وتستاۆكاعا كەتكەن ۇكىمەت قىمباتشىلىقتى اۋىزدىقتاي المادى - ەرمۇرات باپي

Фото: Ермұрат Бапидің жеке архивінен
Фото: Ермұрат Бапидің жеке архивінен

استانا. KAZINFORM - ءماجىلىس دەپۋتاتى ەرمۇرات باپي وتستاۆكاعا جىبەرىلگەن ۇكىمەت كۇردەلى ەكونوميكالىق مىندەتتەردى اتقارا المادى دەگەن ويىن ءبىلدىردى.

«ۇكىمەتتىڭ وتستاۆكاعا كەتۋى كەشەگى كۇننىڭ تاريحى، ونى قاۋزاي بەرۋدىڭ قاجەتى جوق. وتكەن جىلى مەن ءاليحان سمايىلوۆتىڭ ۇكىمەت باسشىسى بولۋىنا قارسى داۋىس بەرگەم. ءا. سمايىلوۆ جاقسى جىگىت بولعانىمەن، ول پرەمەرلىك فۋنكتسيانى اتقارۋعا شاماسى جەتپەدى. وتستاۆكاعا كەتكەن ۇكىمەت قىمباتشىلىقتى اۋىزداقتاي المادى، كەدەيشىلىككە قارسى ۇكىمەتتىك باعدارلاما جاساي المادى. ول ۇكىمەت ءورت ءسوندىرۋ قىزمەتىن اتقاردى، قاي جەردە ءورت، قايدا اپات - سونىڭ جاۋابىمەن عانا اينالىستى. ەلدىڭ كۇردەلى ەكونوميكالىق جاعدايىندا وتستاۆكاعا كەتكەن ۇكىمەت وزىنە جۇكتەلگەن مىندەتتەردى اتقارا المادى»، - دەدى ەرمۇرات باپي.

ودان بولەك، دەپۋتات جاڭا ۇكىمەت باسشىسى رەتىندە «Amanat» پارتياسى ۇسىنعان ولجاس بەكتەنوۆتىڭ كانديداتۋراسىن قولدايتىنىن ايتتى.

«نەگىزى مەنىڭ جورامالىمدا ولجاس بەكتەنوۆتىڭ كانديداتۋراسى جوق ەدى. بۇل تۇرعىدا مەن پرەزيدەنتتىڭ كوزقاراسىنان الشاقتاۋ بولعان ەكەنمىن. قازىر ويلاپ وتىرسام، وتپەلى كەزەڭدە اتالعان كانديداتۋرا قاجەت. قازىر ەلدىڭ بيۋجەتى دەفيتسيت جاعدايدا، ونىڭ ۇستىنە قازىنانى ينۆەستيتسيا قۇيۋمەن تولتىرۋ بولمايتىن نارسە، ويتكەنى ول ۇستەمە پايىزبەن قايتارىلاتىن دۇنيە. مەنىڭ ويىمشا، بيۋجەتتى تولتىرۋدىڭ ءادىسىنىڭ ءبىرى ەل ىشىندە جانە شەتەل اسقان اكتيۆتەردى قايتارۋ. مەن ويلايمىن، ولجاس بەكتەنوۆ ۇكىمەت باسىنا كەلسە، پرەزيدەنت الدىمەن زاڭسىز كەتكەن اكتيۆتەردى قايتارۋدى مىندەتتەيدى. ارينە، و. بەكتەنوۆ بۇعان دەيىن اكىم نە مينيستر بولماعان، ءبىراق ول پرەزيدەنت اكىمشىلىگىن باسقارىپ، ءبىر جىلدىڭ ىشىندە ونىڭ كوككە ورلەۋى قۇستىڭ سامعاۋىنداي بولدى. ودان بولەك، سىبايلاس جەمقورلىقپەن كۇرەس اگەنتتىگىنىڭ ءتوراعاسى بولدى، دەمەك زاڭسىز شەتەل اسقان قاراجات، سىبايلاس جەمقورلىقپەن كۇرەس تاقىرىبى وعان تاڭسىق ەمەس»، - دەيدى ول.

ونىڭ ايتۋىنشا، ۇرلانعان اكتيۆتەردى قايتارىپ، ەل ەكونوميكاسىنا جۇمساۋ قاجەت.

«ارينە، جاڭا پرەمەر-ءمينيستردىڭ كىم بولاتىنىن تۇستەن كەيىنگى جيىندا بىلەتىن بولامىز. پرەزيدەنت تە ءوز پىكىرىن ايتاتىن شىعار»، - دەپ قورىتىندىلادى حالىق قالاۋلىسى.

سوڭعى جاڭالىقتار