وسكەمەننەن ۇرىمجىگە اۋە رەيستەرى اشىلادى

وسكەمەن. KAZINFORM - شىعىس قازاقستان وبلىسىندا حالىقارالىق اۋە رەيستەرى اشىلماق.

ش ق و جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنە سۇيەنسەك، ءوڭىر تۇرعىندارى ان-24 ۇشاعى قاتىنايتىن وسكەمەن-زايسان باعىتىنا سۇرانىس ءبىلدىرىپ وتىر.

«ءار رەيسكە 80 پايىز جولاۋشى تولادى. ءبىر رەيستىڭ باعاسى - 15 مىڭ تەڭگە. ۇشۋ جەرگىلىكتى بيۋدجەتتەن سۋبسيديالانادى. بيىل مەملەكەت تاراپىنان كورسەتىلگەن قولداۋ كولەمى 187,1 ميلليون تەڭگەنى قۇرادى. وسى باعىت بويىنشا جىلىنا بارلىعى 15 مىڭنان استام جولاۋشى تاسىمالداۋ جوسپارلانۋدا. 2024-جىلى اۋە قاتىناسىنا سۇرانىستى ەسكەرە وتىرىپ، وسكەمەننەن زايسان اۋدانىنا رەيس سانى اپتاسىنا ءتورت رەتكە دەيىن ءوستى»، - دەيدى باسقارما باسشىسىنىڭ ورىنباسارى ايجان راحىمبايەۆا.

سونداي-اق شىعىس قازاقستاندا ءبىرقاتار حالىقارالىق اۋە رەيسى اشىلماق. اتاپ ايتقاندا:

- 31- ناۋرىزدان باستاپ وسكەمەن-ماسكەۋ (اپتاسىنا ەكى رەت)؛

- ەكىنشى جارتىجىلدىقتان باستاپ وسكەمەن-ءۇرىمجى؛

- مامىر-قىركۇيەك ايلارى ارالىعىندا وسكەمەن-انتاليا (ايىنا ءۇش رەت).