ورداباسى اۋدانىندا جۇيرىك باپتاپ، كوكپار شاباتىن بويجەتكەن تۇرادى

استانا. قازاقپارات – اساۋدى اۋىزدىقتاعان ارۋ. تۇركىستان وبلىسىنىڭ ورداباسى اۋدانىندا جەلمەن جارىسقان جۇيرىك باپتاپ، كوكپار شاباتىن بويجەتكەن تۇرادى، دەپ حابارلايدى 24kz.

جىلقىنى جانىنا سەرىك ەتكەن بۇرىمدى بۇرىنعى وتكەن باتىر انالاردىڭ ءىزباسارى ىسپەتتى. قىز بالاسى دەمەسەڭىز، نارگيز قيات ەپتىلىگى جاعىنان ەر ازاماتتاردان كەم تۇسپەيدى. سپورتتىڭ بىرنەشە ءتۇرىن مەڭگەرگەن.

«ەگەۋلى نايزا قولعا الىپ، ەڭكۋ- ەڭكۋ جەر شالماسا دا» ەردىڭ ءىسىن ەڭسەرىپ، ەر قاناتىنىڭ ۇستىندە ەركىن سامعاعان بويجەتكەننىڭ ارەكەتىنە ەرىكسىز تامساناسىز. اۋىزدىعىمەن الىسقان ارعىماقتى ۇرشىقشا ءيىرىپ، دەگەنىنە كوندىرگەن تالدىرماش قىزدىڭ قايسارلىعى ءتانتى ەتتى. سۇلۋ جانۋاردىڭ سىرىن ۇعىپ، تۇلپار تاقىمداعان نارگيزدىڭ دە كوركىنە كوز تويمايدى. ءبىر قاراعاندا، بولمىسى نازىك بويجەتكەن اتقا مىنگەندە ناعىز كوشپەندى قازاققا اينالادى.

نارگيز قيات، اتبەگى:

- اتتىڭ ۇستىندە ادامنىڭ رۋحى باسقاشا بولادى. پاتريوتتىق سەزىم ويانادى. كەۋدەڭدە مىقتىلىعىڭ ودان سايىن كۇشەيە تۇسەدى. ول سەزىمدى تەك مىنگەن ادام عانا تۇسىنەدى، بىلاي ايتىپ جەتكىزگەنمەن تۇسىنە بەرمەيدى كوپ ادام. جاڭاعى ايتقانداي، رۋحىڭ ويانادى، ءوزىڭنىڭ قازاق ەكەنىڭە ماقتاناسىڭ. باسقا ۇلتتاردا دا بار شىعار ەندى، ءبىراق قازاق حالقىمەن قاتتى ۇيلەسەدى دەپ ويلايمىن جىلقى جانۋارى.

نارگيز اتقا ءمىنۋدى 5 جىل بۇرىن ۇيرەنىپتى. العاشىندا جۇرەكسىنگەنىمەن، بويىنداعى بۇلا كۇش نامىسىن جانىعان. تاقىمىنداعى «قاراتاۋدى» تاي كەزىنەن ءوزى باپتاعان. قازىر اۋداندىق كوكپارشىلار كلۋبىنىڭ مۇشەسى. ۇلتتىق ويىننىڭ قىر-سىرىن ابدەن مەڭگەرگەن. قاسىنداعى سەرىكتەرى دە قايسار قىزدىڭ قابىلەتىنە تاڭدانىسىن جاسىرمايدى.

باعدات كارىباي، كوكپارشى:

- نارگيزدىڭ «قاراتاۋ» اتتى جالعىز اتى بار ءوزى جاقسى كورەتىن. كەلگەندە ءبىرىنشى سوعان بارادى. اتتا ءوزى سەزەدى نەگىزى، باسقا قىزدار مىنسە، تىپىرشىپ كەتەدى. ال نارگيزدى مويىنداپ تۇرادى. نارگيز سياقتى قىزدار سيرەك قازاقستاندا، ەكىنىڭ ءبىرىنىڭ قولىنان كەلمەيدى ونداي. جىگىتتەردىڭ دە اراسىندا دا نارگيز سياقتى اتقا مىنە المايتىندار بار، مىقتىنى مىقتى دەۋ كەرەك. نامىسشىل، اتتان قورىققانىن كورگەن جوقپىن.

«مال يەسىنە تارتادى»، - دەيدى قازاق. نارگيزدىڭ قاراتاۋى اناۋ-مىناۋ ادامعا باس بەرمەيتىن اساۋ تۇلپار. جىلقى جاقسى كورگەندى سەزەتىن ەستى جانۋار بولعانىمەن، وزىنەن قورىقپايتىن ادامعا عانا باعىناتىنىن ايتادى.

نارگيز قيات، اتبەگى:

- مەن وسى قاراتاۋدى كوكپارعا دايىندايمىن. وسىنى ەرتتەيمىن. باسقا ادامداردى تىڭداي بەرمەيدى. ءوزىمدى تىڭدايدى، بۇل باسى قاتتى اتتاردىڭ توبىنا جاتادى. ءبىراز جىل كۇرەسپەن اينالىسقانىمنىڭ پايداسى شىعار، باسىن توقتاتۋ قاتتى قيىنعا سوقپايدى. كەز كەلگەن قىز تۇرمىسقا شىعادى عوي، تۇرمىسقا شىعىپ جاتقان كۇننىڭ وزىندە بۇيىرتسا، ات باپتاپ، ات شاپتىرماسام با دەگەن نيەتىم بار.

ءوزى اتاپ وتكەندەي، بۇرىمدى بويجەتكەن 9 جىل كۇرەسپەن اينالىسقان. بوزكىلەمدە اتوي سالىپ، قارسىلاس شاق كەلتىرمەگەنى تاعى بار. قازاق كۇرەسىنەن سپورت شەبەرلىگىنە ۇمىتكەر. بۇگىندە ادىرنا تارتىپ، نىسانا كوزدەۋگە ماشىقتانىپ ءجۇر. ارعىماق ءمىنىپ، اساۋدى اۋىزدىقتاعان ارۋدىڭ الداعى كۇندەرى ات ۇستىندە وتىرىپ، نىسانا كوزدەيتىن قول مەرگەن اتانار كۇنى دە الىس ەمەس.