وڭتۇستىك افريكادا قار جاۋىپ، تاسقىننان جەتى ادام قازا تاپتى
استانا. KAZINFORM - وڭتۇستىك افريكا رەسپۋبليكاسىندا (و ا ر) قولايسىز اۋا رايى سالدارىنان بىرنەشە وڭىردە جولدار جابىلىپ، ەلەكتر قۋاتى ءوشتى. شىعىس كاپ پروۆينتسياسىندا سۋ تاسقىنى مەكتەپ اۆتوبۋسىن اعىزىپ اكەتكەن.
BBC مالىمەتىنشە، و ا ر ءبىرقاتار اۋماعىندا جاۋعان قار مەن نوسەر جاۋىننان كەيىن توتەنشە جاعداي قالىپتاسىپ وتىر. تابيعاتتىڭ توسىن مىنەزىنەن اسىرەسە شىعىس كاپ جانە كۆازۋلۋ- ناتال پروۆينتسيالارى كوپ زارداپ شەكتى.
شىعىس كاپ وڭىرىندە مەكتەپ وقۋشىلارىن تاسىمالداپ بارا جاتقان اۆتوبۋس تاسقىن سۋعا اعىپ كەتكەن. قۇتقارۋشىلار ازىرگە ءۇش وقۋشىنى تىرىدەي تاپقان. اۆتوبۋستاعى باسقا بالالار تۋرالى ناقتى اقپارات جوق. قۇتقارۋ جۇمىستارى تۇندە توقتاپ، تاڭعى ۋاقىتتا قايتا جالعاستى.
سونداي- اق، و. ر. تامبو اۋدانىندا جەتى ادامنىڭ قازا تاپقانى بەلگىلى بولدى. ال يست- لوندون قالاسى ماڭىندا قۇلاعان اعاشتان جالتارماق بولعان جۇرگىزۋشى باسقارۋ جۇيەسىن يگەرە الماي، ميكرواۆتوبۋس اۋدارىلىپ كەتكەن.
قارلى بوران مەن تولاسسىز جاۋىن سالدارىنان ەلدە 500 مىڭعا جۋىق تۇرعىن ءۇي جارىقسىز قالعان. جولداردا قوزعالىس تەجەلىپ، جۇك كولىكتەرى مەن جەڭىل كولىكتەر ۇزىن- سونار كەپتەلىستە تۇر. كۆازۋلۋ- ناتال مەن شىعىس كاپ پروۆينتسيالارىندا كۇرە جولداردىڭ كەي بولىگى ۋاقىتشا جابىلدى.
مامانداردىڭ ايتۋىنشا، ماۋسىم مەن تامىز ارالىعىندا قىس مەزگىلى بولاتىن وڭتۇستىك افريكا ءۇشىن جاۋىن مەن قار تاڭسىق قۇبىلىس ەمەس. الايدا سوڭعى جىلدارى كليماتتىڭ وزگەرۋىنە بايلانىستى تابيعي اپاتتاردىڭ جيىلىگى مەن قارقىندىلىعى ايتارلىقتاي ارتىپ وتىر.
ەسكە سالايىق، قازاقستان افريكا ەلدەرىمەن بايلانىستى كۇشەيتۋگە باسا ءمان بەرەتىنىن حابارلاعانبىز.
