ورتاعاسىرلىق سارايشىقتان كونە كەسەنەنىڭ دروموسى تابىلدى
اتىراۋ. KAZINFORM - اتىراۋ وبلىسىنداعى ورتاعاسىرلىق سارايشىق قالاشىعىنان كونە كەسەنەنىڭ دروموسى تابىلدى.
ماحامبنت اۋدانىندا ورنالاسقان تاريحي مەكەندە ارحەولوگيالىق قازبا جۇمىسى ءجۇرىپ جاتىر. عالىمداردىڭ پىكىرىنشە، ءدال مۇنداي نىسان بۇرىنعى زەرتتەۋلەردە كەزدەسپەگەن. ⅩⅤ-XVI عاسىرلارعا ءتان نىسان كۇيدىرىلگەن كىرپىشتەن قالانعان. الايدا كەسەنەنىڭ كۇمبەزى قيراپ قالعان. ال جابىق ءدالىزى سول قالپىندا ساقتالعان.
«مۇنداي كەسەنەلەر سارايشىق قالاسىندا بۇرىندا دا انىقتالعان. ءبىراق ولار قاتتى بۇلىنگەن ەدى. بۇل كەسەنەنىڭ دروموسى تولىق ساقتالىپ قالعان. ازىرگە الدىن الا بولجام بويىنشا مۇندا مارتەبەلى ادامدار جەرلەنگەن بولۋى مۇمكىن»، - دەيدى ارحەولوگ امانگەلدى زاينوۆ.
ونىڭ ايتۋىنشا، ەسىگى وڭتۇستىك شىعىسقا قاراعان دروموستىڭ ۇزىندىعى - 170، بيىكتى - 60 سانتيمەتر. ازىرگە ءدالىز جارتىلاي قازىلعان. قازبا جۇمىسى ءۇش بولىككە ءبولىپ جۇرگىزىلدى. دالىزگە جالعاسقان كولەمدى قابىردىڭ قابىرعاسى تابىلدى. انىقتالعان قابىرعانىڭ ۇزىندىعى - 6، بيىكتىگى - 1 مەتر، قالىڭدىعى - 55 سانتيمەتر.
«بۇل كەسەنەنى سالۋعا سارى جانە قىزىل كىرپىشتەر پايدالانىلعان. سارى كىرپىشتەر - التىن وردا ءداۋىرىنىڭ ەسكى كىرپىشتەرى، ال قىزىل كىرپىشتەر قۇرىلىس سالىناردا كۇيدىرىلىپ جاسالعانى انىق. بۇل - سارايشىقتاعى ەڭ سيرەك كەزدەسەتىن نىسان»، - دەيدى ارحەولوگيالىق قازباعا قاتىسقان ستۋدەنت ەراسىل ومىربەك.
دروموستىڭ وڭتۇستىك بولىگىنەن شارۋاشىلىق بولمە دە انىقتالعان. قازبا كەزىندە قىش قۇمىرالار مەن ءتۇرلى بۇيىم، ورتاعاسىرلىق ساندىك جاپسىرمالار، مىس تيىندار تابىلعان. ارحەولوگيالىق نىسان الداعى ۋاقىتتا تەرەڭ زەرتتەلمەك. ورتاعاسىرلىق قالاداعى قازبا جۇمىسىنا ح. دوسمۇحامەدوۆ اتىنداعى اتىراۋ ۋنيۆەرسيتەتىنىڭ 19 ستۋدەنتى قاتىسقان.
اۆتور
جولداسبەك شوپەعۇل
