وڭتۇستىك كورەيا قازاقستاندىق مۇنايعا ءۇمىت ارتىپ وتىر

استانا. KAZINFORM - وڭتۇستىك كورەيا پرەزيدەنتى اكىمشىلىگىنىڭ باسشىسى ورمۋز بۇعازى ارقىلى كەمە قاتىناسىنداعى ۇزىلىستەر جاعدايىندا شيكى مۇناي مەن نافتا جەتكىزىلىمىن قامتاماسىز ەتۋ جولدارىن تالقىلاۋ ءۇشىن قازاقستان مەن پارسى شىعاناعى ەلدەرىنە ساپارلايدى، دەپ حابارلايدى Yonhap اقپارات اگەنتتىگى.

پرەزيدەنت اكىمشىلىگىنىڭ باسشىسى كان حۋن سيكتىڭ جوسپارلانعان ساپارى وڭتۇستىك كورەيا ۇكىمەتىنىڭ شيكى مۇناي جەتكىزىلىمىن قامتاماسىز ەتۋ جونىندەگى كۇش- جىگەرىمەن بايلانىستى، سەبەبى ورمۋز بۇعازى ارقىلى قوزعالىس ءىس جۇزىندە جابىق، ال ا ق ش پرەزيدەنتى دونالد ترامپ تەگەران نەگىزگى باعىتتى اشپاسا، يران ءۇشىن سالدارى اۋىر بولاتىنىن مالىمدەدى.

كان حۋن سيك پرەزيدەنتتىڭ ارنايى ەلشىسى رەتىندە قازاقستان، ومان جانە ساۋد ارابياسىندا ۇكىمەتتەرمەن، ەنەرگەتيكالىق كومپانيالارمەن جانە كەمە وپەراتورلارىمەن وڭتۇستىك كورەيا پورتتارىنا جۇك جەتكىزىلىمىن قامتاماسىز ەتۋ جانە مەديتسينالىق ونىمدەردى قوسا العاندا ماڭىزدى تاۋارلاردىڭ تۇراقتى جەتكىزىلىمىن ساقتاۋ ءۇشىن كەلىسسوزدەر جۇرگىزەدى.

ول ۇكىمەتتىڭ باستى باسىمدىعى - ماڭىزدى تاۋارلاردىڭ تۇراقتى جەتكىزىلىمىن قامتاماسىز ەتۋ ەكەنىن مالىمدەپ، وڭتۇستىك كورەيانىڭ تاياۋ شىعىستان يمپورتتالاتىن شيكى مۇناي مەن نافتاعا ءالى قاتتى تاۋەلدى بولىپ وتىرعانىن اتاپ ءوتتى. نافتا - مۇناي- حيميا جانە ونەركاسىپتىڭ باسقا دا سالالارىندا كەڭىنەن قولدانىلاتىن نەگىزگى شيكىزات.

- وتكەن ايدا ءبىز بىرىككەن اراب امىرلىكتەرىنەن باسىمدىقپەن 24 ميلليون باررەل شيكى مۇناي الۋعا كەلىستىك، شيكى مۇناي مەن نافتا وڭتۇستىك كورەيا پورتتارىنا جەتكىزىلىپ وتىر، - دەدى كانگ.

كانگ تاياۋ شىعىس داعدارىسى تولىق رەتتەلگەنشە ۇزاق مەرزىمدى جەتكىزىلىمدەردى قامتاماسىز ەتۋگە نازار اۋدارۋ قاجەتتىلىگىن اتاپ ءوتتى. بۇدان باسقا، پرەزيدەنتتىڭ وكىلى ۇكىمەت قازىرگى ۋاقىتتا ورمۋز بۇعازىندا وڭتۇستىك كورەيانىڭ تۋى بار 26 كەمەنىڭ قاۋىپسىز ءوتۋىن قامتاماسىز ەتۋ ءۇشىن شارالار قابىلداپ، ەكيپاج مۇشەلەرىنىڭ قاۋىپسىزدىگىنە باسىمدىق بەرىپ، كەمە كومپانيالارىنىڭ جاعدايىن ەسكەرىپ جاتقانىن مالىمدەدى. اقپان ايىنىڭ سوڭىندا ا ق ش پەن ءيزرايلدىڭ يرانعا شابۋىلدارى باستالعاننان بەرى كەمەلەر بۇعازدا تۇرىپ قالدى.

سوڭعى اپتالاردا وڭتۇستىك كورەيا شيكى مۇنايدىڭ شامامەن %70- ىن تاياۋ شىعىستان يمپورتتاپ وتىرعاندىقتان ەنەرگيا كوزدەرىن ءارتاراپتاندىرۋعا ايتارلىقتاي كۇش سالىپ كەلەدى، بۇل ەلدى جەتكىزۋدەگى ۇزىلىستەر مەن باعانىڭ كۇرت اۋىتقۋلارىنا وتە وسال ەتىپ وتىر.

وسىعان دەيىن جاپوندىق INPEX مۇناي-گاز كومپانياسى قازاقستان مەن ازەربايجان مۇنايىنىڭ ءبىر بولىگىن ىشكى نارىققا قايتا باعىتتاۋ مۇمكىندىگىن قاراستىرىپ وتىرعانىن حابارلادىق.