ورالحاندى وقيسىز با، وقىرمان؟
استانا. قازاقپارات- «... ەركىندىگىن اڭساعان كەربۇعى ءتىپتى دە ولگەن جوق». راسىمەن، قازاق ادەبيەتىنىڭ كەربۇعىسى ءالى دە التاي جوتاسىندا جۇرگەندەي اسەر قالدىرادى. ونىڭ ءتىرى جۇرۋىنە ءسىز بەن ءبىز قايتا- قايتا كەمىرگەن شىعارمالارى سەبەپ.

قالايشا قايتا پاراقتامايسىڭ؟! وندا تارتىلىس كۇشى بار سياقتى. ەندەشە تۋعان جەرىنە شىن عاشىق جازۋشىنىڭ بيىك بولمىسىن زەردەلەپ كورەلىك.
جازۋشىنىڭ ءسوزى - ءومىردىڭ ءوزى
«ادام ارمانداي ءبىلۋى كەرەك، ارمانداسا - سوعان قول جەتكىزەدى. مەن جازۋشى بولۋدى ارماندادىم، جازۋشى بولدىم. مەنىڭ پارتالاس دوسىم جەڭىس ۇشقىش بولۋدى ارماندادى، ول دا ۇشقىش بولدى. ادام ارمانداي وتىرىپ، سونىڭ جولىندا كۇرەسە ءبىلۋى كەرەك. بۇكىل ادامزات سوعان قاراپ تۇرعانداي، ءوز- ءوزىڭدى شەكسىز جاۋاپكەرشىلىكتە سەزىنگەندە عانا ويلاعان ماقساتىڭا جەتە الاسىڭ». بۇل - ورالحان بوكەيدىڭ كۇندەلىگىنە جازعان ءسوزى.
ءيا، تابيعاتقا ەتەنە جاقىندىعى ونى تالعامپاز جازۋشى بولۋعا تاربيەلەدى. وعان قوسا ادەبيەتكە سۇيىسپەنشىلىگىن وياتقان سول پاننەن ءدارىس بەرگەن ۇستازى جومارت نۇرعازين ەدى. كوركەم ادەبيەتكە قانىپ وسكەن، اپاسىنىڭ تاربيەسىندە بولعان ۇلعا تانىمدىق دۇنيەنى وقى دەپ كەڭەس بەرگەنى دە تەگىن ەمەس. ويتكەنى «قار قىزى»، «مىناۋ اپپاق دۇنيە»، «ءبىزدىڭ جاقتا قىس ۇزاق»، «قاسقىر ۇلىعان تۇندە» سياقتى بىرنەشە شىعارماسىندا ورالحان بوكەيدىڭ تابيعاتپەن بىتە قايناسىپ جاتقانىن سەزەسىڭ. ودان بولەك «قۇم مىنەزىندە» مويىنقۇمدى، «جەتىم بوتادا» اقتاۋ ەرەكشەلىگىن جىپكە تىزگەن. مۇنىڭ استارىندا ارىدە ۇستاز ايتقان، بەرىدە ءوزى تارازىلاعان ءبىراز دۇنيە جاتىر. جازۋشىنىڭ سيقىرى سول، ءبىر شىعارماسىن وقىعاندا شىعىستىڭ سۋىعى بەتىڭدى قارىپ كەتسە، ەندى بىردە شولەيتتى جەردەن تىلسىمدى ىزدەپ جۇرەسىڭ. اسىرەسە، التاي جايىندا تولعانعاندا ەكى جاعىن ۇيەمە قار قورشاپ تۇرعان جالعىزاياق جولعا تۇسكەندەي اسەر الاسىڭ. جازۋشىنىڭ «مەنىڭ اقىلشىم دا، ۇستازىم دا - ءور التاي» دەيتىنىن كۇمانسىز تۇسىنەسىڭ.
ارينە، ءۇي- ىشىندەگى اتموسفەرا دا ءرول وينايتىنى انىق. عاليا بوكەي قىزى سۇحباتتارىنىڭ بىرىندە ارعى اتالارى قاراتاي باتىر ەكەنىن، ونىڭ ءوزى زامانىنىڭ رۋ باسى، ءبيى بولعانىن اتاپ وتكەن. ودان كەيىنگى، سوڭعى اتاسى دوس بي شەشەن كىسى بولعان دەسەدى. جازۋشىنىڭ اتاسى يساحان مەن دوس بي ءبىر اكەدەن تاراعان ەكەن. عاليا بوكەي قىزىنىڭ ايتۋىنشا، اعاسىنا ءسوز ونەرى اتا- بابالارىنان قونعان.
«سۇيەگىنە ءسوز قونعان دوس بيدىڭ بايبىشەسى سارقىت اپام دا وت اۋىزدى، وراق تىلدى كەرەيدىڭ قىزى بولعان. اكە- شەشەمىز كوبىنە جۇمىسپەن سىرتتا جۇرگەندىكتەن اعاما باعىت- باعدار بەرىپ، جول سىلتەگەن، تاربيە بەرگەن وسى - سارقىت اپام. سارقىت اپامنىڭ «وڭ قولى ويماق» دەيتىن. ەر ازاماتتىڭ دا، ايەل ادامنىڭ دا اتقاراتىن قىزمەتىن ءبىر ءوزى جاساي بەرەتىن. مۇسىلماندىقتىڭ پارىزدارىن بەرىك ۇستاندى. ءدىندار، تاكاپپار، وسەك- اياڭعا جانى قاس ادام ەدى. اكەمىز بوكەي مەن شەشەمىز كۇليا دا ءسوز ونەرىنەن كەندە ەمەس. قاتونقاراعاي ەلىنە بەلگىلى ادامدار بولعان»، - دەگەن ەدى عاليا بوكەي قىزى.
وسىدان- اق وقىعاندا تاماعىڭا وكسىك تىعىلىپ، «اپام مەنىڭ... سەنەن نە قالدى؟ جارىق استاۋ ما؟ ءيا، ادام ءومىرى دە سول جارىق استاۋ سەكىلدى قاڭسىپ قالادى ەكەن- اۋ...» دەپ شىعارما اياقتالعاندا ەرىكسىز جىلاعانىڭنىڭ سىرىن تۇسىنگەندەي بولاسىڭ. ورالحان بوكەي سۋرەتتەگەن اپا مەندە دە بار. تاعدىردىڭ بار تەپەرىشىن كورىپ، ءبىزدى ارقالاپ ءوسىردى. كەلىنىم ءبىلىم السىن دەپ 28 كۇندىك شاقالاقتى باعىپ- قاقتى. قولىنان كەلمەيتىنى جوق. ءبىراق بازبىرەۋلەر اپامنىڭ وقىماعانىن بەتىنە باسادى. الايدا «اپامىڭ استاۋىندا» سۋرەتتەگەندەي مەنىڭ اپامنىڭ دا دالا مەكتەبىن ءبىتىرىپ، سانا دەڭگەيىنە كوتەرىلگەنىن باعامداپ جاتپايدى. بالكىم، وسى شىعارمانى وقىعاندا تاماعىما تىرەلگەن وكسىك كوپكە ويىمدى جەتكىزە الماعاننان بولار. قالاي بولسا دا، جازۋشى وقىرمانىنىڭ ويىن ايتپاي- اق ءتۇسىنىپ، كەۋدەدە بۋىرقانىپ جاتقان اشۋ- ىزانى باسا الاتىن دەڭگەيدە قۇدىرەتتى. قاتەلىكتى جۋىپ- شايىپ، اركەز تۇزەتۋگە بولارىن نۇسقاعان شەبەر. ارتتا قالعان بالالىقپەن بەتتەستىرىپ، ۇيالتىپ، ءبىر كۇلدىرىپ، ءبىر جىلاتا الاتىن سۋرەتكەر.
قازىر ينفوپروديۋسسەرلەر «Reels تۇسىرگەندە العاشقى 3 سەكۋند ماڭىزدى» دەپ جاتادى. كوركەم ادەبيەت وقىرمانى ءۇشىن دە ءدال سولاي. شىعارما العاشقى بەتىنەن وزىنە تارتىپ اكەتپەسە ءبارى بەكەر. ورالحان بوكەيدىڭ ارتىقشىلىعى دا وسىدا. كەز كەلگەن شىعارماسى ءون بويىڭا تاراپ، قيالىڭدى قاناتتاندىرىپ، ادەبيەت ولكەسىن ارالاۋعا شاقىرىپ تۇرادى. مەملەكەتتىك سىيلىقتىڭ لاۋرەاتى بەكسۇلتان نۇرجەكەنىڭ ايتقانى بار: «ول ۋاقىتتارى شىعىس قازاقستاندا قازاق ءتىلى اسا قيىندىقپەن دامىپ جاتتى. ورىستار كوپ بولعان سوڭ، جەرگىلىكتى جۇرت تا ورىسشا سويلەي باستادى. سول وڭىرلەردە مەكتەپ، ءتىل قاليحان، ورالحانداردى وقۋ ارقىلى ساقتالدى دەپ سەنىممەن ايتا الامىن. ولاردىڭ جازعاندارىنىڭ شىعىس قازاقستانداعى حالىققا ىقپالى زور بولدى. وسى جاعىنان ورالحاننىڭ حالىققا تيگىزگەن پايداسى وراسان زور دەپ ويلايمىن». ءيا، ودان بولەك جازۋشى ءبىر بۋىندى تاربيەلەدى دەسەك قاتەلەسپەيمىز. ويتكەنى اعا بۋىن وكىلدەرى اڭگىمەسىندە «ورالحاندى وقىدىڭ با؟» دەپ ءوزارا جارىساتىنىن ءجيى ايتادى. سودان- اق ونىڭ ادەبيەتتەگى ورنىن بولجاپ بىلەمىز. ال ناقتى كاسىبي باعانى ءابىش كەكىلبايەۆ بەرگەن ەكەن: «ورالحان بوكەي - جيىرماسىنشى عاسىرداعى قازاق ادەبيەتىنىڭ ەڭ سۇلەي سۋرەتكەرىنىڭ ءبىرى رەتىندە الەمدىك تانىمدىلىققا يە بولدى. ورالحان ازعانتاي عۇمىرىندا سونداي اسقارالى بيىككە ءوزىن دە، ەلىن دە، تۋعان ادەبيەتىن دە شىعارىپ ۇلگەردى».
كوڭىل كوگىندەگى تەاتر
ورالحان بوكەيمەن زامانداس جازۋشىلار ونىڭ بارلىق جانردا قالام تەربەگەن تالانتتى جازۋشى ەكەنىن ايتادى. شەرحان مۇرتازا ەستەلىگىندە جازۋشىنىڭ شۇعانىڭ بەينەسىن جاتقا سوققاندا اكتەرلىك شەبەرلىگىنە تاڭداي قاققانىن جازعان. ايتسا، ايتقانداي، مۇزتاۋدىڭ مۇزبالاعى العاشىندا قۇرمانعازى اتىنداعى كونسەرۆاتوريانىڭ ارتيستىك بولىمىنە وقۋعا تۇسكەن. الايدا اناسىنىڭ «جالعىز بالاسى ارتيستىك وقۋ وقيدى» ەكەن دەگەن سوزىنە بولا وقۋىن ارى قاراي جالعاستىرماپتى. اۋىلدا تراكتور ايداپ، گازەتتە كوررەكتور بولعان ول كەيىننەن قازۇۋ- دىڭ جۋرفاگىنا سىرتتاي وقۋعا تۇسكەن. ساكەن يماناسوۆ ەستەلىكتەرىنىڭ بىرىندە ورالحان بوكەيدە اسابالىق دارىن دا بولعانىن تىلگە تيەك ەتەدى. مۇنىڭ ءبارى جازۋشىنىڭ ونەرگە، ونەر قۇشاعىنداعى وزىنە عاشىق بولعانىن كورسەتەدى.
جازۋشى «قۇلىنىم مەنىڭ» پەساسى ءۇشىن كوپ ەڭبەكتەنگەن. وسى شىعارمانى ساحنالاۋ ءۇشىن كۇندە تالقىلاۋعا قاتىسىپتى دەسەدى. دۋلات يسابەكوۆ ەستەلىگىندە «دراماتۋرگيانىڭ ءيسى مۇرنىنا بارماي جۇرگەندە» ورالحان پەساسىنىڭ پرەمەراسىنا بارعانى تۋرالى اڭگىمەلەيدى. زامانداسىن دراماتۋرگيا الەمىنە سۇيرەپ، «سەن دە جاز، قولىڭنان كەلەدى» دەپ ۇگىتتەگەن دە وسى ورالحان ەكەن. وسىلايشا، دۋلات يسابەكوۆ «رەكتوردىڭ قابىلداۋ كۇندەرىن»، ىلە شالا «اپكەنى» جازۋعا باس قويعان.
