ورمۋز بۇعازىنداعى ترانزيت «ەكى ءدالىزدى جۇيەگە» كوشتى

استانا. KAZINFORM - ورمۋز بۇعازى ارقىلى تەڭىز ءترانزيتى «ەكى ءدالىزدى جۇيەگە» كوشتى. جاڭا جۇيە يراننىڭ يسلام رەۆوليۋتسياسى ساقشىلار كورپۋسى (ك س ي ر) باقىلاۋىنداعى سولتۇستىك باعىت پەن ومان جاعالاۋى بويىمەن وتەتىن جاڭا وڭتۇستىك باعىتتى بىرىكتىرەدى، دەپ حابارلايدى شينحۋا اگەنتتىگى.

لوندوندا ورنالاسقان تەڭىز تاسىمالى سالاسىنداعى Windward تالداۋ كومپانياسىنىڭ مالىمەتىنشە، 5-ساۋىردە بۇعاز ارقىلى 11 كەمە وتكەن. ونىڭ ۇشەۋى كىرگەن، سەگىزى شىققان.

كىرگەن كەمەلەردىڭ بارلىعى تانكەرلەر بولعان. ال شىعىپ بارا جاتقان كەمەلەردىڭ اراسىندا تانكەرلەر دە، جۇك كەمەلەرى دە بار.

شىعاتىن باعىتتاعى كەمەلەر ەكى دالىزگە بولىنگەن. بەس كەمە لاراك ارالى ماڭىنداعى سولتۇستىك دالىزبەن وتكەن. بۇل باعىت بۇرىنعىداي ك س ي ر باقىلاۋىندا قالىپ وتىر. تاعى ءۇش كەمە ومان جاعالاۋى بويىمەن وتەتىن وڭتۇستىك ءدالىزدى پايدالانعان.

ساراپشىلاردىڭ ەسەبىندە سولتۇستىك مارشرۋتتىڭ لاراك ارالى ماڭىنداعى ورتالىق ارقىلى جۇمىسىن جالعاستىرىپ وتىرعانى اتاپ وتىلگەن. سونىمەن بىرگە وڭتۇستىك ءدالىزدىڭ ىسكە قوسىلۋى كەمەلەردىڭ بۇرىنعى باقىلاۋ ايماعىنان تىس جۇرۋىنە مۇمكىندىك بەرىپ وتىر.

مالىمەتكە سايكەس، وڭتۇستىك باعىت العاش رەت 2-ساۋىردە پايدالانىلعان. سول كۇنى بۇل جولمەن ءۇش كەمە، ونىڭ ىشىندە ەكى اسا ءىرى مۇناي تانكەرى مەن ءبىر سۇيىتىلعان تابيعي گاز تاسىمالدايتىن كەمە وتكەن.

بۇل - اسكەري قيمىلدار باستالعالى بەرى سۇيىتىلعان تابيعي گاز تاسيتىن كەمەنىڭ ورمۋز بۇعازى ارقىلى العاش رەت ءوتۋى.

3- 5-ءساۋىر ارالىعىندا وڭتۇستىك ءدالىزدى پايدالانعان كەمەلەر سانى تيىسىنشە ەكى، ءتورت جانە ءۇش بولعان. بۇل جاڭا مارشرۋتتىڭ قىسقا ۋاقىت ىشىندە بالاما جولدان تولىققاندى دالىزگە اينالىپ كەلە جاتقانىن اڭعارتادى.

ورمۋز بۇعازى - الەمدىك ەنەرگەتيكالىق رەسۋرستار جەتكىزىلىمىندەگى ماڭىزدى توراپتاردىڭ ءبىرى.

ەسكە سالساق، 28-اقپاندا ا ق ش پەن يزرايل يرانعا اۋقىمدى سوققى جاساعاننان كەيىن، تەگەران وڭىرگە جاۋاپ سوققىلارىن بەرگەن ەدى. وسىدان سوڭ بۇعازداعى كەمە قاتىناسى كۇرت توقتاتىلدى.

قازىرگى تاڭدا ورمۋز بۇعازى ارقىلى كەمە قاتىناسى %90 عا قىسقاردى.

جۋىردا Bloomberg باسىلىمى يراك مۇنايىن تيەگەن تانكەر ورمۋز بۇعازىنان وتكەنىن حابارلادى.