«ورتالىق ازيا-قىتاي» سامميتى باستالدى

استانا. KAZINFORM - ەلورداداعى تاۋەلسىزدىك سارايىندا «ورتالىق ازيا-قىتاي» Ⅱ سامميتى جۇمىسىن باستادى.

ءىس-شاراعا مەملەكەت باسشىسى قاسىم-جومارت توقايەۆ، ق ح ر ءتوراعاسى شي جينپيڭ، وزبەكستان پرەزيدەنتى شاۆكات ميرزيەۆ، قىرعىزستان پرەزيدەنتى سادىر جاپاروۆ، تۇرىكمەنستان پرەزيدەنتى سەردار بەردىمۇحامەدوۆ جانە تاجىكستان پرەزيدەنتى ەمومالي راحمون قاتىسىپ وتىر.

ايتا كەتەرلىگى، «ورتالىق ازيا-قىتاي» 1- سامميتى 2023 -جىلدىڭ 19-مامىرىندا قىتايدىڭ شيان قالاسىندا ءوتتى. سول كەزدە قاسىم-جومارت توقايەۆ ورتالىق ازيا مەن قىتايدىڭ ەكىنشى سامميتىن قازاقستاندا وتكىزۋگە ءازىر ەكەنىن جەتكىزدى. سامميت قورىتىندىسىندا شيان دەكلاراتسياسىنا قول قويىلىپ، ەكىنشى سامميتتى 2025 -جىلى قازاقستان وتكىزۋ تۋرالى شەشىم قابىلداندى.

Ⅱ سامميت قارساڭىندا، كەشە ەلوردادا قازاقستان مەن قىتاي اراسىنداعى ىقپالداستىققا تىڭ سەرپىن بەرەتىن ءبىرقاتار ماڭىزدى ءىس-شارا ۇيىمداستىرىلدى. اتاپ ايتقاندا، ورتالىق ازيا - قىتاي: ەنەرگەتيكا» فورۋمى ءوتتى.

وندا قىتاي كومپانيالارىنىڭ قاتىسۋىمەن ەلىمىزدە جاڭارتىلاتىن ەنەرگيا بويىنشا 30 جوبا جۇزەگە اسىرىلىپ جاتقانى ايتىلدى.

ال «ورتالىق ازيا - قىتاي» ەكىنشى يندۋستريالىق-ينۆەستيتسيالىق ىنتىماقتاستىق فورۋمىندا قازاقستان مەن قىتاي جالپى سوماسى 25 ميلليارد ا ق ش دوللارىنا جۋىق شامامەن 60 ءتۇرلى كەلىسىمگە قول قويدى.

مۇنان بولەك، قىتاي مەن ورتالىق ازيانىڭ «تاتۋ كورشىلىك جانە دوستىق: بولاشاققا بىرگە قادام» اتتى گۋمانيتارلىق الماسۋ فورۋمى ۇيىمداستىرىلدى.

بۇگىن «ورتالىق ازيا - قىتاي» ىسكەرلىك كەڭەسىنىڭ ەكىنشى وتىرىسى ءوتىپ جاتىر.

اۆتور

مارلان جيەمباي