ورتالىق ازيا ەلدەرىنىڭ ارناۋلى قىزمەتتەرى باسشىلارى تاشكەنتتە نە تالقىلادى
تاشكەنت. KAZINFORM - تاشكەنتتە ورتالىق ازيا ەلدەرىنىڭ ارناۋلى قىزمەتتەرى باسشىلارىنىڭ العاشقى كەزدەسۋى ءوتتى. بۇل تۋرالى وزبەكستان مەملەكەتتىك قاۋىپسىزدىك قىزمەتى حابارلادى.
اتالعان شارا وزبەكستاننىڭ ورتالىق ازيا مەملەكەتتەرى باسشىلارىنىڭ VII كونسۋلتاتيۆتىك كەزدەسۋىنە ءتوراعالىعى اياسىندا ۇيىمداستىرىلعانى اتاپ ءوتىلدى. شارانىڭ اشىلۋىندا پرەزيدەنت شاۆكات ميرزيەۆتىڭ قاتىسۋشىلارعا جولداۋى وقىلدى. ورتالىق ازيا ەلدەرىنىڭ ارناۋلى قىزمەتتەرىنىڭ ديالوگى وڭىرلىك قاۋىپسىزدىكتى قامتاماسىز ەتۋدىڭ بىرلەسكەن تاسىلدەرى مەن ءتيىمدى تەتىكتەرىن ازىرلەۋگە قىزمەت ەتەتىنى اتاپ ءوتىلدى.
كەزدەسۋ بارىسىندا ءوڭىر ەلدەرىنىڭ قاۋىپسىزدىگىنە تونەتىن زاماناۋي قاۋىپ- قاتەرلەردى باعالاۋدىڭ ءبىرىڭعاي تاسىلدەرىن ازىرلەۋگە، سونداي- اق ولاردى جويۋدا ارناۋلى قىزمەتتەر اراسىنداعى ىنتىماقتاستىقتىڭ تيىمدىلىگىن ارتتىرۋ ماسەلەلەرىنە باستى نازار اۋدارىلدى.
تاراپتار ايماقتىق قاۋىپسىزدىك، تەرروريزم، ەكسترەميزم، زاڭسىز ەسىرتكى جانە قارۋ-جاراق اينالىمىمەن كۇرەس، ترانسۇلتتىق قىلمىس، اقپاراتتىق جانە كيبەرقاۋىپسىزدىك قامتاماسىز ەتۋ سالالارىنداعى وزەكتى ماسەلەلەردى جانە باسقا دا ءوزارا ءتيىمدى ىنتىماقتاستىق باعىتتارىن تالقىلادى.
بۇل شارا ورتالىق ازيا ەلدەرى اراسىنداعى قاۋىپسىزدىك سالاسىنداعى ىنتىماقتاستىقتى دامىتۋدىڭ ماڭىزدى كەزەڭى بولىپ، ايماقتا بەيبىتشىلىك پەن تۇراقتىلىقتى ودان ءارى نىعايتۋ ماقساتىندا ارناۋلى قىزمەت باسشىلارىنىڭ تۇراقتى كەزدەسۋلەرىنە نەگىز بولعانى ايتىلدى.
ەسكە سالا كەتەيىك، ورتالىق ازيا ەلدەرى قاۋىپسىزدىك كەڭەستەرىنىڭ حاتشىلارى وزبەكستاندا باس قوسقانى جايلى جازعان ەدىك.
اۆتور
بەگابات ۇزاقوۆ
