وسكەمەندە كوشەدە ايەلىن پىشاقتاپ جاتقان قاسكويگە قارسى تۇرعان جىگىت ماراپاتتالدى
وسكەمەن. KAZINFORM - وسكەمەن قالاسىندا كوشەدە ايەلىن پىشاقتاپ جاتقان قاسكويدى كورگەن جىگىت ەش ويلانباستان كومەككە ۇمتىلعان. ونى قارۋسىزداندىرىپ، پوليتسەيلەر كەلىپ جەتكەنشە ۇستاپ تۇرعان. وسىلايشا، ايەل ادامدى امان الىپ قالعان ول بۇل ەرلىگى ءۇشىن ماراپاتتالدى.
وقيعا وسى جىلدىڭ جازىندا بولعان. قازاقستان- امەريكاندىق ەركىن ۋنيۆەرسيتەتىنىڭ 3-كۋرس ستۋدەنتى الماس ەلەمەس وسكەمەندەگى ءدامحانالاردىڭ بىرىندە كۋرەر بولىپ جۇمىس ىستەپ جۇرگەن. تۇندە كوشەدە تاپسىرىستى اپارا جاتقاندا كومەك سۇراپ ايقايلاعان داۋىستى ەستىپ قالادى. الماستىڭ قاسىندا تاعى بىرنەشە كۋرەر جىگىت بولعان.
«سول كەزدە ولار كوشەدە ۇشى قانعا بويالعان پىشاق ۇستاپ تۇرعان ەر ادامدى كوردى. ول بۇرىن ازاماتتىق نەكەدە بولعان ايەلىن ۇرىپ، پىشاق سۇعىپ جىبەرگەن. ءبىر سەكۋند تا ويلانباستان كومەككە ۇمتىلعان الماس ماس جانە اگرەسسيۆتى قاسكويدى قارۋسىزداندىرىپ، پوليتسيا كەلگەنگە دەيىن ۇستاپ تۇردى»، - دەپ حابارلادى قالا پروكۋراتۋراسىنىڭ باسپا ءسوز قىزمەتى.
اۋىر جاراقات العان ايەل دەر كەزىندە دارىگەرلەرگە جەتكىزىلگەندىكتەن امان قالدى. بەلگىلى بولعانداي، وعان شابۋىل جاساعان ادام بىرنەشە رەت سوتتالعان، قاۋىپتى رەتسيديۆيست. ول كىسى ولتىرۋگە وقتالعانى ءۇشىن سوت شەشىمىمەن كىنالى دەپ تانىلىپ، قاتاڭ رەجيمدەگى كولونياعا 10 جىلعا قامالدى.
«الماس ەلەمەس ءوز ومىرىنە قاۋىپ تونسە دە باسقا ادامدى قۇتقارۋدان تايىنبادى. ونىڭ باتىل ارەكەتى زور قۇرمەتكە لايىق جانە باسقالارعا ۇلگى. قالا پروكۋراتۋراسى الماسقا شىن جۇرەكتەن العىس بىلدىرەدى. بۇل جاعداي ناعىز باتىرلاردىڭ ءبىزدىڭ ارامىزدا جۇرگەنىن كورسەتتى»، - دەلىنگەن اقپاراتتا.
بەيبىت كۇننىڭ باتىرىنا وسكەمەن قالاسى پروكۋرورىنىڭ اتىنان العىس حات تابىس ەتىلدى.
اۆتور
تالعاتجان مۇحامەتبەك ۇلى
