وسكەمەندە «التايدان ورالعا دەيىن» ۆەلوشەرۋى باستالدى
وسكەمەن. KAZINFORM - بۇگىن وسكەمەن قالاسىنداعى تاۋەلسىزدىك مونۋمەنتى جانىندا جۇمىسشى ماماندىقتار جىلىنا ارنالعان «التايدان ورالعا دەيىن» رەسپۋبليكالىق ۆەلوشەرۋدىڭ سالتاناتتى اشىلۋ ءراسىمى ءوتتى. بۇل تۋرالى تۋريزم جانە سپورت مينيسترلىگىنىڭ باسپا ءسوز قىزمەتى حابارلادى.
ءىس-شاراعا شىعىس قازاقستان وبلىسى اكىمىنىڭ ورىنباسارى ەربول نۇرعاليەۆ، دەنە شىنىقتىرۋ جانە سپورت سالاسىنىڭ وكىلدەرى، كوللەدج وقىتۋشىلارى مەن ستۋدەنتتەرى قاتىستى.
اتالعان ۆەلوشەرۋگە 236 ۆەلوشاباندوز جانە وسكەمەندەگى تەحنيكالىق جانە كاسىپتىك ءبىلىم بەرۋ ۇيىمدارىنىڭ 200 دەن استام ستۋدەنتى قاتىسىپ جاتىر. ءىس-شارا جۇمىسشى ماماندىقتاردى ناسيحاتتاۋ، ەڭبەككە دەگەن قۇرمەتتى قالىپتاستىرۋ جانە سالاۋاتتى ءومىر سالتىن دارىپتەۋ ماقساتىندا ۇيىمداستىرىلدى.
شەرۋ باعىتى ەلىمىزدىڭ سەگىز ءوڭىرىن قامتيدى: شىعىس قازاقستان، اباي، پاۆلودار وبلىستارى، استانا قالاسى، سونداي-اق اقمولا، قوستاناي، اقتوبە جانە باتىس قازاقستان وبلىستارى. ۆەلوشەرۋ 8 - ماۋسىمدا مارەسىنە جەتەدى دەپ جوسپارلانعان.
