وسكەمەندىكتەر ليفتىلەردىڭ ءجيى سىناتىنىنا شاعىمداندى
وسكەمەن. KAZINFORM - شىعىس قازاقستاندا كوپقاباتتى ۇيلەردەگى ليفتتەردىڭ ۇشتەن ءبىرى ابدەن توزعان. ال جارتىسىنا جۋىعىنىڭ جۇمىس ىستەپ تۇرعانىنا 25 جىلدان اسىپ كەتتى. قايتا-قايتا سىناتىن ليفتتەر اسىرەسە جوعارعى قاباتتاردا تۇراتىن زەينەتكەرلەرگە قورعاسىنداي اۋىرتپالىق تيگىزگەن.
«ليفتىڭ ىستەگەنىنەن سىنعانى كوپ»
وسكەمەندە انتون چەحوۆ كوشەسىندەگى كوپقاباتتى ۇيدە تۇراتىن زەينەتكەر ليفتتىڭ تىم ءجيى ىستەن شىعاتىنىن ايتتى.
- ءبىزدىڭ ءۇي دە، ليفت تە ەسكى. ءوزىمنىڭ وسىندا تۇرىپ جاتقانىما 49 جىل بولدى. وسى جارتى عاسىر ىشىندە ليفت ءبىر دە بىر رەت الماستىرىلعان جوق. تەك تروسى عانا اۋىستىرىلدى. سوندىقتان اپتاسىنا 2 رەت سىنىپ تۇرادى. بۇزىلعان سايىن ليفت جوندەيتىندەردى ءوز قاراجاتىمىزعا شاقىرامىز. ال سوڭعى ۋاقىتتا ىلعى ءوشىپ قالىپ ءجۇر. سەگىزىنشى قاباتتا تۇراتىن ماعان بۇل وتە قيىن. جاسىم بولسا 68 گە كەلدى، - دەيدى ۆاسيلي پاۆلوۆ(ءوز سۇراۋى بويىنشا اتى-ءجونى وزگەرتىلىپ بەرىلدى).
ال سلاۆسكي كوشەسىندەگى ءۇيدىڭ 5-قاباتىندا تۇراتىن زەينەپ ماقسۇتوۆا ليفت سىنىپ قالعاندا دالاعا شىعۋدان قالاتىنىن جەتكىزدى.
- ونسىز دا جاسىم كەلگەندىكتەن ءجۇرىس- تۇرىسىم قيىندادى. ال باسپالداقپەن كوتەرىلىپ-
ءتۇسۋ دەگەن مەن ءۇشىن ناعىز بەينەت. ليفتىڭ ىستەگەنىنەن سىنعانى كوپ، - دەيدى جاسى جەتپىستەن اسقان كەيۋانا.
تۇرعىندار ءوز قاراجاتىنا جوندەتۋى ءتيىس
شىعىس قازاقستانداعى قالالار مەن اۋداندار اكىمدىكتەرىنىڭ اقپاراتىنا سايكەس، ءوڭىر بويىنشا 3700 دەن استام كوپقاباتتى تۇرعىن ءۇي بار. ول ۇيلەردەگى ليفت سانى - 783. وسكەمەن قالاسىندا - 740، ريددەردە - 34، التاي اۋدانىندا - 9 ليفت جۇمىس ىستەپ تۇر.
ونىڭ ىشىندە ىسكە قوسىلعانىنا 25 -جىلدان اسقان ليفت سانى - 380. الماستىرۋدى قاجەت ەتەتىن - 284، جوندەۋدى تالاپ ەتەتىن - 98 ليفت بار. الايدا ش ق و ەنەرگەتيكا جانە تۇكش باسقارماسى ەسكىرگەن ليفتتەردى حالىقتىڭ ءوز قاراجاتىنا جوندەۋى تيىستىگىن ءمالىم ەتتى.
- تۇرعىن ءۇي قاتىناستارى تۋرالى زاڭنىڭ 10-3-بابىنا سايكەس، رەسپۋبليكالىق ماڭىزى بار قالالاردىڭ، استانانىڭ، اۋدانداردىڭ، وبلىستىق ماڭىزى بار قالالاردىڭ جەرگىلىكتى اتقارۋشى ورگاندارى جەرگىلىكتى بيۋدجەت قاراجاتى بولعان كەزدە پاتەر يەلەرىنىڭ اقشانى قايتارۋىن قامتاماسىز ەتۋ شارتىمەن كوپپاتەرلى تۇرعىن ۇيلەردە ليفتتەردى جوندەۋدى جانە اۋىستىرۋدى ۇيىمداستىرۋدى جانە قارجىلاندىرۋدى جۇزەگە اسىرۋعا قۇقىلى. ەرەجەگە قاتىسۋ ءۇشىن تۇرعىندار جينالىس وتكىزىپ، وڭ شەشىم قابىلداۋى قاجەت. وسىدان كەيىن ءبولىم مامانداندىرىلعان ۋاكىلەتتى ۇيىممەن بىرلەسىپ، ءار كوپپاتەرلى تۇرعىن ءۇيدىڭ، ليفتتەردىڭ تەحنيكالىق جاي-كۇيىن تەكسەرۋدى، جۇمىستاردىڭ قۇرامى مەن كولەمىن انىقتاۋدى، تۇرعىن ءۇيدى كۇردەلى جوندەۋ جانە ليفتتەردى زاڭ تالاپتارىنا سايكەس اۋىستىرۋدى ىسكە اسىرادى. ال اعىمداعى جوندەۋ جۇمىستارىن تۇرعىندار تۇراقتى تۇردە ءوز قاراجاتتارىنا جۇرگىزەدى، - دەپ جاۋاپ بەردى باسقارما باسشىنىڭ ورىنباسارى راۋان تۇرىسبەك Kazinform ءتىلشىسىنىڭ رەسمي ساۋالحاتىنا.
دەمەك، كوپقاباتتى ۇيدەگى ءبىر پودەزد تۇرعىندارى جينالىس وتكىزىپ، سوندا ليفتتى اۋىستىرۋ-اۋىستىرماۋدى داۋىسقا سالۋى ءتيىس.
باسىم بولىگى قولداسا وندا وڭ شەشىم شىقتى دەگەن ءسوز. وسى رەتتە، قولداماي داۋىس بەرگەندەر دە زاڭ بويىنشا اقشا جيناۋعا مىندەتتى. ءال ليفتى اۋىستىرۋ شىعىنى شامامەن 12-18 ميلليون تەڭگە ارالىعىندا.
ەسكە سالساق، بۇعان دەيىن قازاقستاندا تاعام، جانارماي، ليفتىگە قاتىستى تەحنيكالىق رەگلامەنت قايتا قارالاتىنىن جازعانبىز.
اۆتور
تالعاتجان مۇحامەتبەك ۇلى
