وتكەن زاماننىڭ ەلەسى، ۇمىتۋ كەرەك - جەتىسۋ اكىمى كوماندالىق قىزمەت تۋرالى

استانا. KAZINFORM - ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا جەتىسۋ وبلىسىنىڭ اكىمى بەيبىت يسابايەۆقا قىزمەت اۋىسقاندا كومانداسىن وزىمەن الا جۇرەتىندەرگە قاتىستى ساۋال قويىلدى.

- جەتىسۋعا وزىممەن ءبىر ادام الىپ باردىم، ول مەنىڭ كومەكشىم، سەنات دەپۋتاتى بولىپ جۇرگەندە بىرگە جۇمىس ىستەگەنمىن. ءالى كۇنگە دەيىن مەنىڭ كومەكشىم بولىپ جۇمىس ىستەيدى. باسقا بىردە ءبىر ادام الىپ بارعان جوقپىن. باسشىلىق قۇرامداعى ادامداردىڭ بارلىعى جەتىسۋ وبلىسىنىڭ ازاماتتارى، - دەپ جاۋاپ بەردى بەيبىت يسابايەۆ ءوڭىردىڭ الەۋمەتتىك- ەكونوميكالىق دامۋى تۋرالى ەسەپ بەرۋ بارىسىندا.

اكىمنىڭ ايتۋىنشا، وڭىردەگى كادردىڭ دەنى جەرگىلىكتى.

- مىسالى، ورىنباسارىم، اپپارات باسشىسى قىزمەتىن جەتىسۋ وبلىسىندا باستاعان، كەيىن مانساپتارى ءوسىپ استاناعا، الماتىعا جۇمىسقا كەتكەن، ءبىراق ولاردى كەرى شاقىرىپ الدىم. ءتىپتى، مەنەن باسقا الماتى وبلىسىندا تۋعان ازاماتتار جوق. بارلىعى جەتىسۋ وبلىسىندا تۋىپ وسكەن ازاماتتار. اۋدان اكىمدەرىنىڭ ءبارى جەرگىلىكتى كادرلار. سوندىقتان، كوماندالىق دەگەن وتكەن زاماننىڭ ەلەسى، ونى ۇمىتۋ كەرەك. مەن وندايعا ەشقاشان بارمايمىن، - دەيدى ول.

ايتا كەتەيىك، جەتىسۋ وبلىسىندا 2,6 تريلليون تەڭگەگە 189 ينۆەستيتسيالىق جوبا قولعا الىندى.

سونداي-اق، بەيبىت يسابايەۆ اۋىلعا جۇمىس ىستەۋگە بارعان ەرلى-زايىپتى دارىگەرلەرگە 20 ميلليون تەڭگە جاردەماقى بەرىلەتىنىن ايتىپ وتىر.

داۋلەت ىزتىلەۋ

اۆتور