بال، شۇجىق جانە كونسەرۆى سىندى تاۋارلاردىڭ كەڭ اۋقىمىن ەكسپورتتاپ وتىر.

قازاقستانداعى كومپانيالار ە ا ە و، ت م د ەلدەرىنە، سونداي-اق يران، قىتاي، موڭعوليا، ب ا ءا جانە ساۋد ارابياسىنا ءىرى قارا مەن ۇساق مالدى، جىلقى جانە تۇيەنى جەتكىزۋمەن اينالاسىپ كەلەدى.

وسى ەلدەرگە، سونداي-اق تۇركياعا بال جانە بال اراسى شارۋاشىلىعى ونىمدەرى، قۇس شارۋاشىلىعى تاۋارلارى، تەرى، جەم-ءشوپ سياقتى ونىمدەر تاسىمالدانىپ جاتىر.

اتاپ ايتقاندا، ە ا ە و مەن ت م د ەلدەرىنە، يران، وڭتۇستىك كورەيا جانە قىتايعا كونسەرۆىلەر، شۇجىق ءارى ءسۇت ونىمدەرى، بالىق ەكسپورتتالادى. سونىمەن قاتار، قوي جانە جىلقى ەتى ە ا ە و مەن ت م د-عا، يران، قىتاي، ب ا ءا، ساۋد ارابياسى جانە جاپونياعا جەتكىزىلىپ وتىر.

قازاقستانداعى اۋىل شارۋاشىلىعىنىڭ جالپى تاۋار اينالىمى 2023 -جىلى 11,3 ميلليارد دوللاردى قۇرادى. بۇل كورسەتكىش 2022 -جىلى تىركەلگەن 11,5 ميلليارد دوللاردان ءسال ازداۋ بولدى. ەكسپورت كولەمى 5,35 ميلليارد دوللاردى قۇرادى، بۇل ءوز كەزەگىندە 2022 -جىلمەن سالىستىرعاندا 5 پايىزعا از. بۇل رەتتە، قازاقستاننىڭ اۋىل شارۋاشىلىعى ونىمدەرىنىڭ ەكسپورتى سىرتقا شىعارىلاتىن تاۋارلاردىڭ جالپى كولەمىنىڭ شامامەن 7 پايىزىن قۇرادى.

رەسەي، وزبەكستان، قىتاي، اۋعانستان جانە تاجىكستان اۋىل شارۋاشىلىعى ونىمدەرى بويىنشا قازاقستاننىڭ بەس ءىرى ساۋدا سەرىكتەستەرىنىڭ قاتارىنا كىردى.

2023 -جىلى رەسەيمەن تاۋار اينالىمى 3,46 ميلليارد دوللاردى، وزبەكستانمەن - 1,71 ميلليارد دوللاردى، قىتايمەن 1,3 ميلليارد دوللاردى قۇرادى. بىلتىر ش ى ۇ ەلدەرىمەن اۋىل شارۋاشىلىعى ونىمدەرىنىڭ جالپى تاۋار اينالىمى 7,7 ميلليارد دوللارعا جەتتى.

قازاقستاننىڭ اۋىل شارۋاشىلىعى ونىمدەرىنىڭ جالپى ەكسپورتىنىڭ 70 پايىزى ش ى ۇ ەلدەرىنە جىبەرىلدى، ياعني ونىڭ سوماسى 3,8 ميلليارد دوللاردان استى.

جاقىندا ق ر اۋىل شارۋاشىلىعى ءمينيسترى ايداربەك ساپاروۆ قازاقستاننىڭ 80 ەلگە، سونىڭ ىشىندە ورتالىق ازيا مەن ە ا ە و مەملەكەتتەرىنە اۋىل شارۋاشىلىعى ونىمدەرىن جەتكىزىپ جاتقانىن ايتاپ ءوتتى. بۇل تۇرعىدا ەلىمىز الەمدەگى ەڭ ءىرى ازىق-تۇلىك ەكسپورتتاۋشىلارىنىڭ 25 ىنىڭ قاتارىندا. كەيىنگى بەس جىلدا اۋىل شارۋاشىلىعى ونىمدەرىنىڭ ەكسپورتى ەكى ەسە ءوسىپ، 5,4 ميلليارد دوللارعا جەتتى. قازاقستان ەكسپورتتىق كورسەتكىشتەرىن ودان ءارى ارتتىرۋ ءۇشىن 2029 -جىلعا قاراي ەكسپورتتى ەكى ەسەگە وسىرمەك.

«ءبىز وسى كورسەتكىشتى ودان ءارى ارتتىرۋدى جوسپارلاپ وتىرمىز. الەمدە ازىق-تۇلىك تاپشىلىعىنىڭ ءوسۋى جاعدايىندا ەلىمىز 2029 -جىلعا قاراي اۋىل شارۋاشىلىعى ونىمدەرىنىڭ ەكسپورتىن ەكى ەسەگە ارتتىرۋدى ماقسات ەتىپ وتىر. بۇل رەتتە، وڭدەلۋ دەڭگەيى جوعارى ونىمگە باسىمدىق بەرە وتىرىپ، ەكسپورت قۇرىلىمىن بەلسەندى تۇردە وزگەرتىپ جاتىرمىز. وڭدەلگەن ونىمدەردىڭ ەكسپورتى كەيىنگى 5 جىلدا ەكى ەسەگە ءوسىپ، 2,3 ميلليارد ا ق ش دوللارى دەڭگەيىنە جەتتى. ءبىز قازاقستاندا بىرلەسكەن قايتا وڭدەۋ زاۋىتتارىن اشۋعا مۇددەلىمىز. ءوز جۇمىسىن اشىق جۇرگىزەتىن بيزنەسكە قولداۋ كورسەتىلەدى. اتاپ ايتقاندا، وسى سالاداعى ءىس-قيمىلدار قازاقستاندا جانە ە ا ە و ەلدەرىندە ازىق-تۇلىك قاۋىپسىزدىگىن نىعايتا تۇسەدى»، - دەدى مينيستر.

قازىرگى كەزدە مينيسترلىك ەۋروپا وداعى، ۆەتنام، سينگاپۋر جانە پارسى شىعاناعى ەلدەرىمەن ەكسپورتتالاتىن تاۋارلاردىڭ قاتارىن كەڭەيتۋ جۇمىستارىن جالعاستىرىپ جاتىر.

اۆتور
رۋسلان عابباس