وڭتۇستىك كورەيا مينيسترلىگى: اپات سەبەپتەرى انىقتالىپ جاتىر

استانا. قازاقپارات - ءورت سوندىرۋشىلەرى حابارلاعانداي اپاتقا ۇشىراعان اۋە كەمەسىنىڭ 181 جولاۋشىسى مەن ەكيپاج مۇشەلەرى اراسىندا 167 ادامنىڭ دەنەسى تابىلدى. ەسكە سالا كەتەيىن بورتتا 175 جولاۋشى مەن 6 ەكيپاج مۇشەسى بولعان.

ۇشاق بانگكوكتان تۇنگى 1:30-دا ۇشىپ شىعىپ، تاڭعى 8:30-دا مۋانعا قونۋى ءتيىس ەدى. الدىمەن ۇشاق قونۋعا ارەكەت جاسادى، ءبىراق كەيىن ەكىنشى اينالىمعا شىعىپ كەتتى. ەكىنشى قونۋ ارەكەتى تاڭعى 09:07-دە تىركەلىپ، ۇشاقتىڭ شاسسيى ىستەمەي قالدى. سونىڭ سالدارىنان ۇشاق فيۋزەلياجعا قوندى. ول ۇشۋ- قونۋ جولاعىنان شىعىپ، قورشاۋعا سوعىلدى. ناتيجەسىندە ۇشاق ەكىگە ءبولىنىپ، ءورت شىقتى.

اپاتتىڭ سالدارىن جويۋ جانە قازا بولعانداردى ىزدەۋ ءۇشىن 720-عا جۋىق ادام تارتىلدى، ولاردىڭ ىشىندە اۋەجاي قىزمەتكەرلەرى، ءورت سوندىرۋشىلەر، پوليتسەيلەر، اسكەري قىزمەتكەرلەر مەن جاعالاۋ كۇزەتى بار. ەكى امان قالعان ەكيپاج مۇشەسى اۋرۋحانادا جاتىر. ولار ۇشاقتىڭ ارتقى توتەنشە شىعۋ ەسىگى ماڭىندا بولعاندىقتان امان قالعان. 22 جاستاعى لي ەسىمدى بورتسەرىك جولاۋشىلارعا قىزمەت كورسەتكەن جانە سول جاق يىعىن سىندىرىپ، باسىنان جاراقات العان، ءبىراق ەسىن جوعالتپاعان. ەكىنشى امان قالعان 25 جاستاعى گۋدىڭ جاعدايى جاقسى. ول: «قوزعالتقىشتاردىڭ بىرىنەن ءتۇتىن شىعىپ، سودان كەيىن قوزعالتقىش جارىلدى» دەپ حابارلادى.

وسى اۋە كەمە جانە ەكيپاج مۇشەلەرى تۋرالى قانداي اقپارات بار؟

- Jeju Air وكىلى اپاتقا ۇشىراعان Boeing 737-800 ۇشاعىنىڭ 15 جىل بويى پايدالانىلعانىن جانە بۇرىن ەشقانداي اپاتتىق جاعدايعا ۇشىراماعانىن حابارلادى. ۇشاق كاپيتانىنىڭ 6823 ساعات ۇشۋ تاجىريبەسى بار، ول بۇل قىزمەتتە 2019 -جىلدىڭ ناۋرىزىنان بەرى جۇمىس ىستەپ كەلەدى. ەكىنشى ۇشقىشتىڭ 1650 ساعات ۇشۋ تاجىريبەسى بار جانە ول بۇل قىزمەتتە وتكەن جىلدىڭ اقپانىنان باستاپ ىستەيدى.

Jeju Air كومپانياسى بانگكوك پەن مۋان اراسىندا اپتاسىنا ءتورت رەت تۇراقتى رەيستەر ورىنداعان. بۇل رەيستەر نەگىزىنەن چارتەرلىك بولعان جانە جولاۋشىلاردىڭ كوپشىلىگى تايلاندتا كاتوليكتىك روجدەستۆونى اتاپ وتۋگە بارعان.

اپات سەبەپتەرى انىقتالدى ما؟

كۋاگەرلەر ۇشاق قونۋعا جاقىنداعان كەزدە وڭ جاق قوزعالتقىشتان جالىن شىعىپ، اينالاسىندا قۇستار ۇشقانىن ايتتى. اپات الدىندا جولاۋشىلاردىڭ ءبىرى تۋىسىمەن حات الماسقان. وندا: «قاناتقا قۇس كەپتەلىپ قالدى، قونا الماي جاتىرمىز» دەلىنگەن.

41 جاستاعى يۋ چجەين وڭ قاناتتا ۇشقىن پايدا بولعانىن كورگەنىن مالىمدەدى. «مەن ۇشاقتىڭ اقاۋى بار ەكەنىن ايتىپ، وتباسىممەن سويلەسىپ جاتقانىمدا قاتتى جارىلىس ەستىدىم»، - دەدى ول.

باسقا كۋاگەر چو اۋەجايدان 4,5 شاقىرىم جەردە جۇرگەندە اپاتتى كورگەنىن ايتتى. «مەن ۇشاقتىڭ قونۋعا جاقىنداعانىن كوردىم، ءبىراق جارىقتىڭ جارقىلىن بايقادىم»، - دەدى ول. «سودان كەيىن قاتتى داۋىس ەستىلدى، ارتىنان ءتۇتىن كوتەرىلدى جانە بىرنەشە جارىلىس بولدى».

مۋان حالىقارالىق اۋەجايىنىڭ جانىندا ءىرى قورعالاتىن سۋلى-باتپاقتى القاپ ورنالاسقان. بۇل جەر جىل قۇستارىنىڭ ايالداۋ ورنى رەتىندە بەلگىلى. اتاپ وتەيىك، مۋان اۋەجايىندا ۇشۋ-قونۋ جولاعىن كەڭەيتۋ جۇمىستارى جۇرگىزىلىپ جاتقان ەدى. جوسپار بويىنشا قۇرىلىس كەلەسى جىلى اياقتالۋى ءتيىس. ۇشۋ-قونۋ جولاعىنىڭ ۇزىندىعى 2,8 ك م، بۇل ينچحون اۋەجايىنىڭ (3,7 ك م) جانە كيمپحو اۋەجايىنىڭ (3,6 ك م) جولاقتارىنان قىسقا. وسىعان بايلانىستى ساراپشىلار اپاتتى جاعدايلاردا بۇل ۇزىندىق جەتكىلىكسىز بولۋى مۇمكىن دەگەن پىكىر ءبىلدىردى. الايدا كولىك مينيسترلىگى بۇل اپاتتىڭ ۇشۋ-قونۋ جولاعىنىڭ ۇزىندىعىنان بولعانىن راستاۋ قيىن ەكەنىن، ويتكەنى ۇقساس ولشەمدەگى باسقا ۇشاقتار مۇندا ءساتتى قونعانىن مالىمدەدى.

24.kz