وتاندىق بالمۇزداق ءوندىرىسى الەمدىك نارىقتى باعىندىرا باستادى

استانا. KAZINFORM - الماتى وبلىسىندا ورنالاسقان كومپانيا ءونىمى وسىعان دەيىن ورتالىق ازيا، گرۋزيا، موڭعوليا، قىتاي مەن رەسەيگە ەكسپورتتاپ كەلگەن، دەپ حابارلايدى 24kz.

بيىل وعان تاعى ەكى مەملەكەت قوسىلدى. ەندى قازاقستاندا شىعارىلعان بالمۇزداقتى ارمەنيا مەن ساۋد ارابياسىنان دا كەزدەستىرۋگە بولادى. الداعى ونجىلدىقتا كاسىپورىن ءونىم كولەمىن ءۇش ەسە ارتتىرۋدى كوزدەپ وتىر. بۇل - الماتى وبلىسىنداعى جالعىز بالمۇزداق شىعاراتىن كاسىپورىن. العاشىندا وتباسىلىق سەح قانا بولعان. قازىر ەلىمىزدە شىعارىلاتىن بالمۇزداقتىڭ تەڭ جارتىسى وسى كاسىپورىننىڭ ەنشىسىندە. جىل ساناپ ەكسپورتتاۋشى ەلدەر قاتارىن دا ارتتىرىپ كەلەدى. ول ءۇشىن، ارينە، ءبىرىنشى كەزەكتە ءونىم كولەمىن ارتتىردى.

بيىل كومپانيا اۋقىمىن كەڭەيتىپ، جاڭا جەلىلەردى ىسكە قوسۋ ءۇشىن 35 ميلليارد تەڭگە ينۆەستيتسيا قۇيدى. ونىڭ قۇرىلىسى اياقتالعاندا فابريكا كۇنىنە 350 توننا بالمۇزداق شىعارادى. قازىرگى قۋاتتىلىعى - تاۋلىگىنە 150 توننا.

دميتري دوكين، كاسىپورىننىڭ ديرەكتورلار كەڭەسىنىڭ ءتوراعاسى:

- ءبىز بارىنشا ساپالى ءونىم وندىرۋگە كۇش سالىپ جاتىرمىز. قازىر بىزبەن الەمنىڭ ەڭ مىقتى دەگەن بالمۇزداق فابريكالارى ساناسادى. مەن ءوزىم 30 جىلدان استام بالمۇزداق وندىرىسىندە جۇمىس ىستەپ كەلە جاتىرمىن. سالانى جەتىك بىلەم. ەڭ مىقتى كاسىبي مامانداردى تارتتىق. مۇنداعىداي تەحنولولگيا كوپ جەردە كەزدەسە بەرمەيدى. ءبىزدىڭ بالمۇزداقتار بالالاردىڭ عانا ەمەس، ۇلكەندەردىڭ دە سۇيىكتى ءتاتتىسى.

قازىر كومپانيا بالمۇزداقتىڭ 160 ءتۇرىن شىعارادى. وعان قوسا، جارتىلاي دايىن فابريكاتتار مەن ءسۇت ونىمدەرىن دە ۇسىنادى. بۇگىندە 3,5 مىڭ ادام جۇمىس ىستەيدى. جاڭا جەلىلەر ىسكە قوسىلعاندا ولاردىڭ سانى 5 مىڭعا كوبەيەدى. جۇمىسشىلاردىڭ اس- سۋى، تاسىمالى تۇگەل قاراستىرلعان.

ۇلان بورانباي ۇلى، كومپانيا قىزمەتكەرى:

- الەم بويىنشا 36 ال، ەۋروپا، ازيا-تىنىق مۇحيتى ىنتىماقتاستىق ۇيىمدارى مەملەكەتتەرىنىڭ ىشىندە 6-ورىنعا كوتەرىلدى. بۇل دەگەنىمىز، 2022 -جىلعا قاراعاندا 2023 قورىتىندىسى بويىنشا كوتەرىلدىك. ەندى ءبىزدىڭ جوسپارىمىز ودان دا ۇلكەن اۋقىمدى. جىلىنا 23 مىڭ توننادان استام بالمۇزداق ءوندىرىپ 10-نان اسا مەملەكەتكە ەكسپورتتاپ جاتىرمىز.

تۇراقتى ءوسۋ مەن يننوۆاتسيا كومپانياعا ءوز سالاسىندا كوشباسشى بولىپ قالۋعا جول اشتى. مۇنداي كاسىپورىنعا مەملەكەت بارىنشا قولداۋ ءبىلدىرىپ وتىر. ءوندىرىستى جاڭعىرتۋ، ساپانى قاداعالاۋ، لوگيستيكانى جەتىلدىرۋ جۇمىستارى جالعاسا بەرەدى.

24.kz