ورتالىق ازيادا ءبىرىڭعاي جوعارى ءبىلىم كەڭىستىگى قالىپتاسىپ كەلەدى - قاسىم- جومارت توقايەۆ
استانا. KAZINFORM - قاسىم-جومارت توقايەۆتىڭ ايتۋىنشا، قازاقستان ءبىلىم بەرۋ، عىلىم، مادەنيەت جانە ادامي كاپيتالدى دامىتۋ سالالارىنداعى بەسجاقتى ىنتىماقتاستىقتى كەڭەيتۋدى ءاردايىم قۇپتايدى. قازىرگى ۋاقىتتا ورتالىق ازيادا ءبىرىڭعاي جوعارى ءبىلىم كەڭىستىگى قالىپتاسىپ كەلەدى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
- بۇگىندە قازاقستاندا ايماقتاعى ەلدەردەن كەلگەن 9 مىڭعا جۋىق ستۋدەنت ءبىلىم الادى. ءبىز ورتالىق ازيا جاستارىنىڭ ەلىمىزدە جوعارى ءبىلىم الۋعا ۇمتىلىسىن باعالايمىز. وسى كۇنى ەلىمىز ا ق ش، ەۋروپا، قىتاي، رەسەي جانە وڭتۇستىك كورەيانىڭ ونداعان تانىمال ۋنيۆەرسيتەتتەرىمەن ستراتەگيالىق سەرىكتەستىك ورناتتى. قازاقستاننىڭ كوپتەگەن ايماعىندا شەتەلدىك وقۋ ورىندارىنىڭ فيليالدارى جۇيەلى تۇردە اشىلىپ، ستۋدەنتتەردى بەلسەندى قابىلداي باستادى. بۇعان قوسا قازاقستاندا زەرتتەۋ ۋنيۆەرسيتەتتەرىنىڭ سانى ارتىپ، تەحنوپاركتەر مەن ينجەنەرلىك ورتالىقتار ىسكە قوسىلىپ جاتىر. ءبىز ورتالىق ازيا جانە كاۆكاز ەلدەرىنىڭ جاستارىن وسى مۇمكىندىكتى پايدالانىپ، حالىقارالىق دەڭگەيدە سۇرانىسقا يە قوس ديپلومدى ءبىلىم الۋعا شاقىرامىز، - دەدى مەملەكەت باسشىسى.
قاسىم-جومارت توقايەۆ اقپاراتتىق-ساراپتامالىق سالاداعى ىقپالداستىقتى جانداندىرۋ قاجەت ەكەنىنە نازار اۋداردى. مەملەكەت باسشىسى بىرلەسكەن مەدياونىمدەردى شىعارۋ جۇمىستارىن قولعا الۋ جونىندە ۇكىمەتتەرگە تاپسىرما بەرۋدى ۇسىندى.
- ورتاق تاريحي سيۋجەتتەردى ەكرانيزاتسيالاۋعا، حالىقتارىمىزدىڭ دوستىعى مەن ىنتىماعىن دارىپتەۋگە ەرەكشە ءمان بەرۋ كەرەك. ءبىز جالپى وڭىرلىك تەلەارنا جانە اقپاراتتىق ينتەرنەت- پورتالىن اشۋ ماسەلەسىن تالقىلادىق. بۇل رەتتە ورتالىق ازيا ەلدەرىنىڭ تەلەحابار تاراتۋ سالاسىنداعى ىنتىماقتاستىعى تۋرالى كەلىسىمدى ازىرلەپ، قول قويۋدىڭ ماڭىزى زور، - دەدى قاسىم- جومارت توقايەۆ.
سونداي-اق پرەزيدەنت قازاقستاننىڭ وڭىرلىك سەرىكتەستىكتى جان-جاقتى نىعايتۋدى جانە ورتالىق ازيانىڭ الەمدىك ارەناداعى ءرولىن ارتتىرۋدى كوزدەيتىن ستراتەگيالىق باعدارى وزگەرمەيتىنىن اتاپ ءوتتى.
- ءبىز ۇلتتىق دەڭگەيدە «تابىستى ورتالىق ازيا - تابىستى قازاقستان» فورمۋلاسىن بەرىك ۇستانامىز. ءوڭىرىمىزدىڭ بولاشاعى تەك ەلدەرىمىز اراسىنداعى سەنىمدى ديالوگ پەن ىنتىماقتاستىققا، بارلىق ىشكى جانە سىرتقى سىن-قاتەرلەرگە لايىقتى جاۋاپتى بىرلەسىپ ىزدەۋگە بايلانىستى ەكەنىنە سەنىمدىمىن، - دەدى قازاقستان پرەزيدەنتى.
جيىن سوڭىندا مەملەكەت باسشىسى وزبەكستان پرەزيدەنتى شاۆكات ميرزيەۆكە كونسۋلتاتيۆتىك كەزدەسۋدىڭ كەلەسى ءتوراعالىق مىندەتىن تابىستى اتقارۋىنا تىلەكتەستىك ءبىلدىردى.
كونسۋلتاتيۆتىك كەزدەسۋدە قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيەۆ ءسوز سويلەدى.
اۆتور
باقىتگۇل اباي قىزى
