وسكەمەندە سۋعا باتىپ بارا جاتقان 5 جاسار بالانى ستۋدەنت قۇتقارىپ قالدى

وسكەمەن. KAZINFORM - وسكەمەن قالاسىندا اتا-اناسىنىڭ قاراۋىنسىز قالعان ءبۇلدىرشىن سۋعا اعىپ كەتە جازدادى.

ش ق و توتەنشە جاعدايلار دەپارتامەنتىنىڭ مالىمەتىنە سۇيەنسەك، وقيعا قالاداعى ءۇلبى وزەنىندە بولعان. ەراسىل ومارحانوۆ سۋعا باتىپ بارا جاتقان بالانى كەزدەيسوق كورىپ قالىپ، دەرەۋ كومەككە ۇمتىلعان. وسىلايشا، ول سىن ساعاتتا ابدىراپ قالماي، قارشاداي بالانى اجالدان اراشالاپ قالدى.

- بەلگىلى بولعانداي، ءبۇلدىرشىن اپكەسىمەن وزەن جاعاسىندا ويناپ جۇرگەن. كەنەت سۋعا قۇلاپ، اعىن ونى الىپ كەتە جونەلدى. ەراسىل دەر كەزىندە كومەككە كەلىپ جەتكەن، - دەلىنگەن اقپاراتتا.

ەراسىل ومارحانوۆ وسكەمەندەگى قازاقستان- امەريكالىق ەركىن ۋنيۆەرسيتەتىنىڭ ستۋدەنتى.

- ءوزىمدى ەرلىك جاسادىم دەپ سانامايمىن. مەنىڭ ورنىمدا بولسا كەز كەلگەن ادام وسىلاي ىستەر ەدى، - دەيدى ول.

وسى رەتتە، ش ق و ت ج د اتا-انالاردان بالالارىن سۋ جاعاسىندا قاراۋسىز قالدىرماۋدى سۇرايدى.

ەسكە سالساق، وسىعان دەيىن پاۆلوداردا ءورت سوندىرۋشىلەردىڭ جالىن ىشىنەن 3 بالانى قۇتقارعانى جايلى جازعانبىز.

اۆتور

تالعاتجان مۇحامەتبەك ۇلى