وتاندىق تۇڭعىش ميكروچيپ ازىرلەندى
استانا. KAZINFORM - قازاقستان جارتىلاي وتكىزگىشتەر يندۋسترياسىنا قادام باستى. Nazarbayev University زەرتتەۋشىلەرى ەلىمىزدەگى ءبىرىنشى ميكروپروتسەسسوردى جاسادى.
ينجەنەريا جانە سيفرلىق عىلىم مەكتەبىنىڭ اسسيستەنت-پروفەسسورى نۇرسۇلتان قابىلقاستىڭ ايتۋىنشا، چيپ جاساۋ - بۇل جاي عانا ازىرلەمە ەمەس، جاھاندىق جارتىلاي وتكىزگىشتەر يندۋسترياسىنا باستاۋ بولاتىن سوقپاق.
- دايىن پروتسەسسوردى ازىرلەۋ مەن سىناقتان وتكىزۋگە 3 اي ۋاقىتىمىز كەتتى. قولىمىزدا قاراپايىم پروتوتيپ بولعاندىقتان بەيىمدەۋ جىلدام ءوتتى. ۋاقىتتى ەڭ كوپ العان كەزەڭ - تىكەلەي جاساپ شىعارۋ بولدى. دەگەنمەن، بۇل رەتتە دە ءبىزدىڭ رولىمىز شامالى. اتالعان پروتسەسس وندىرىستە ورىندالدى جانە دە ءبىز دايىن چيپتى كۇتىپ وتىردىق، - دەدى عالىم.
ونىڭ اتاپ وتۋىنشە، ميكروسۇلبانى جاساپ شىعارۋ وتە قىمباتقا تۇسەتىن پروتسەسس سانالادى. سىناققا ارنالعان چيپتى ازىرلەۋدىڭ وزىنە عانا 100 مىڭ دوللار جۇمسالۋى مۇمكىن. چيپ جاساۋ قىتاي عىلىم اكادەمياسىنىڭ ۋنيۆەرسيتەتىمەن جانە بەيجىڭ اشىق نەگىزگى كودتار ينستيتۋتىمەن حالىقارالىق سەرىكتەستىكتىڭ ارقاسىندا جۇزەگە استى. عالىمدار قازاقستاندىق ديزايندى سەرىكتەستەردىڭ جاپپاي وندىرىستىك پروتسەسىنە ەنگىزىپ، ميكروسۇلبانى تەگىن دايىنداي الدى.
ازىرلەنگەن پروتسەسسوردى اۆتوماتتاندىرىلعان قۇرىلعىلاردا، مىسالى، باعدارلامالاناتىن لوگيكالىق كونتروللەرلەردە (PLC) قولدانۋعا بولادى. وندا جوعارى ونىمدىلىك تالاپ ەتىلمەيدى، ءبىراق جۇمىس سەنىمدىلىگى پەن بولجامدىلىق اسا ماڭىزدى.
ازىرلەۋشىلەر «Designed in Kazakhstan» دەپ تاڭبالانعان ءبىرىنشى چيپ عىلىمي زەرتتەۋلەر، ءبىلىم بەرۋ جانە يننوۆاتسيالىق ءوسىم ءۇشىن جاڭا مۇمكىندىكتەر بەرە وتىرىپ، تەحنولوگيالىق ەكوجۇيەنى قالىپتاستىرۋ جانە جاھاندىق جارتىلاي وتكىزگىشتەر يندۋسترياسىنا ىقپالداسۋعا نەگىز قالىپتاستىراتىندىعىنا سەنىمدى.
بۇعان دەيىن پرەمەر- مينيستر ولجاس بەكتەنوۆ ۇكىمەت وتىرىسىندا عىلىمدى سيفرلاندىرۋ باعىتىندا ءبىرقاتار تاپسىرما بەرگەنىن جازعان ەدىك.
