وقجەتپەستەگى تىڭ ەمدىك شارا: ناۆتالان قانداي اۋرۋعا ەم
استانا. KAZINFORM - بۇگىندە پرەزيدەنت ءىس باسقارماسىنا قاراستى مەديتسينالىق ورتالىقتىڭ بىرنەشە شيپاجايى بار. ونىڭ ءبارى بۋرابايدا ورنالاسقان «وقجەتپەس» ەمدەۋ-ساۋىقتىرۋ كەشەنىنە بىرىكتىرىلگەن. ناقتىراق ايتساق، وسى كەشەن قۇرامىنا الماتىداعى «Almaty resort»، رەسەيدىڭ ەسسەنتۋكي قالاسىندا ورنالاسقان «قازاقستان» شيپاجايلارى كىرەدى. بۇل ەمدەۋ- ساۋىقتىرۋ ورتالىقتارىن ءىرى شيپاجايلار دەۋگە بولادى. ماسەلەن، 2022 -جىلى جاريالانعان رەيتينگكە سايكەس، رەسەيدەگى «قازاقستان» شيپاجايى ەسسەنتۋكي، كيسلوۆودسك، جەلەزنوۆودسك سىندى قالالاردا ورنالاسقان 150 دەن استام شيپاجايلاردىڭ ىشىندە ءۇشىنشى ورىنعا شىعىپ وتىر.
«وقجەتپەس» زاماناۋي شيپاجايعا اينالادى
پرەزيدەنت ءىس باسقارماسى مەديتسينالىق ورتالىعىنىڭ «وقجەتپەس» ە س ك» ا ق پرەزيدەنتى ياكوۆ ستەرليگوۆتىڭ ايتۋىنشا، سوڭعى جىلدارى بۋرابايداعى «وقجەتپەس» شيپاجايىندا كوپ دۇنيە جاسالىپ جاتىر. «قازاق نوماد» تۇجىرىمداماسى اياسىندا قازاقتىڭ ءداستۇرلى كيىم-كەشەگىن، ۇلتتىق تاعامىن، قازاقتىڭ ەمدىك پروتسەدۋرالارىن ناسيحاتتاۋ جۇمىستارى قولعا الىنعان. شيپاجايعا جاپسارلاس اۋدانى 450 شارشى مەترلىك ۇلكەن بولمە كۇردەلى جوندەۋدەن وتكىزىلىپ، سپورت زالى رەتىندە جابدىقتالعان. بولمەلەرگە دە كەزەڭ-كەزەڭمەن جوندەۋ جۇمىستارى جۇرگىزىلىپ جاتىر. جالپى، شيپاجاي 1998-2002 -جىلدارى ارالىعىندا كۇردەلى جوندەۋگە تولىق جابىلعان بولاتىن. سودان كەيىن كۇردەلى جوندەۋدەن وتپەگەن. تەك قانا اعىمدىق جوندەۋ جۇمىستارى جۇرگىزىلىپ تۇرعان. ال 2021 -جىلى 6-قاباتتاعى 13 ستاندارتتى ءنومىر كۇردەلى جوندەۋدەن وتكىزىلىپ، سانتەحنيكالىق جابدىقتارى، جيھازدارى زاماناۋي ستيلدە جاڭارتىلعان.
«باستى ماقساتىمىز - زاماناۋي تەحنولوگيالار، دۇنيە جۇزىندە بار جاڭا تەحنولوگيا، مەديتسينالىق جابدىقتار ەنگىزۋ ارقىلى مەملەكەتتىك قىزمەتشىلەرگە عانا ەمەس، بۇكىل تۇرعىنعا جانە شەتەلدەن كەلەتىن قوناقتارعا مىقتى شيپاجايىمىزدىڭ بار ەكەنىن كورسەتۋ. وسىعان وراي، نومىرلىك قورىمىزعا جوندەۋ جۇمىستارىن جۇرگىزىپ جاتىرمىز. ول جۇمىستى 1 جىلدىڭ ىشىندە جاساۋ وتە قيىن. 125 ءنومىر بار. وتە كوپ قاراجات كەرەك. سوندىقتان جىل سايىن 20-25 نومىردەن جوندەۋ جۇمىسىن ءوز قاراجاتىمىز ەسەبىنەن جاسايمىز. بىلتىر 20 ءنومىردى كۇردەلى جوندەۋدەن وتكىزسەك، بيىلعى جوسپارىمىزدا 26 ءنومىر بار. كونكۋرستىق راسىمدەر وتكەن سوڭ جۇمىس باستالادى»، - دەدى كەشەن پرەزيدەنتى.