1974 -جىلى قادىر جەتپىسبايەۆتىڭ رەجيسسەرلىگىمەن قويىلعان «قۇلىنىم مەنىڭ» كورەرمەنىن ەرەكشە اسەرگە بولەگەن قويىلىمنىڭ ءبىرى. بىرنەشە جىل مۇحتار اۋەزوۆ اتىنداعى تەاتر ساحناسىنان تۇسپەگەن تۋىندى ومىرشەڭدىگىمەن قۇندى. وسى پەسانى جارىققا شىعاراردا اۆتور مەن رەجيسسەر بىتە قايناسىپ، ءار دەتالدى اقىلداسىپ قۇرعان دەسەدى. سودان با، قويىلىم جىلدار بويى كورەرمەنىن جوعالتقان جوق. پسيحولوگيالىق دراما اۋىل مەن قالا جاسىنىڭ ورەسىن، سانا بيىگىن كورسەتتى. ارداكۇرەڭىن جاقسى كورگەن جىلقى مىنەز جىگىتتىڭ بولمىسىن اشتى. اشتى دا تەگىنەن قاشىپ، ۇلتتىق بولمىستى جوعالتۋعا بولماسىن ەسكە سالدى.
ودان كەيىن «تەكەتىرەس» پەساسى قوعامدا سەڭ قوزعاعانداي اسەر قالدىرادى. اۋباكىر راحيموۆتىڭ رەجيسسەرلىگىمەن ساحنالانعان قويىلىم عۇمىرى ءبىر ماۋسىمعا ۇلاسادى. رەجيسسەر ب ا ق- قا بەرگەن سۇحباتىندا بۇعان دەكوراتسيا ماسەلەسى مەن ساياسات سالقىنى تيگەنىن جاسىرماعان. ال 1982 -جىلى قويىلعان «قار قىزى» فيلوسوفياعا تولى شىعارما. مۇندا اق پەن قارانىڭ، ءوڭ مەن ءتۇستىڭ تەكەتىرەسى سۋرەتتەلگەندەي. ءسىز بەن ءبىز مانىنە تەرەڭ بويلاي المايتىن سيقىر الەمى دە سىرت قالماعان. سول تۇستا جازۋشىنىڭ وسى ەرەكشەلىگىن رەجيسسەر مەڭ دوڭ ۋك ايتپاي ءتۇسىنىپ، ەكەۋى ادەمى تاندەم قۇرعان. وعان قوسا «زىمىرايدى پوەزدار» (1984)، «جاۋ تىلىنداعى بالا» (1985)، «مەن سىزدەن قورقامىن» (1987) پەسالارى قازاق جانە ورىس تىلدەرىندە ساحنالانادى. الايدا قاي- قايسىسىن الىپ قاراساڭىز دا عۇمىرى ۇزاق بولعان جوق.
كەيىننەن ورالحان بوكەي شىعارمالارى ساحنا تورىندە كورەرمەنىمەن قايتا قاۋىشتى. 2019 -جىلى م. اۋەزوۆ اتىنداعى قازاق ۇلتتىق اكادەميالىق دراما تەاترىندا جۇلدىزبەك جۇمانبايدىڭ «قار قىزى» قويىلىمىنىڭ تۇساۋى كەسىلدى. «ۇيقىم كەلمەيدىنى» 2017 -جىلى داۋرەن سەرعازين مونوسپەكتاكل رەتىندە ۇسىنسا، كەيىننەن ءبازىل سۇلتانعازى ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنا وسى شىعارمامەن جاڭا لەپ اكەلدى. ورالحان الەمىندەگى ءوزىڭدى جوعالتپاۋ، ىزدەۋ، تابۋ، ايالاۋ تاقىرىبى تەاتر اكتەرلەرىنىڭ تۇسىنىگىمەن ۇيلەسىپ جاتتى. كورەرمەن دە ءدال سول سيقىردى، وزىنە باۋراپ الاتىن مونولوگتى سونشا جىل ىزدەپ، قايتا تاپقانداي كوڭىل كۇيدە ءجۇردى. ويتكەنى دراماتۋرگ ورالحاننىڭ ۇزىن سونار سويلەمدەرىن سۇيەتىن جۇرت كوپ ەدى.
ءبىر كەم دۇنيە...
ءيا، مەنىڭ دە، ونىڭ دا، ءبىزدىڭ دە «ۇيقىمىز كەلمەيدى» . وقىرمانداردىڭ ويىنشا، شەبەر سۋرەتكەردىڭ بۇل شىعارماسى اسىل جارى ايمانعا ارنالعان. ورالحان مەن ايماننىڭ ماحابباتى اڭىزعا بەرگىسىز حيكايا ما دەپ تاڭىرقايتىنىمىز تاعى بار. بۇعان پۋبليتسيست عابباش قابىش ۇلىنىڭ «ايماشتى قيمادىم، قيا المادىم.. » اتتى ەسسەسىن وقىساڭىز دا كوزىڭىز جەتەدى. جازۋشىنىڭ قارىنداسى عاليا بوكەي قىزى دا «جەڭگەم ەكەۋىنىڭ ماحابباتى بالادان دا بيىك تۇردى» دەيتىن.
