ورىس مەملەكەتى يمپەرياعا قاشان اينالدى؟
استانا. قازاقپارات - بىتىراڭقى ورىس جەرلەرىنىڭ ماسكەۋ اينالاسىندا بىرىگۋى XIV-XV عاسىرلاردا ءجۇردى. سول بىرىگۋ ارقىلى ورىستار XV عاسىردىڭ 80-جىلدارىنا قاراي تاتار-موڭعول ەزگىسىنەن تولىعىمەن بوسادى.
مۇنان كەيىنگى عاسىرلاردا ورىس مەملەكەتى كورشىلەس اۋماقتاردى باسىپ الىپ، ءوزىنىڭ قۇرامىنا قوسۋ ساياساتىن جۇرگىزدى. سونىڭ ناتيجەسىندە 1721 -جىلدان باستاپ ورىس مەملەكەتى يمپەريا دەپ اتالا باستادى.
1722 - جىلى ەلدىڭ وڭتۇستىك شەكارالارىن نىعايتۋ ماقساتىندا I پەتر كاۆكاز بەن يرانعا جورىعىن باستادى. ناتيجەسىندە كاسپي تەڭىزىنىڭ باتىس جانە وڭتۇستىك جاعالاۋى رەسەي قۇرامىنا ەنگىزىلدى. XIX عاسىردىڭ باسىندا ءوزىنىڭ قۇرامىنا بالتىق تەڭىزىنىڭ شىعىس جاعالاۋىن، پولشا مەن بەسسارابيانى، كاۆكاز سىرتىن قوسۋ ارقىلى ءوز اۋماعىن ودان ءارى كەڭەيتە ءتۇستى. بۇل يمپەريانىڭ XX عاسىرداعى جاڭا تاريحى 1917 - جىلى قازان توڭكەرىسىنەن باستاۋ الدى. قۇلاعان يمپەريا ورنىندا پايدا بولعان كەڭەستەر وداعى تاريحي قالىپتاسقان گەوساياسي كەڭىستىكتى قالپىنا كەلتىرۋمەن بىرگە، ونى كورشىلەس اۋماقتار ەسەبىنەن كەڭەيتە ءتۇستى. بۇل ءۇردىس ت م د ەلدەرى تاۋەلسىزدىك العانعا، ياعني 1991 - جىلعا دەيىن جالعاستى.
