وتباسى بانك يسلامدىق يپوتەكانى ەنگىزبەك

استانا. KAZINFORM - وتباسى بانك كەلەر جىلى يسلام يپوتەكانى ەنگىزۋدى جوسپارلاپ وتىر. بۇل تۋرالى اتالعان بانكتىڭ باسشىسى ءلاززات يبراگيموۆا ايتتى.

«ءدىني ۇستانىم تۇرعىسىندا پايىزدىق ءوسىمدى حارام سانايتىن ادامدار بار. ءبىزدىڭ بانكتىڭ سالىمشىلارى بۇل باعىتتا ءتيىستى يپوتەكانى ەنگىزۋ تۋرالى ۇسىنىس ايتىپ جاتىر. زاڭناما اياسىندا ءتيىستى ۇسىنىستاردى پىسىقتاپ، 2025-جىلى وسى تەتىكتى ەنگىزۋدى جوسپارلاپ وتىرمىز. يدەيا رەتىندە وسىنى قاراستىرىپ جاتىرمىز. بۇل تۇرعىدا ناقتى ەرەجەلەر بولماعاندىقتان، قازىر ناقتى ءبىر جاڭالىقتى قوسىپ ايتا المايمىن»، - دەدى ل. يبراگيموۆا سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ايتا كەتەيىك، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالدى. سەنات زاڭنىڭ جەكەلەگەن باپتارىن جاڭا رەداكتسيادا ۇسىنىپ، ونى ماجىلىسكە قايتاردى.

سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ مالىمەتىنشە، زاڭ بويىنشا «وتباسى بانكى» ا ق- نى ۇلتتىق دامۋ ينستيتۋتى ەتىپ قايتا قۇرۋ ەسكەرىلگەن. بۇل رەتتە «وتباسى بانكى» ا ق- عا جەرگىلىكتى اتقارۋشى ورگانداردىڭ مۇقتاجدار ءۇشىن تۇرعىنجايدى ەسەپكە الۋدى ءارى قويۋدى جانە ءبولۋدى جۇزەگە اسىرۋ جونىندەگى فۋنكتسيالارى بەرىلەدى.

سونداي-اق «وتباسى بانكى» ا ق- عا تۇرعىن ۇيگە مۇقتاجدار تۋرالى مالىمەتتەردى قامتيتىن، باسقا دا مەملەكەتتىك دەرەكقورلارمەن ينتەگراتسيالانعان «تۇرعىن ۇيمەن قامتاماسىز ەتۋ ورتالىعى» ەلەكتروندىق بازاسىن قالىپتاستىرۋ، جۇرگىزۋ، مونيتورينگتەۋ جونىندەگى فۋنكتسيالار بەكىتىلەدى.

اۆتور

رۋسلان عابباسوۆ