ورال قالاسىندا سۋ باسقان ساياجايلاردان 4 ادام قۇتقارىلدى
ورال. KAZINFORM - ورال قالاسىنىڭ ماڭىندا ورنالاسقان «كوسموس» جانە «كوماروۆ» باۋ-باقشا سەرىكتەستىكتەرىندە بۇرىن ۇيلەرىنەن كەتۋدەن باس تارتقان جەرگىلىكتى تۇرعىندار شۇعىل ەۆاكۋاتسيالانۋدا.
ب ق و ت ج دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، وسى ساتكە دەيىن قۇتقارۋشىلار ۇيلەرىنىڭ توبەسىندە تۇرعان 4 جەرگىلىكتى تۇرعىندى الىپ شىقتى.
«ازاماتتاردى سۋ باسقان ايماقتان ەۆاكۋاتسيالاۋ ارنايى وپەراتسياسى ت ج ءمينيسترى شىڭعىس ءارىنوۆتىڭ ۇيلەستىرۋىمەن جۇرگىزىلۋدە. تىكۇشاق اۋەگە كوتەرىلدى. جۇمىستار ءجۇزۋ قۇرالدارىمەن جۇرگىزىلۋدە. ادامداردى ىزدەۋ ءۇشىن ۇشقىشسىز ۇشۋ اپپاراتى ىسكە قوسىلدى»، دەپ حابارلادى ۆەدومستۆودان.
ەسكە سالا كەتەيىك، بۇدان بۇرىن ورال قالاسىندا جايىقتاعى سۋ دەڭگەيى قاۋىپتى شەكتەن اسىپ كەتكەنىن جازعان بولاتىنبىز.
ورال قالاسى توڭىرەگىندە ساياجايلار سۋعا كەتىپ جاتىر.
اۆتور
عايساعالي سەيتاق
