ورازا ۇستاعان ادامنىڭ اعزاسىندا قانداي وزگەرىس بولادى؟

استانا. قازاقپارات - مەديتسينا، بيولوگيا سالاسى عالىمدارىنىڭ زەرتتەۋلەرىندە انىقتالعانداي، ورازا كەزىندە ادام اعزاسىندا ءبىرقاتار ەلەۋلى وزگەرىس جۇرەدى. بۇل تۋرالى kazislam.kz جازدى.

العاشقى كۇندەرى بۇرىنعى تاماقتانۋ داعدىسى بۇزىلعان اعزا بۇلقىنىسقا تۇسەدى. قانت تومەندەپ، جۇرەك سوعىسى باياۋلايدى، قان قىسىمى تومەندەيدى. السىزدىك پايدا بولىپ، اۋىزدان جامان ءيىس شىعۋى مۇمكىن. بۇل قۇبىلىستار اعزادا تازارۋ پروتسەسى باستالعانىنىڭ بەلگىسى دەيدى دارىگەرلەر.

قازىر مەديتسينادا ادامدى اشىقتىرۋ ارقىلى دا ەمدەۋ ءادىسىنىڭ قولدانىلۋى وسى يسلام دىنىندەگى پارىز - ورازا ۇستاۋدى زەرتتەۋدەن شىققان تاجىريبە. بۇدان كەيىن اعزا ورازا تارتىبىنە بەيىمدەلىپ، اس قورىتۋ جۇيەسى دەمالادى ەكەن. قورعانىش جۇيەسىنىڭ بەلسەندىلىگى ارتىپ، جاڭالاۋ ءۇردىسى باستالادى.

ادام اعزاسىنداعى جاسۋشالاردىڭ اشىعۋ كەزىندەگى قىزمەتىن زەرتتەگەن جاپون مولەكۋليار بيولوگ عالىمى - پروفەسسور ەسينوري وسۋمي اشىققان كەزدە ون ەكى ساعاتتان كەيىن جاسۋشالار تازارۋ جۇمىسىن باستايتىنىن انىقتاعان. بۇزىلعان اۋرۋ جاسۋشالاردى ساۋ جاسۋشالار جەڭىپ، اۋىستىرۋعا كىرىسەدى ەكەن. مىنە وسى اشقان جاڭالىعى اسا جوعارى باعالانىپ، جاپون عالىمىنا نوبەل سىيلىعى بەرىلدى.

زەرتتەۋشىنىڭ ايتۋىنشا، ورازانىڭ ەكىنشى ونكۇندىگىندە ادام ءوزىن سەرگەك سەزىنەدى. اعزانىڭ ءوزىن ءوزى ەمدەۋ قابىلەتى ارتادى. اقىرىندا اعزا اشىعۋعا ابدەن ۇيرەنىپ الادى. ادامنىڭ جۇيكەسى تىنىشتالىپ، تىنىعادى، وي-ساناسى تازالانادى، تىڭ ويلار كەلەدى، تۋىنداعان ۇشقىر قيالدار جاڭا ارماندار مەن ماقساتتارعا جەتەلەيدى. ەستە ساقتاۋ قابىلەتى ارتادى. وسىدان كەيىن ادامنىڭ جاسامپاز ىستەرگە بارۋى ءسوزسىز.