وتاندىق جەڭىل ونەركاسىپ ءوندىرىسى كولەمى 2,6 پايىزعا ءوستى
استانا. KAZINFORM - مەملەكەتتىك قولداۋ العان سۋبەكتىلەر ساۋدا ورىندارىنىڭ كەمىندە %20 ازىق-تۇلىككە جاتپايتىن وتاندا وندىرىلگەن تاۋارلارعا ارناۋعا مىندەتتى. بۇل تۋرالى ساۋدا جانە ينتەگراتسيا ۆيتسە-ءمينيسترى اسەت ءنۇسىپوۆ ءمالىم ەتتى.
- جىل باسىنان بەرى جەڭىل ونەركاسىپ سالاسىنداعى ءوندىرىس كولەمى %2,6 عا ءوستى. بۇل جاي عانا سان ەمەس، جۇيەلى جۇمىستىڭ، ينۆەستيتسيا، كووپەراتسيا مەن مامانداردىڭ زور ەڭبەگىنىڭ ناتيجەسى. جەڭىل ونەركاسىپ ساۋدا سالاسىمەن تىعىز بايلانىستى، ال قازىرگى جاعدايدا ىشكى نارىقتىڭ، تۇراقتى تۇتىنۋدىڭ جانە يمپورتتى الماستىرۋدىڭ ءرولى ارتىپ جاتىر. ءبىزدىڭ مىندەت - وتاندىق ءوندىرىستى قولداۋ، ىشكى جانە سىرتقى وتكىزۋ نارىعىن دامىتۋ جانە قازاقستاندىق ونىمدەرگە ارنالعان سورە كەڭىستىگىن ۇلعايتۋ، - دەدى اسەت ءنۇسىپوۆ ەلوردادا وتكەن جەڭىل ونەركاسىپ ۇلتتىق بىرلەستىگىنىڭ 10 جىلدىعىنا ارنالعان Ⅱ سەزىندە.
ۆيتسە-ءمينيستردىڭ مالىمدەۋىنشە، وتاندىق ءوندىرىستى قولداۋ ماقساتىندا ءبىرقاتار شەشىم قابىلداندى.
- بۇگىندە مەملەكەتتىك قولداۋ العان سۋبەكتىلەر ساۋدا ورىندارىنىڭ كەمىندە %20 ازىق-تۇلىككە جاتپايتىن ەلدە وندىرىلگەن تاۋارلارعا ارناۋى ءتيىس. بۇل سالا مۇددەسى ءۇشىن قابىلدانعان پرينتسيپتى شەشىم، - دەيدى ول.
بۇگىن ەلوردادا قازاقستاننىڭ جەڭىل ونەركاسىپ ۇلتتىق بىرلەستىگىنىڭ 10 جىلدىعىنا وراي سەزد ءوتتى.
بۇعان دەيىن حابارلاعانىمىزداي ەلىمىزدە جەڭىل ونەركاسىپتى دامىتۋدىڭ كەشەندى جوسپارى ازىرلەنىپ جاتىر.
ايتا كەتەيىك، بۇگىندە وتاندىق جەڭىل ونەركاسىپ سالاسىندا شامامەن 28 مىڭ ادام ەڭبەك ەتەدى، ولاردىڭ شامامەن %60 - ايەل ماماندار.