بۇرىنىراق شيپاجاي كىتاپحاناسى عيماراتتىڭ ءبىر شەتىندە، قالتارىستا ورنالاسقان بولاتىن. وتكەن جىلى ونى دەمالۋشىلاردىڭ كوزىنە بىردەن تۇسەتىن ورىنعا قايتادان جاساقتاپ، كوۆوركينگ ورتالىققا اينالدىرعان. ىشىندە دەمالۋشىلاردىڭ تالعامىنان شىعاتىن قازاق جانە الەم ادەبيەتىنىڭ ۇزدىك تۋىندىلارى، زاماناۋي دەتەكتيۆ جانرىنداعى شىعارمالار، بالالارعا ارنالعان ادەبيەتتەر قويىلعان.
«ورتالىقتا Wi-Fi، كومپيۋتەر بار. ماسەلەن، قوناقتارىمىز 7-10 كۇنگە دەمالۋعا كەلەدى. وسى 10 كۇننىڭ ىشىندە قوناقتارىمىزدىڭ بىرىنە جۇمىس بارىسىنا وراي قۇجاتتارمەن جۇمىس ىستەۋ نە ناقتى ءبىر تاپسىرمالاردى ورىنداۋ قاجەتتىگى تۋىنداۋى ىقتيمال. سوندا ول كىسىلەر وسى كوۆوركينگ ورتالىققا كەلىپ، جۇمىس ىستەي الادى. ال بۇرىنعى كىتاپحانا بولمەسىن بالالاردىڭ شىعارماشىلىق ورتالىعى رەتىندە جاساقتادىق»، - دەدى ياكوۆ ستەرليگوۆ.
شيپاجايدا كىمدەر ەم الادى؟
«وقجەتپەس» شيپاجايىنىڭ اتقارۋشى ديرەكتورى ايان اقمۇرزيننىڭ سوزىنە قاراعاندا، ەمدەلۋشىلەر پرەزيدەنت ءىس باسقارماسى ەمحاناسىنىڭ جولداماسى نەمەسە ونى ساتىپ الۋ ارقىلى كەلە الادى. ەم الۋشىلاردىڭ جالپى سانى جىلىنا 10 مىڭنان اسادى. كەي جىلدارى 11 مىڭعا جۋىقتاپ جاتادى. مامىر مەن قىركۇيەك ارالىعى كەلۋشىلەردىڭ شىرقاۋ شەگى سانالادى.
«جاز مەزگىلىندە استانالىقتاردىڭ كوپشىلىگى بۋراباي ايماعىنا اعىلادى. ويتكەنى، بۇل ايماق ەلورداعا جاقىن، 225 شاقىرىم عانا. جالپى، «وقجەتپەس» شيپاجايى تەك ەلوردالىقتار ءۇشىن عانا ەمەس قازاقستاننىڭ بارلىق ءوڭىرى تۇرعىندارى ءۇشىن جاقسى تانىس. قاراعاندى، الماتى وبلىستارىنان، سوڭعى ۋاقىتتا ماڭعىستاۋ وبلىسىنان كەلۋشىلەردىڭ قاراسى قالىڭ. سونداي-اق جىل سايىن 300-400 شەتەلدىك قوناق قابىلدايمىز. ولاردىڭ ىشىندە ا ق ش-تان، ۇلى بريتانيادان، ەۋروپا ەلدەرىنەن، رەسەي مەن وزبەكستاننان كەلۋشىلەر كوپ. جىل سايىن تۇراقتى تۇردە كەلەتىن شەتەلدىك مەيماندارىمىز دا بار. ولاردىڭ شيپاجايىمىزدى تاڭداۋ سەبەبى - «وقجەتپەس» ورتالىق ازيادا №1-سانالادى، ياعني ەۋروپالىق ستاندارتتارعا سايكەس سەرتيفيكاتتارى بار. شيپاجاي 4 جۇلدىزدى. قوناق ءۇيدىڭ ءوزى دە، مەيرامحاناسى دا 4 جۇلدىزدى. ول جىل سايىن راستالىپ وتىر. مۇنان بولەك، وسىدان 5 جىل بۇرىن بۋراباي ىرگەسىندەگى «اق بۋرا» كەشەنىنىڭ قۇرىلىس جۇمىستارى باستالىپ، بۇگىندە اياقتالدى. بۇل نىسان دا پرەزيدەنت ءىس باسقارماسىنىڭ شەشىمىمەن «وقجەتپەس» كەشەنى قۇرامىنا بەرىلمەك. الداعى ۋاقىتتا «اق بۋرا» ارىقتاۋعا ارنالعان ورتالىق رەتىندە جۇمىس ىستەۋى مۇمكىن. مۇنان بولەك، قاتونقاراعايدا دا شيپاجاي اشۋ ماسەلەسى كوتەرىلىپ ءجۇر»، - دەدى ايان ەردەن ۇلى.