«ۇيقىم كەلمەيدى» شىعارماسىندا دا ادام قىزىعارلىق ماحاببات حياكاسى بولعانىمەن باستى كەيىپكەردىڭ بالاسى بولمايدى. وتكەن شاقتا باستان وتكەن قاتەلىك تە سۋرەتتەلەدى. ەكەۋىن ۇشتاستىرا وتىرىپ، ءون بويىڭدى شىمىرلاتار دۇنيە تۋادى.
اقىن- جازۋشىلار ورالحان مەن ايمان ەكەۋىنىڭ اراسىنداعى ىستىق ىقىلاسقا تاڭداي قاعىپتى. جازۋشى «ەڭبەك تۋى» گازەتىنىڭ باس رەداكتورىنىڭ ورىنباسارى قىزمەتىندە جۇرگەندە ايمانمەن تانىسادى. سىيلاسادى، دوس- جاراننىڭ اراسىندا دا سىيلى بولادى. ءبىراق قانشاما جىل وتاسقانىمەن بالالارى بولمايدى. عاليا بوكەي قىزىنىڭ ايتۋىنشا، ايمان ماسكەۋدە ءبىلىم العان قىز. تاربيەلى، تەكتى. ءۇي ىشىندە جالاڭاياق، جالاڭباس جۇرمەگەن. «انام كەيدە ەركەلەيتىن بولۋى كەرەك، ىستەگەن تاماعىن ىشپەي قويادى. سول كەزدە دەرەۋ ول تاماقتى كورشىلەرگە بەرسە دە، ىسكە جاراتىپ قايتادان تاماق ىستەۋگە كىرىسەتىن ەدى. اعام ەكەۋى كەرەمەت جاراسىم تاپتى. شىنى كەرەك، اعام كوپ شىعارماسىن سول ايمان جەڭگەمىزبەن بىرگە تۇرعاندا جازدى. ويتكەنى ول ءبارىن ەمەۋرىننەن تۇسىنەتىن، بابىن جاسايتىن. قيىن تيگەنى بالانىڭ جوعى ەدى. ول تاقىرىپتى ءبىز دە، ولار دا قوزعامايتىن»، - دەيدى سۇحباتتارىنىڭ بىرىندە جازۋشىنىڭ قارىنداسى.
... قالامگەردىڭ دوسى قۋانىشباي قۇرمانعالي ەستەلىگىندە ايماننىڭ ولىمىنە ورالحان بوكەيدىڭ قاتتى قايعىرعانىن، سۇيەكتى شىعاراردان ءبىر كۇن بۇرىن جۇرت تارقاپ كەتكەندە جازۋشىنىڭ تۇنىمەن جىلاپ شىققانىن جازادى. مىنە، ءار شىعارمادا ءومىر بارىن نۇسقاساق، «ۇيقىم كەلمەيدىدەن» ورالحان ءومىرىن سۋرەتتەگەندەي اسەر الاتىنىمىز سودان.
ورالحان بوكەي ايماننان كەيىن ارداقپەن وتاۋ قۇرادى. كوپ وتپەي ايحان ەسىمدى ۇل، ايجان ەسىمدى قىز سۇيەدى. العاش ۇلدى بولعانىن ەستىگەندە جازۋشى قاتتى تولقىپ، ءبىرتالاي ۋاقىت ءوز- وزىنە كەلە الماي جۇرگەن ەكەن.
جازۋشى ورالحان جارى ايمان دۇنيە سالعان سوڭ بەس جىلدان كەيىن ءۇندىستاننىڭ دەلي قالاسىنا بارعان ساپارىندا مەزگىلسىز قايتىس بولادى. بەكسۇلتان نۇرجەكە ەستەلىگىندە «ءۇندىستانعا جۇرەرىنىڭ الدىندا سەرىك ءابدىرايىموۆتىڭ ۇيىندە بىرگە بولدىق. اقىرعى كورگەنىم دە سول بولدى. جۇرەگى اۋىراتىن ادام ەمەس سياقتى ەدى. ءان دە سالاتىن، ءازىل دە ايتاتىن، كەز كەلگەن ورتادا كوڭىلدى وتىراتىن. جۇرەگىنىڭ شىداماعانىنا قاراعاندا، ىشتەن تىنعان، ويلاندىرعان كوپ دۇنيەلەرى بولعان سىڭايلى» دەپ جازادى.
