ورىس تىلىندەگى سپەكتاكل بالالارعا قازاق ءتىلىن ۇيرەتە الا ما؟

وبلىستىق قۋىرشاقتار تەاترى جىل ايرىعىندا كىشكەنتاي كورەرمەندەرگە «قازاق ءتىلىن بىرگە ۇيرەنەمىز» سپەكتاكلىنىڭ پرەمەراسىن ۇسىندى.

بالالار اقىلدى قويان بەكا جانە جالقاۋ قونجىق بوريامەن بىرگە ورمان مەكتەبىندە قازاق ءتىلىنىڭ قىزىقتى ساباعىنا قاتىسىپ، قازاق ءتىلىن ۇيرەنۋ قاجەتتىلىك قانا ەمەس، سونىمەن بىرگە وتە قىزىقتى ءارى تانىمدى ەكەنىن تۇسىنەدى. دانا ۇستاز اقىلباي اقىلباي ۇلى ءازىل مەن كوڭىلدى اندەر، تارتىمدى ويىندار ارقىلى بالالارعا قازاق تىلىندەگى ماڭىزدى سوزدەر مەن سويلەمدەردى ۇيرەتەدى. سپەكتاكل مەكتەپكە دەيىنگى جانە باستاۋىش مەكتەپ جاسىنداعى بالالارعا ارنالعان ينتەراكتيۆتى باعىتتا ازىرلەنگەن.

قۋىرشاق تەاترىنىڭ پرەمەراسىنا ءبىز دە باردىق. بالالارمەن بىرگە باستان اياق تاماشالادىق. سپەكتاكل قازاق ءتىلدى كورەرمەنگە ارنالماعان. ءتىل ۇيرەنەمىن دەپ ىنتالانعان ورىس ءتىلدى بۇلدىرشىندەرگە ارنالعان بولۋى كەرەك. سەبەبى دەنى ورىس تىلىندە. تەك قازاق ءتىلىن ۇيرەنۋ ءۇشىن كەيبىر سوزدەردىڭ اۋدارماسىن ايتا وتىرىپ، ساباق وتكەندەي قايتالاۋ ارقىلى ساناعا قۇيادى. ودان بالعىندار قانشالىقتى ءتىل ۇيرەنەرى مەن ءۇشىن بەلگىسىز. ءبىراق اۋدارمالاردى كورەرمەن بالعىندار قايتالاپ قوسىلىپ وتىردى.

قازاقىلىقتىڭ ءيىسى دە جوق. سول باياعى ورىسشا سارىن. ورمان ءىشى، ايۋ مەن قويان، وقىتۋشىنى مەن ورىستىڭ سوۆا (ۇكى) بەينەسىندە ەلەستەتتىم. ەكى تىلدە ارالاستىرىپ سويلەۋ بىزگە ۇيرەنشىكتى بولىپ كەتكەندەي. اتاۋى قازاقشا بولعانىمەن زاتى ورىسشا وتەتىن سپەكتال بالالارعا قازاق ءتىلىن ۇيرەتە الا ما؟ مۇمكىن ورىس ءتىلدى بالا ءۇشىن قاراپايىم سوزدەردى ۇيرەنۋگە بولار. ال قازاق بالاسى كەرىسىنشە ورىسشا سويلەپ شىعاتىنى ءسوزسىز. قاسىما ەرتىپ اپارعان ورىسشاعا شورقاق مەنىڭ 6 جاسار قىزىم كۇلگىن ءتۇسىتىڭ فيولەتوۆىي ەكەنىن ءبىلىپ شىقتى.

سپەكتاكلدىڭ قويۋشى-رەجيسسەرى اناستاسيا سەريكوۆا، قويۋشى-سۋرەتشى الەكساندرا كراۆتسوۆا، ال مۋزىكالىق كوركەمدەۋشى اندرەي كوروتچەنكو. بۇل كىسىلەرمەن كەزدەسۋدىڭ ءساتى تۇسپەدى. ال باستى بەينە مۇعالىمدى سومداعان عابيت قىزىروۆتىڭ بۇل ورىس تىلىندە ويناپ شىققان العاشقى ءرولى ەكەن. وڭاي بولمادى دەيدى. ءبىراق ءساتتى الىپ شىقتى. ال سپەكتاكل بالا ساناسىنا ساڭىلاۋ بولا الدى ما دەگەن ساۋالدى تەاتر ۇجىمى وزدەرىنە قويۋلارى كەرەك سياقتى. «بۇل قازاقشا قويىلىم با، الدە قالاي؟» دەگەن ساۋال ءبىزدىڭ كوكەيىمىزدە تۇردى.

ايتولقىن ايقاداموۆا

kostanaytany.kz