ونىڭ دەرەگىنشە، شيپاجايداعى 2 ادامدىق ستاندارتتى ءنومىردىڭ ءبىر كۇندىك جاتىن پۇلى - 78 مىڭ تەڭگە. ونىڭ ىشىندە 4 مەزگىل تاماقتانۋى، 1 مەزەت قىمىز، باسسەين، ساۋنا، سپورت زالى، كينو زالى، اۆتوتۇراق جانە ەمدىك پروتسەدۋرالار كىرەدى. اقىلى دا ەمدىك پروتسەدۋرالاردى قوسىمشا الۋعا بولادى. اقىلى پروتسەدۋرانى كەلۋشىلەر تەراپيەۆت دارىگەردىڭ جازىپ بەرۋىمەن ءوز قالاۋىنا قاراي الادى.
«توڭىرەگىمىزدەگى باسەكەلەستەردى دە قاداعالاپ وتىرامىز. ءىرى قوناق ۇيلەر بار. ءبىراق، ولاردىڭ جاتىن پۇلىنا تەك تاڭعى اس قانا كىرەدى. باسقا دىم جوق. ال بىزدە قىزمەتتىڭ ءبارى كەشەندى تۇردە كورسەتىلەدى. ورنالاسقان جەرى دە كەرەمەت. قوناق ءۇيدىڭ ءدال الدىندا وقجەتپەس، وڭ جاعىندا كوكشەتاۋ تاۋلارى ورنالاسقان. قوناق ءۇي ارتىندا تولقىنى جاعالاۋعا ۇرىپ اۋليە كول جاتىر. جۇمباق تاس تا جاقىن. حالىق اراسىندا «وقجەتپەستەن» ورىن تابۋ مۇمكىن ەمەس دەگەن ءسوز بار. بۇل - جالعان اقپارات. دەگەنمەن، جاز مەزگىلىندە ءوزىڭ قالاعان ۋاقىتتا ورىن بولماي قالۋى مۇمكىن. ويتكەنى، قوناقتارىمىز دەمالىستارىن 2-3-اي بۇرىن جوسپارلاپ، الدىن الا برون جاساپ، اقشالارىن تولەپ قويادى. بىزدە كەلۋشىلەرگە ءبىرقاتار جەڭىلدىك بار. تۋعان كۇن يەلەرىنە، مۇگەدەك جاندارعا، زەينەتكەرلەرگە، كاسىپوداق ۇيىمدارىنا 10 پايىزدان باستاپ ۇلكەن جەڭىلدىكتەر بەرەمىز. «وقجەتپەس» شيپاجايى مىندەتتى الەۋمەتتىك- مەديتسينالىق ساقتاندىرۋ ارقىلى قىزمەت كورسەتپەيدى. دەگەنمەن، بۇل باعىتتاعى كومەكتى «Almaty resort» شيپاجايىنان الۋعا بولادى. سوڭعى ۋاقىتتا «وقجەتپەستە» دە ءمامس اياسىندا مەديتسينالىق قىزمەت كورسەتۋ ماسەلەسى كوتەرىلىپ ءجۇر. ءبىراق، وعان شيپاجايدىڭ مۇمكىندىگى جوق. بىرىنشىدەن، جاتىن-ورىن سانى جەتىسپەيدى. ەكىنشىدەن، ەمدىك پروتسەدۋراسى بولەك. كەلۋشىلەردى ءمامس ارقىلى قابىلداۋ ءۇشىن جاڭا ەمدىك پروتسەدۋرالارىن ازىرلەۋ قاجەت بولادى. جالپى، بۇل ماسەلەنىڭ جاقىن ارادا شەشىلە قويۋى قيىن. ول ءۇشىن جاڭا عيمارات سالۋ قاجەت»، - دەدى ايان اقمۇرزين.
ناