وسكەمەندە 37 كوپقاباتتى ءۇي اپاتتى جاعدايدا تۇر
وسكەمەن. KAZINFORM - وسكەمەن قالاسىنىڭ تۇرعىندارى ۇيلەرىنىڭ اپاتتى جاعدايدا تۇرعانىنا، ماسەلەنىڭ تالاي جىلدان بەرى شەشىلمەي كەلە جاتقانىنا شاعىمداندى.
«ءۇيىمىز ءبىر دە بىر رەت جوندەلمەدى»
وسكەمەننىڭ سول جاعالاۋىندا كوپقاباتتى ۇيلەر قارقىندى سالىنىپ جاتقانىمەن، وڭ جاعالاۋدا قيمىل-قوزعالىس جوق. سونىڭ سالدارىنان جىل وتكەن سايىن ۇيلەر ەسكىرىپ، توزىپ بارادى. كەيبىر ۇيلەر اپاتتى جاعدايعا دا تۇسكەن.
- ستاحانوۆسكايا كوشەسىندەگى ەكىقاباتتى ۇيدە تۇرىپ كەلە جاتقانىمىزعا 15 جىل بولدى. وسى ۋاقىت ىشىندە بىردە-ءبىر رەت جوندەلمەدى. 1946 -جىلى سالىنعان ءۇيىمىز رەسمي تۇردە اپاتتى دەپ تانىلعان. وپىرىلىپ تۇسە باستاعان سىرتى دا، ءوڭى قاشقان ءىشى دە ابدەن توزىپ تۇر. ءتىپتى ۇن سياقتى ۇگىتىلىپ بارادى، - دەيدى تۇرعىندار.
قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ مالىمەتىنە سۇيەنسەك، بۇگىندە شاھار بويىنشا بارلىعى 1804 كوپپاتەرلى تۇرعىن ءۇي بار.
ونىڭ ىشىندە:
453 ءۇي - 1960 -جىلعا دەيىن؛
450 ءۇي - 1960-1970 -جىلدارى؛
173 ءۇي - 1971-1975 -جىلدارى؛
167 ءۇي - 1976-1980 -جىلدارى؛
169 ءۇي - 1981-1986 -جىلدارى؛
157 ءۇي - 1986-1990 -جىلدارى؛
57 ءۇي - 1991-1995 -جىلدارى؛
14 ءۇي - 1996-2000 -جىلدارى؛
27 ءۇي - 2001-2006 -جىلدارى؛
28 ءۇي - 2006-2010 -جىلدارى؛
33 ءۇي - 2011-2015 -جىلدارى؛
54 ءۇي - 2016-2020 -جىلدارى؛
22 ءۇي - 2021-2025 -جىلدارى سالىنعان.
جاڭا پاتەرلەر بەرىلەدى
وسكەمەندەگى كوپقاباتتى ۇيلەردىڭ باسىم كوپشىلىگى كىرپىشتى جانە پانەلدى ۇيلەر. ەڭ ەسكى ۇيلەر 1930 -جىلى سالىنعان. 10 كوپقاباتتى ءۇيدىڭ توزىعى جەتكەن، ال 37 سى اپاتتى جاعدايدا دەپ تانىلدى. وسى جاعدايعا قاتىستى اكىمدىكتىڭ جاۋابىن ءبىلىپ كوردىك.
- 2024-2029 -جىلدارعا ارنالعان جوندەۋ باعدارلاماسى اياسىندا جاعداي بىرتە- بىرتە رەتكە كەلتىرىلمەك. باعدارلامانىڭ نەگىزگى ماقساتى - قالاداعى تۇرعىن ۇيلەردىڭ جاپپاي توزۋىنا جول بەرمەۋ. تۇرعىن ۇيلەردىڭ يەلەرىنە بىردەي كولەمدەگى، ءبىراق ءبىر بولمەلى پاتەردەن كىشى ەمەس جاڭا پاتەرلەر بەرىلەدى. ال تۇرعىن ەمەس ءۇي- جايلاردىڭ يەلەرىنە ولاردىڭ قۇنى وتەلەدى، - دەپ جاۋاپ بەردى اكىمدىكتەن.
ەڭ الدىمەن اپاتتى جاعدايداعى ۇيلەردىڭ يەلەرى كوشىرىلمەك. ال جاعدايى مۇشكىل بولسا ءدا الى اپاتتى دەپ تانىلماعان ۇيلەر بولسا ولاردىڭ يەلەرى ءوز اقشالارىنا ساراپتاما جاساتۋى ءتيىس.
- تۇرعىن ءۇيدى اپاتتى دەپ تانۋ ءۇشىن مەنشىك يەلەرى عيماراتتار مەن قۇرىلىستاردىڭ سەنىمدىلىگى مەن ورنىقتىلىعىنا تەحنيكالىق ساراپتاما جۇرگىزۋ قۇقىعىنا ءتيىستى سەرتيفيكاتى بار ساراپشىعا نەمەسە شتاتىندا اتتەستاتتالعان ساراپشىلار جۇمىس ىستەيتىن اككرەديتتەلگەن ۇيىمعا حابارلاسۋى قاجەت، - دەپ ءتۇسىندىردى ۆەدوستۆو وكىلدەرى.
ەسكە سالساق، بۇعان دەيىن وسكەمەن تۇرعىندارىنىڭ جولعا تۇز سەبۋگە قارسى تالاپ ارىزىن سوت قاناعاتتاندىرماعانى حابارلانعان.
اۆتور
تالعاتجان مۇحامەتبەك ۇلى
