ورتالىق ازيا - ەۋروپا وداعى سامميتىنە قاتىسۋشىلار Aral Culture Summit كورمەسىن تاماشالادى
تاشكەنت. KAZINFORM - اقوردا «ورتالىق ازيا - ەۋروپا وداعى» سامميتىنە قاتىسۋشىلاردىڭ Aral Culture Summit كورمەسىن تاماشالاعانىن جازدى.
قازاقستان پرەزيدەنتى قاسىم-جومارت توقايەۆ، وزبەكستان پرەزيدەنتى شاۆكات ميرزيەيەۆ، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، ەۋروپالىق كەڭەس پرەزيدەنتى انتونيۋ كوشتا، ەۋروپالىق كوميسسيا پرەزيدەنتى ۋرسۋلا فون دەر ليايەن كليمات كونفەرەنسياسىنان كەيىن Aral Culture Summit كورمەسىن ارالاپ كوردى.
اتالعان الاڭدا ارال ەكوجۇيەسىن قالپىنا كەلتىرۋگە، ايماقتىڭ مادەني مۇراسىن ساقتاۋعا جانە ورنىقتى دامۋىنا ىقپال ەتۋگە باعىتتالعان باستامالار كورىنىس تاپقان.
ۆيزۋالدى، سەنسورلى جانە ينتەراكتيۆتى تاسىلدەر ارقىلى ۇسىنىلعان ەكسپوزيتسيا ارال ماڭىنداعى باي تابيعات پەن مادەنيەت جايىندا سىر شەرتەدى.
ايتا كەتەيىك، بۇگىن وزبەكستاننىڭ سامارقاند قالاسىندا «ورتالىق ازيا - ەۋروپا وداعى» فورماتىنداعى العاشقى سامميتى ءوتتى.
بۇرىن حابارلاعانىمىزداي، كەشە پرەزيدەنت قاسىم-جومارت توقايەۆ وزبەكستانعا جۇمىس ساپارىمەن كەلدى. ونىڭ بارىسىندا مەملەكەت باسشىسى ەۋروپالىق كەڭەس پرەزيدەنتى انتونيۋ كوشتا، ەۋروپالىق كوميسسيا پرەزيدەنتى ۋرسۋلا فون دەر ليايەن، ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسومەن ەكىجاقتى كەزدەسۋلەر وتكىزدى.
