وڭتۇستىك افريكا رەسپۋبليكاسى پارلامەنتى قازاقستانمەن ىنتىماقتاستىقتى كەڭەيتۋگە مۇددەلى
استانا. KAZINFORM - وڭتۇستىك افريكانىڭ زاڭنامالىق استاناسى كەيپتاۋن قالاسىندا قازاقستان ەلشىسى ەركىن احينجانوۆتىڭ وڭتۇستىك افريكا رەسپۋبليكاسى پروۆينسيالارى ۇلتتىق كەڭەسىنىڭ (جوعارعى پالاتا) ءتوراعاسى رەفيلۆە متسۆەني-سيپانەمەن جانە و ا ر ۇلتتىق اسسامبلەياسىنىڭ (تومەنگى پالاتا) سپيكەرى اندجەلا توكوزيلە ديديزامەن كەزدەسۋلەرى ءوتتى.
كەزدەسۋلەر بارىسىندا ەلشى ق ر پرەزيدەنتى قاسىم-جومارت توقايەۆتىڭ باسشىلىعىمەن ەلىمىزدە جۇزەگە اسىرىلىپ جاتقان نەگىزگى رەفورمالار مەن باستامالار بويىنشا ەگجەي-تەگجەيلى اقپاراتتاندىردى.
قازاق ديپلوماتى ەكونوميكا، ساۋدا جانە ءبىلىم بەرۋ سياقتى ءبىرقاتار نەگىزگى سالالاردا، سونداي-اق ورنىقتى ءوزارا ءىس-قيمىلدى قامتاماسىز ەتۋ ءۇشىن شارتتىق-قۇقىقتىق بازانى جەتىلدىرۋدى ۇسىنا وتىرىپ، قازاقستاننىڭ وڭتۇستىك افريكامەن ەكىجاقتى ىنتىماقتاستىقتى نىعايتۋعا ۇمتىلىسىن اتاپ ءوتتى.
ءوز تاراپىنان، وڭتۇستىك افريكا پارلامەنتىنىڭ پالاتالار باسشىلارى ەكى ەل اراسىنداعى ىنتىماقتاستىقتى تەرەڭدەتۋگە مۇددەلى ەكەنىن مالىمدەدى. ولار ەكى ەل اراسىندا بىرلەسكەن جوبالاردى ىسكە اسىرۋ مۇمكىندىگىنە سەنىم ءبىلدىرىپ، ناتيجەسىندە ءوزارا ءتيىمدى سەرىكتەستىك ءۇشىن جاڭا مۇمكىندىكتەر تۋعىزاتىن اتاپ ءوتتى.
كەزدەسۋلەر قورىتىندىسى بويىنشا تاراپتار ەكىجاقتى پارلامەنتارالىق بايلانىستاردى دامىتۋ ماقساتىندا ديالوگتى جالعاستىرۋعا كەلىستى.
اۆتور
ەربول جانات
