ورتا ءبىلىم بەرۋ جۇيەسىندە كادر تاپشىلىعى تولىق جويىلدى
استانا. KAZINFORM - بيىلعى وقۋ جىلىندا 36 پەداگوگ مەملەكەتتىك ناگرادالارمەن ماراپاتتالدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە وقۋ-اعارتۋ مينيسترلىگىنىڭ رەسمي وكىلى مەرەكە نۇرمۇحانوۆا ايتتى.
- قازىرگى ۋاقىتتا ەلىمىزدىڭ ورتا ءبىلىم بەرۋ ۇيىمدارىندا 412 مىڭنان استام پەداگوگ ەڭبەك ەتۋدە. بۇل بىلتىرعى جىلمەن سالىستىرعاندا 14 مىڭعا ارتىق. ولاردىڭ 73 پايىزعا جۋىعى - جوعارى بىلىكتىلىك ساناتىنا يە. وسى جەردە ەرەكشە توقتالىپ وتسەم دەيمىن، پەداگوگتەر سانىنىڭ ارتۋى - ەلىمىزدىڭ ورتا ءبىلىم بەرۋ جۇيەسىندە كادر تاپشىلىعىنىڭ تولىعىمەن جويىلۋىنا ىقپال ەتتى، - دەدى رەسمي وكىل.
ول مەملەكەت باسشىسىنىڭ تاراپىنان ۇستازداردىڭ قوعامداعى مارتەبەسىن كوتەرۋگە ەرەكشە كوڭىل ءبولىنىپ كەلە جاتقانىن ايتتى.
- بۇعان ايقىن دالەل - قازاقستان تاريحىندا العاش رەت بيىلعى وقۋ جىلىندا ەكى پەداگوگكە پرەزيدەنت قاسىم جومارت توقايەۆ «قازاقستاننىڭ ەڭبەك ەرى» اتاعىن تاپسىردى. سونداي-اق، 36 پەداگوگ مەملەكەتتىك ناگرادالارمەن ماراپاتتالدى، 64 مۇعالىم «ۇزدىك پەداگوگ» اتاعىن يەلەندى جانە ولارعا مەملەكەت تاراپىنان 1000 ايلىق ەسەپتىك كورسەتكىش كولەمىندە سىياقى تاعايىندالدى، - دەدى مەرەكە نۇرمۇحانوۆا.
بۇعان دەيىن حالىقارالىق وليمپياداعا قاتىسقان ءاربىر ەكىنشى وقۋشى جۇلدەگەر بولعانىن جازعان ەدىك.
اۆتور
مارلان جيەمباي