راسىندا دا، ەلۋ جاسقا اياق باسار شاعىندا ومىردەن وزعان جازۋشى ارتىنا مول مۇرا قالدىرىپ كەتتى. التايدى وزىنشە ءسۇيدى، وزىنشە جىرلادى. اڭگىمە- پوۆەستەرى ارقىلى جاستارعا وي سالدى، كوپتى ەسىنە ءتۇسىردى.
ءيا، شىعىستىڭ بار مارجانىن قازاقتىڭ الاقانىنا سالىپ بەرگەن جازۋشى جەتپىسكە كەلسەم دەپ ارمانداعان ەكەن. ءبىراق ارمان قۇرعىر جەتكىزسىن بە!.. ءارى ءبىر دەرەكتە وكپەسى سىر بەرگەنى تۋرالى ايتىلسا، ەندىگىسىندە جۇرەگى اۋىرعانى جازىلعان. قالامگەردىڭ كۇندەلىگىندەگى سوڭعى جازباعا ءمان بەرسەڭىز جۇرەك قايعىسى تەرەڭ ەكەنىن توپشىلايسىز.
«بۇگىن تاڭەرتەڭ ەرتەمەن سەمەيگە ۇشۋىم كەرەك ەدى. بارا المادىم. قىرىقتىڭ بەسىنە كەلگەندە، قۇدايدان جالبارىنىپ ءجۇرىپ، ءبىر ۇل (ايحان)، ءبىر قىز (ايجان) سۇراپ الدىم. ماعان دەگەن تاعدىردىڭ تالقىسى كوپ ەدى… ەندى، ەندى ەڭىرەۋدەن ەسىمدى جيىپ، شۇكىرشىلىك ايتا بەرگەن كەزدە، اۋزىمنان ءتۇسىپ قالعان بوتاقانىم ايجانىمنىڭ بۇيرەگى جازىلۋى ەكىتالاي اۋرۋى بار دەگەن اۋىر ءسوز ەستىدىم. سەڭ سوققانداي ەمەس- اۋ، قالىڭ سەڭنىڭ استىندا قالعانداي حالدەمىن. كوزىمدە جاس… كوڭىلىم ءۇيدىڭ پەشىندەي ۋىلدەيدى… قۇر سۇلدەرىم… نە ىستەيمىن؟ قايدا بارامىن؟ قاراعىم- اۋ، جۇرەگىمدى قاق ايىرىپ، قانسىراتتىڭ- اۋ!
قايتەيىن؟ قايسىبىرىن ايتايىن؟ ءوزىمدى الىپ، بالامدى قالدىرساڭشى، اللام!» ...
ول «اۋىل حيكايالارىمەن» جۇرتتىڭ جۇرەگىن جاۋلادى. ءيا، قازاق باردا قازاقتىڭ تاسقا باسىلعان ءسوزى دە ولمەيتىنى انىق. زامانداسى «ورالحاندى وقىدىڭ با؟» دەپ ءوزارا جارىساتىنىن ءسوز اراسىندا ايتتىق.
ال ءسىز شە، قازىر ورالحاندى وقيسىز با، وقىرمان؟ وقىساڭىز، قالامگەردىڭ تۋعان جەرىنە بارىڭىز، مۇزتاۋ شىڭىنا شىعار جولدا «قار قىزىن» كەزىكتىرىپ، «سايتان كوپىردەن» وتەرسىز، جولدا «كەربۇعىنى» كورىپ قالۋىڭىز مۇمكىن. ارى قاراي ارداكۇرەڭىن ەرتكەن بوزتايلاق الدىڭىزدان شىعادى. جىلقىنى كورىپ شاتاستىرىپ الماڭىز، بۇل «تورتاي مىنەر اقبوزات» ەمەس. وسىنشا كەرەمەتتى كورگەندە «ۇيقىڭىز كەلمەسى» انىق. التاي شىڭىنا جەتكەندە «مىناۋ اپپاق دۇنيەگە» تامسانا قاراپ، بۇل جاقتا قىس ۇزاق ەكەنىنە كوزىڭىز انىق جەتەدى...
«انا ءتىلى» گازەتى. 28.09.2023
https://anatili.kazgazeta.kz