وڭتۇستىك كورەيا ۇكىمەتى حالىققا 110 دوللاردان تاراتادى

استانا. KAZINFORM - كورەيا رەسپۋبليكاسىنىڭ ۇكىمەتى ىشكى سۇرانىستى قولداۋ باعدارلاماسى اياسىندا ەلدىڭ بارلىق ازاماتىنا 150000 ۆوننان (110 دوللار) تولەۋ تۋرالى شەشىم قابىلدادى. بۇل تۋرالى Korea Herald حابارلادى.

«تۇتىنۋشى كۋالىگىن» 21 -شىلدەدەن 12 -قىركۇيەككە دەيىن الۋعا بولادى. كۋپوندار 30 -قاراشاعا دەيىن جارامدى. 18- ماۋسىمداعى جاعداي بويىنشا كورەيا رەسپۋبليكاسىندا تۇراتىن بارلىق ازامات (شامامەن 50 ميلليون ادام) تولەمدى الا الادى.

ونىڭ مولشەرى الۋشىنىڭ الەۋمەتتىك جاعدايىنا بايلانىستى وزگەرەدى. از قامتىلعان ازاماتتار مەن تولىق ەمەس وتباسىلار ءبىر ادامعا 300 000 ۆون (220 دوللار) الادى. ارنايى باعدارلاما بويىنشا مەملەكەتتىك الەۋمەتتىك جاردەماقى الاتىن ازاماتتار 400000 ۆون (293 دوللار) الادى. اۋىلدىق جەرلەردىڭ تۇرعىندارى قوسىمشا 30 000 ۆون (22 دوللار)، ال ەرەكشە مارتەبەسى بار 84 مۋنيتسيپاليتەتتىڭ تۇرعىندارى قوسىمشا 50000 ۆون (36 دوللار) الادى.

تولەمدەردى ءوتىنىش بەرۋشىلەردىڭ نەسيەلىك جانە دەبەتتىك كارتالارى، بەلگىلەنگەن شەگى بار دەبەتتىك كارتالارى نەمەسە سىيلىق سەرتيفيكاتتارى ارقىلى جاساۋعا بولادى. دەگەنمەن، قاراجاتتى ازاماتتار تەك وزدەرى تۇراتىن اۋداندا جۇمساي الادى.

Yonhap اقپارات اگەنتتىگىنىڭ حابارلاۋىنشا، تۇراقتى تۇرۋعا رۇقساتى بارلار، كورەي ازاماتتارىنىڭ جۇبايلارى نەمەسە بوسقىنداردان باسقا شەتەلدىكتەر ەشقانداي تولەم المايدى.
سونداي- اق 22 -قىركۇيەك پەن 31 -قازان ارالىعىندا 100000 ۆون كولەمىندەگى تولەمدەردىڭ ەكىنشى كەزەڭى جوسپارلانۋدا، ول ەڭ جوعارى تابىسى بار حالىقتىڭ 10 پايىزىن قوسپاعاندا، ازاماتتاردىڭ 90 پايىزىنا قولجەتىمدى بولادى.

ەسكە سالا كەتەيىك، زەرتتەۋلەرگە قاراعاندا، وڭتۇستىك كورەيا دەموگرافيالىق داعدارىس الدىندا تۇر.