وڭتۇستىك كورەيا جوعارى تەحنولوگيا ماماندارىنا «جوعارى دەڭگەيلى ۆيزا» ەنگىزەدى

استانا. KAZINFORM - كورەيا وسى ايدا جارتىلاي وتكىزگىشتەر مەن ەلەكتر كولىكتەرىنىڭ اككۋمۋلياتورلارى سياقتى سالالار بويىنشا شەتەلدىك ماماندارعا ەلدە تۇراقتى تۇرۋدى قامتاماسىز ەتۋ جانە جىلدام ۆيزا الۋ ءۇشىن جاڭا ۆيزالىق باعدارلامانى ىسكە قوسادى، دەپ حابارلايدى The Korea Times.

«Top-tier Visa» (جوعارى دەڭگەيلى ۆيزا) جۇيەسى اياسىندا بەلگىلى ءبىر سالالاردا سەگىز جىلدىق تاجىريبەسى بار شەتەلدىك ماماندار جانە ولاردىڭ وتباسىلارى وڭتۇستىك كورەيادا ءۇش جىل جۇمىس ىستەۋگە قۇقىق بەرەتىن F-2 ۆيزاسىن الا الادى، كەيىننەن تۇراقتى تۇرۋعا رۇقسات الۋ مۇمكىندىگى بار.

- شەتەلدىك جۇمىس كۇشىن پايدالانۋ ەندى تاڭداۋ ەمەس، دەموگرافيالىق جانە ەكونوميكالىق وزگەرىستەرگە بەيىمدەلۋ، سونداي-اق ەكونوميكا مەن قوعامدى نىعايتۋ قاجەتتىلىگى، - دەدى پرەزيدەنتتىڭ مىندەتىن اتقارۋشى چحۆە سان موك.

پوتەنسيالدى ۇمىتكەرلەر الەمدەگى ەڭ ۇزدىك 100 ۋنيۆەرسيتەتتىڭ ءبىرىنىڭ عىلىمي دارەجەسىنە يە بولۋى كەرەك، 500 ءىرى كومپانيانىڭ بىرىندە كەمىندە ءۇش جىل جۇمىس تاجىريبەسى بولۋى كەرەك. سونىمەن قاتار، ولاردىڭ كورەياداعى كومپانيالار تولەيتىن جىلدىق سىياقىسى جان باسىنا شاققانداعى جالپى ۇلتتىق كىرىستەن كەمىندە ءۇش ەسە كوپ بولۋى كەرەك - شامامەن 140 ميلليون ۆون نەمەسە ودان جوعارى (996,000).

سونىمەن قاتار، وڭتۇستىك كورەيانى جاس شەتەلدىك ماماندارعا تارتىمدى ەتۋ ءۇشىن ۇكىمەت ۋنيۆەرسيتەتتىڭ جەتەكشى عىلىمي باعدارلامالارىنىڭ تۇلەكتەرىنە D-10 ۆيزاسىن بەرۋگە نيەتتى، بۇل ولارعا ەكى جىل بويى جۇمىسقا ورنالاسۋعا مۇمكىندىك بەرەدى.

باعدارلامادا ەڭ جاقسى مەكتەپتەردى انىقتاۋ ءۇشىن قانداي كريتەريلەر قولدانىلاتىنى، ۆيزا الداعى اپتالاردا رەسمي تۇردە ىسكە قوسىلعاننان كەيىن جاريالانادى.

باسقا ەلدەردەن جاس مامانداردى تارتۋ ءۇشىن ۇكىمەت «youth dream visa» (جاستاردىڭ ارمان ۆيزاسى) ەنگىزەدى، ونىڭ كومەگىمەن «دوستىق ەلدەردىڭ جاس ازاماتتارى» كاسىبي دايىندىقتان، تاعىلىمدامادان ءوتىپ، كورەيادا جۇمىسقا ورنالاسا الادى.

وسىعان دەيىن وڭتۇستىك كورەيا شەتەلدىكتەر ءۇشىن ەلەكتروندى كارتا جۇيەسىن ەنگىزگەنىن حابارلاعان ەدىك.

اۆتور

ەركەجان سماعۇلوۆا