ورماندارىندا جابايى جانۋارلاردى قورەكتەندىرۋ ورىندارى پايدا بولدى
پەتروپاۆل. KAZINFORM - سولتۇستىك قازاقستان وبلىسىندا جابايى جانۋارلاردى اشتىقتان امان الىپ قالۋ ءۇشىن قورىقشىلار ولاردى قولدان ازىقتاندىرىپ جاتىر. وسى ماقساتقا جازدا تەك سىپىرعىشتىڭ عانا 27,5 مىڭ داناسى ازىرلەندى.
سولتۇستىك قازاقستاننىڭ التى ايعا سوزىلاتىن ۇزاق، ءارى ايازدى قىسىندا جابايى جانۋارلارعا قورەك تابۋ قيىن. كوكتەمگە امان-ەسەن جەتۋى ءۇشىن ولارعا كومەككە قورىقشىلار كەلەدى. مۇندايدا ءتۇز تاعىلارى جۇرەتىن جەرلەرگە وتتىقتار قويىلىپ، جاز بويى ازىرلەنگەن جەمشوپ بەرىلەدى.
س ق و تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ اڭشىلىق جانە بالىق شارۋاشىلىعى ءبولىمىنىڭ باسشىسى ميحايل نيكيتيننىڭ ايتۋىنشا، وڭىردە 47 اڭشىلىق شارۋاشىلىعى بار، ونىڭ 42 ءسى - ارەنداتورلارعا بەرىلگەن. قالعان بەسەۋى - رەزەرۆتىك قوردا.
«جالعا بەرىلگەن اڭشىلىق شارۋاشىلىقتارداعى جابايى جانۋارلاردى سوعان جاۋاپتىلار ازىقتاندىرادى. ءبىز رەزەرۆتىك قورداعى بەس اڭشىلىق شارۋاشىلىق پەن تيميريازيەۆ اۋدانىندا ورنالاسقان «اقجان»، «اقسۋات» مەملەكەتتىك تابيعي قورىقتارىنداعى جانۋارلاردى قورەكتەندىرەمىز. بيىل قار قالىڭ، ءارى جەلتوقسان ايىندا جاۋىن جاۋىپ، قاردىڭ بەتىن قاتىرىپ تاستادى. تۇياقتىلارعا تەبىندەپ، وزدىگىنەن وتتاۋ قيىن. سوندىقتان ورمان شارۋاشىلىقتارى مەن قورىقتاردا 20 ورىن ازىرلەدىك. قىستا، اسىرەسە، ءىرى جانۋارلارعا - ەلىك پەن بۇعىعا قوسىمشا ازىق كەرەك. قوياندار ەش قيىندىقسىز تاماعىن تابادى، ولارعا اعاشتىڭ قابىعى دا قورەك. ال دوڭىزدارعا قاردان ارشىپ جەۋگە ازۋ تىستەرى كومەكتەسەدى»، - دەيدى ميحايل نيكيتين.
ماماننىڭ ايتۋىنشا، «دالا اسحانالارى» جابايى جانۋارلار شوعىرلانعان جەرلەرگە، ماسەلەن مارال-ەلىكتەر ءۇشىن الاڭقايلار ورمان ماڭىندا، دوڭىزدار ءۇشىن سۋلاردىڭ، باتپاقتىڭ جانىنا قۇرىلادى.
الاڭقايلارعا ءشوپ سالىنادى، ارنايى وتتىقتار ازىرلەنىپ، سىپىرعىشتار ىلىنەدى.
«جىلدا جازدا جابايى جانۋارلارعا الدىن الا جەمشوپ ازىرلەيمىز. بىلتىر 10 مىڭ سەنتنەر ءشوپ، 5 مىڭ سەنتنەر بيداي قالدىعى، 27,5 مىڭ سىپىرعىش، 500 ك گ تۇز دايىندادىق. بۇل - كوكتەم شىققانشا جەتكىلىكتى. تۇز - ميكروەلەمەنتتەر قورىن تولتىرۋ ءۇشىن بارلىق جانۋارلارعا كەرەك. ول ءۇشىن قۇلاعان اعاشتى ويىپ، سول جەرگە تۇز سالادى نەمەسە بۇل ماقساتقا ءتۇبىردى پايدالانادى. تۇز قارمەن ەرىپ، ءتۇبىردى بويلاپ اعادى، جانۋارلار ونى قىس بىتكەنشە تامىرىنا دەيىن جەپ قويۋى مۇمكىن»، - دەيدى ءبولىم باسشىسى.
ورمانشىلار مەن قورىقشىلار جابايى جانۋارلاردى كۇن جىلىپ، ءتۇز تاعىلارى وزدىگىنەن قورەك تاباتىنداي جاعدايعا جەتكەنشە ازىقتاندىرماق.
«س ق و اۋماعىن مەكەندەيتىن جابايى جانۋارلاردىڭ اڭشىلىق تۇرلەرىنە توقتالار بولسام، مارال، بۇعى، ەلىك، دوڭىز، تۇلكى، قارساق، جانات تارىزدەس ءيت، قوياندار، بورسىق، سۋىر، ونداتر، وزەن قۇندىزى كەزدەسەدى. قۇستاردان قاز-ۇيرەك، قاسقالداق، بالشىقتى، قۇر، ءشىل، بودەنە بار. س ق و - جابايى قۇستاردىڭ جولىندا تۇرعان ماڭىزدى اۋماق. سوندىقتان كوكتەمدە توپتاسقان اق ماڭداي قازداردى جانە سيرەك كەزدەسەتىن قىزىلجەمساۋلى قاراشاقازداردى كورۋگە بولادى. سونداي-اق سيرەك كەزدەسەتىن قيقىلداق اققۋ، سۇر تىرنا، اقباس تىرنا، دۋاداق، بەزگەلدەك، اققۇيرىق سۋبۇركىتتى كوكتەمدە وڭىردەن كورۋگە بولادى»، - دەيدى ميحايل نيكيتين.
اۆتور
اقەركە داۋرەنبەك قىزى
