ورالدا جۇرگىزۋشىلەر سۇيىتىلعان گاز تاپشىلىعىنا تاپ بولدى
ورال. KAZINFORM - ورال قالاسىنداعى اۆتوگاز قۇيۋ ستانسالارىندا كەزەك قالىپتاستى. اۆتوكولىك جۇرگىزۋشىلەرى وڭىردە سۇيىتىلعان گاز تاپشىلىعىنىڭ جىل سايىن وسىلاي قايتالاناتىنىن جەتكىزدى.
ب ق و ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ميراس مۇلكايدىڭ Kazinform تىلشىسىنە ءمالىم ەتكەنىندەي، بيىلعى ەكىنشى توقسانعا سۇيىتىلعان مۇناي گاز جەتكىزۋ جوسپارىنا سايكەس وبلىس ءۇشىن «جايىق مۇناي» ج ش س كوزدەرىنەن ماۋسىم ايىنا 3545 توننا قاراستىرىلعان.
ميراس رۇستەم ۇلىنىڭ سوزىنە قاراعاندا، 14-ماۋسىمنان 24-شىلدەگە دەيىن پاۆلودار مۇناي حيميا زاۋىتىن جوسپارلى جوندەۋ جۇمىسى جۇرگىزىلىپ جاتىر. سوعان بايلانىستى ق ر ەنەرگەتيكا مينيسترلىگىمەن وڭىرلەردىڭ ءبىر بولىگى اۋماقتىق ەرەكشەلىكتەرىنە قاراي زاۋىتتارعا قايتا بولىنگەن. نەگىزگى جوسپاردىڭ ورىندالۋى - 100 پايىز.
باسقارما باسشىسىنىڭ ايتۋىنشا، 21-ماۋسىمدا ق ر ەنەرگەتيكا مينيسترلىگى ايماقتاعى سۇرانىستى قاناعاتتاندىرۋ ءۇشىن «جايىق مۇناي» ج ش س كوزدەرىنەن قوسىمشا 324 توننا سۇيىتىلعان مۇناي گازىن ءبولدى. سونداي-اق 23-ماۋسىمدا «سنپس-اقتوبە مۇنايگاز» ا ق- دان تەمىر جول كولىگىمەن قوسىمشا 468 توننا قاراستىرىلدى.
- قازىرگى كەزدە سۇيىتىلعان گازدى وبلىس سۋبەكتىلەرىنە جونەلتۋ باستالدى. بۇگىنگە 200 توننا جوسپارلانعان. وعان قوسا «سنپس-اقتوبە مۇنايگاز» ا ق- دان 26-ماۋسىم كۇنى باتىس قازاقستان وبلىسى ءۇشىن 7 ۆاگون نەمەسە 256 توننا سۇيىتىلعان مۇناي گازى جونەلتىلمەكشى. تاياۋدا وبلىستىڭ ىشكى نارىعىندا جاعدايدى تۇراقتاندىرۋ كوزدەلىپ وتىر، - دەدى م. مۇلكاي.
ەسكە سالا كەتەيىك، بۇدان بۇرىن باتىس قازاقستاندا سۇيىتىلعان گاز تاپشىلىعى تۋىنداعانىن جازعان ەدىك.
سونداي-اق جۇرگىزۋشى ورالدا اۆتوگازدىڭ بىردە بار، بىردە جوق ەكەنى تۋرالى ايتتى.
