وسكەمەندە پوليسەيلەر قىزمەتتىك ەمەس كولىكپەن جاسىرىن كامەرا ارقىلى پاترۋلدەۋدى جالعاستىرا ما
وسكەمەن. KAZINFORM - وسكەمەن قالاسىندا ءتارتىپ ساقشىلارى جولداردى قىزمەتتىك ەمەس كولىكپەن جاسىرىن كامەرا ارقىلى پاترۋلدەي باستاعان بولاتىن. Kazinform ءتىلشىسى بۇل جوبانىڭ ارى قاراي جالعاساتىن-جالعاسپايتىنىن ءبىلىپ كوردى.
وسكەمەندە 1-اقپاننان باستاپ سىناق رەجيمىندە كوشە پاترۋلدەۋدىڭ جاڭا ادىسىنە كوشكەن پوليتسەيلەر جۇمىسقا قىزمەتتىك ەمەس كولىكپەن شىققان.
كولىكتىڭ الدىڭعى ورىندىعىنا روبوتقا ۇقسايتىن، جول قوزعالىسى ەرەجەلەرىن بۇزۋ فاكتىلەرىن تىركەيتىن اۆتوماتتى جۇيە ورناتىلدى. جاسىرىن پاترۋلدەۋ ارقىلى جول-كولىك وقيعالارىنىڭ سانى ازايادى دەپ جوسپارلانعان.
- بۇنداعى باستى ماقسات - جۇرگىزۋشىلەردىڭ جول ەرەجەلەرىن ساقتاۋ كورسەتكىشىن جاقسارتۋ. قازىرگى ۋاقىتتا جىلدامدىقتى ارتتىرعانداردى تىركەيتىن ءبىر كولىك جولدا ءجۇر. دەسە دە ەرەجە بۇزعاندار تەك سىناق رەجيمىندە تىركەلدى. جۇرگىزۋشىلەر ءالى جاۋاپكەرشىلىككە تارتىلعان جوق، - دەپ حابارلادى سول كەزدە ش ق و پوليسيا دەپارتامەنتىنەن.
تۇرعىندار اراسىندا بۇل جوبانى قولدايتىندارىن دا، داتتايتىندار دا كەزدەستى. ءبىرى سونىڭ ناتيجەسىندە جولدا ءتارتىپ كۇشەيەدى دەسە، باسقالارى حالىققا جاپپاي ايىپپۇل سالىنا باستاي ما دەپ ۇرەيلەنەدى.
جوبا جالعاسا ما؟
جاسىرىن پاترۋلدەۋدىڭ ارى قاراي جالعاساتىنىن نەمەسە وسىمەن توقتايتىنىن ءبىلۋ ءۇشىن Kazinform ءتىلشىسى پوليسياعا رەسمي ساۋالحات جولدادى.
- وسكەمەن قالاسىنىڭ اۋماعىندا سىناق رەجيمىندە «جاسىرىن پاترۋلدەۋ» جۇمىسى جالعاسىپ جاتىر. قازىرگى ۋاقىتتا جىلدامدىقتى ارتتىرعان كولىكتەردى تىركەۋ قۇرىلعىسى بار ءبىر اۆتوكولىك كوشەدە ءجۇر. ءبىرىنشى توقساننىڭ سوڭىنا دەيىن وبلىس بويىنشا مۇنداي پاترۋلدەردىڭ سانىن 4 كە دەيىن ۇلعايتۋ كوزدەلىپ وتىر، - دەپ جاۋاپ بەردى شىعىس قازاقستان وبلىستىق پوليتسيا دەپارتامەنتىنىڭ باستىعى ەرلان وماربەكوۆ.
الايدا ازىرگە بۇل جوبانىڭ كورسەتكىشتەرى جاريا ەتىلمەدى. كولىكتەر سانىنىڭ كوبەيتىلىپ جاتقانىنا قاراعاندا جاسىرىن پاترۋلدەۋ الداعى ۋاقىتتا دا جالعاسا بەرەتىن سەكىلدى.
