وڭتۇستىك كورەيا دەموگرافيالىق داعدارىس الدىندا تۇر - جاڭا زەرتتەۋ
استانا. KAZINFORM - ەگەر ەلدەگى دەموگرافيالىق قۇلدىراۋ وزگەرىسسىز جالعاسا بەرسە، 2125-جىلعا قاراي وڭتۇستىك كورەيا حالقى قازىرگى دەڭگەيىنىڭ نەبارى %15 ىنا دەيىن ازايۋى مۇمكىن، دەپ حابارلايدى Kazinform اگەنتتىگى The Korea Herald باسىلىمىنا سىلتەمە جاساپ.
جەكەمەنشىك زەرتتەۋ ورتالىعى - Korean Peninsula Population Institute for Future ۇسىنعان ەڭ ناشار ستسەنارييگە سايكەس، وڭتۇستىك كورەيا حالقىنىڭ سانى 2125-جىلعا دەيىن 7,53 ميلليون ادامعا ازايىپ كەتۋ ءقاۋپى تۇر. بۇل قازىرگى 51,68 ميلليون اداممەن سالىستىرعاندا وتە ۇلكەن كورسەتكىش. قازىر سەۋلدە 9,3 ميلليوننان استام ادام تۇرادى.
ڭ وڭتايلى بولجام بويىنشا دا، حالىق سانى 15,73 ميلليون ادامعا دەيىن تومەندەيدى - بۇل قازىرگى كورسەتكىشتىڭ ۇشتەن بىرىنەن از.
بولجامعا ساي 75 جىلدان كەيىن ەڭبەككە جارامدى 100 ادامعا (15 تەن 64 جاسقا دەيىن) 65 جاستان اسقان 140 قارت ادام كەلەتىن بولادى.
قوعامدىق كوڭىل-كۇي دەزەرتتەلدى
ەسەپتە سونىمەن قاتار 20-40 جاس ارالىعىنداعى ادامداردىڭ نەكە مەن بالا تۋۋ ماسەلەلەرىنە قاتىستى پىكىرلەرى زەرتتەلدى. بۇل تالداۋ Blind قوسىمشاسىنداعى شامامەن 60000 جاريالانىم نەگىزىندە جاسالعان.
زەرتتەۋ ناتيجەسى بويىنشا، قازىرگى جاستار ءۇشىن نەكەگە تۇرۋداعى باستى فاكتورلار - «اقشا» مەن «تۇرعىن ءۇي»، ال «ماحاببات» كەيىنگى ورىنعا ىعىستىرىلعان.
سونداي-اق، قارجىلىق قيىندىقتار - بالا تۋۋ تۋرالى شەشىم قابىلداۋدا ەڭ ءجيى اتالاتىن سەبەپ.
باياندامادا جاستاردىڭ وتباسىن قۇرۋ جانە بالا ءسۇيۋ تۋرالى شەشىمدەرى جەكە قالاۋى ەمەس، كوبىنە ەكونوميكالىق جاعدايلارمەن بايلانىستى ەكەنى ايتىلعان.
ۇسىنىلعان شەشىمدەر:
ينستيتۋت دەموگرافيالىق داعدارىسپەن كۇرەسۋ ءۇشىن ءبىرقاتار شارالار ۇسىندى:
• بالا تۋۋ مەن تاربيەلەۋ شىعىندارىن ازايتۋ ءۇشىن مەملەكەتتىك قولداۋدى ارتتىرۋ
• جۇمىس پەن جەكە ءومىر اراسىنداعى تەپە-تەڭدىكتى قالىپتاستىرۋ
• زەينەتكەرلىك جاستى كوتەرۋ
• قارت ادامداردىڭ ۇزدىكسىز جۇمىسپەن قامتىلۋىن قولداۋ
• يمميگراتسيالىق ساياساتتى رەفورمالاۋ
بۇل بولجامدار وڭتۇستىك كورەياداعى دەموگرافيالىق داعدارىستىڭ قانشالىقتى كۇردەلى ەكەنىن كورسەتەدى. ەل ءقازىر الەمدەگى ەڭ تومەن تۋۋ كورسەتكىشتەرىمەن جانە حالىقتىڭ جىلدام قارتايۋىمەن بەتپە-بەت كەلىپ وتىر.
ايتا كەتەيىك، 2024-جىلى وڭتۇستىك كورەيادا 242334 ءسابي دۇنيەگە كەلگەن، بۇل 2015-جىلدان بەرگى العاشقى جىلدىق ءوسىم بولدى.
ايتا كەتەيىك، وڭتۇستىك كورەياعا كەلگەن تۋريستەر سانى بيىل 20 ميلليوننان اسقان.
