وسكەلەڭ ۇرپاقتىڭ بوس ۋاقىتىن ءتيىمدى وتكىزۋ قاجەت - پرەزيدەنت

پرەزيدەنت وسكەلەڭ ۇرپاققا ايرىقشا نازار اۋدارۋدى دا - حالىق كەڭەسىنىڭ مىندەتى دەپ اتادى.

وقۋشىلار مەن ستۋدەنتتەر ساباقتان تىس ۋاقىتتا سپورتپەن شۇعىلدانۋ، جاڭا ءبىلىم يگەرۋ، كىتاپ وقۋ سەكىلدى كوكجيەگىن كەڭەيتەتىن جاسامپاز ىستەرگە دەن قويۋعا ءتيىس.

— ول ءۇشىن كىتاپحانا، مۋزەي، مەكتەپ، دوستىق ۇيلەرى، ساياباقتار سياقتى قولدا بار ينفراقۇرىلىمدى بارىنشا جۇمىلدىرۋ كەرەك. سونىمەن قاتار باسقا دا قوعامدىق نىسانداردى كوبەيتكەن ءجون، — دەدى قاسىم-جومارت توقايەۆ.

مۇنى تەك ۇلكەن قالالاردا عانا قولعا الماي، شاعىن شاھارلار مەن اۋدان ورتالىقتارىنا، اۋىلدارعا باسا نازار اۋدارۋ ماڭىزدى.

— قوعامدىق ورتانىڭ ساپاسى ادامنىڭ تۇرعىلىقتى جەرىنە بايلانىستى بولماۋعا ءتيىس. ۇكىمەتكە اكىمدىكتەرمەن جانە ءتيىستى مەملەكەتتىك ورگاندارمەن بىرىگىپ، وسى ماسەلەگە قاتىستى ناقتى ۇسىنىستار دايىنداۋدى تاپسىرامىن، — دەدى مەملەكەت باسشىسى.

سونىمەن بىرگە، حالىق كەڭەسى مەملەكەت پەن جەكەمەنشىك سەرىكتەستىگى تەتىگىن ناقتى ىستە قولدانۋ ماسەلەسىنە نازار اۋدارۋى كەرەك.

— مادەنيەت پەن كرەاتيۆتى يندۋستريا سالاسىنداعى جوبالاردى ۇزاق ۋاقىت بويى قارجىلاندىرۋعا مۇمكىندىك بەرۋ ءۇشىن ەنداۋمەنت قورلار تۋرالى زاڭناماعا وزگەرىس ەنگىزۋ قاجەت. باسقاشا ايتقاندا، ءبىز ازاماتتارىمىزدىڭ قوعام ومىرىنە جان-جاقتى اتسالىسۋىنا بارىنشا جاعداي جاساۋعا ءتيىسپىز. ويتكەنى ۇلكەن وزگەرىستەر كىشكەنە قادامداردان باستالادى. ۇلت پەن ادامي كاپيتالدىڭ جاڭا ساپاسى ءدال وسىلاي قالىپتاسادى، — دەدى ق. توقايەۆ.