اۋرۋحانا 3 جىل بۇرىن كوز جۇمعان ناۋقاستىڭ وتباسىنا 3 ميلليون تەڭگە وتەماقى تولەيدى
استانا. قازاقپارات - 2022 -جىلدىڭ ناۋرىز ايىنىڭ سوڭىندا 45 جاستاعى ايەل ورال قالاسىنىڭ اۋرۋحاناسىنا جەدەل جاردەم كولىگىمەن جەدەل جۇقپالى اۋرۋمەن تۇسكەن، دەپ حابارلايدى جوعارعى سوتتىڭ باسپا ءسوز قىزمەتى.
ەمدەلگەنىنە قاراماستان جاعدايى ناشارلاپ، ءبىر اپتادان كەيىن قايتىس بولعان. قايعىلى وقيعادان كەيىن مارقۇمنىڭ اناسى مەن اپكەسى وبلىستىق دەنساۋلىق ساقتاۋ باسقارماسى مەن اۋرۋحانانىڭ ۇستىنەن مورالدىق شىعىندى بىرلەسىپ ءوندىرىپ الۋدى سۇراپ، سوتقا شاعىم تۇسىرگەن. ولار تالاپ قويۋدا جاقىندارىنىڭ ولىمىنە مەديتسينا قىزمەتكەرلەرىنىڭ قىزمەتتىك مىندەتتەرىن ورىنداۋداعى سالعىرتتىعى مەن مەديتسينالىق كومەك كورسەتۋ نورمالارىن بۇزۋىنىڭ سالدارى سەبەپ بولعانىن كورسەتكەن. تالاپ قويۋشىلار قىزى مەن اپكەسىنەن ايىرىلۋ ولار ءۇشىن اۋىر پسيحولوگيالىق كۇيزەلىس بولعانىن اتاپ كورسەتكەن. ءۇش جىل وتسە دە، ولار اۋىر پسيحيكالىق، فيزيكالىق جانە ەموتسيونالدىق ازاپتى باستان كەشىرىپ جاتىر.
دەنساۋلىق ساقتاۋ مينيسترلىگى مەديتسينالىق جانە فارماتسيەۆتيكالىق باقىلاۋ كوميتەتىنىڭ دەپارتامەنتى جۇرگىزگەن تەكسەرۋ ناتيجەسىندە ناۋقاستى دياگنوستيكالاۋ، ەمدەۋ، باقىلاۋدا كوپتەگەن زاڭبۇزۋشىلىق انىقتالدى. اتاپ ايتقاندا، ەمدەۋشى دارىگەر مەديتسينالىق كومەك كورسەتۋ ستاندارتتارىنان اۋىتقىعان، كاسىبي مىندەتتەرىن دۇرىس ورىنداماعان، سونداي-اق مەديتسينالىق قۇجاتتاردى بۇرمالاعان. اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان سوتتا وتكەن سوت تالقىلاۋىنىڭ قورىتىندىسى بويىنشا اۋرۋحانانىڭ ءۇش دارىگەرى ساپاسىز مەديتسينالىق قىزمەت كورسەتكەنى ءۇشىن ا ق ب ت ك بويىنشا تارتىپتىك جاۋاپكەرشىلىككە تارتىلدى.
- باتىس قازاقستان وبلىسى بايتەرەك اۋدانىنىڭ 2- سوتى اۋرۋحانانىڭ مەديتسينا قىزمەتكەرلەرىنىڭ ءىس-ارەكەتى مەن ناۋقاستىڭ ءولىمى اراسىنداعى تىكەلەي سەبەپتىك بايلانىستى انىقتاپ، سونداي-اق مورالدىق زياندى وتەۋ تۋرالى تالاپتاردى نەگىزدى دەپ تانىدى. ءىستىڭ ءمان-جايىن ەسكەرە وتىرىپ، تالاپ قويۋ ءىشىنارا قاناعاتتاندىرىلدى: اۋرۋحانادان مارقۇمنىڭ اناسى مەن اپكەسىنىڭ پايداسىنا 3 ميلليوننان استام تەڭگە ءوندىرىلدى. سوتتىڭ شەشىمى زاڭدى كۇشىنە ەندى، - دەلىنگەن حابارلامادا.
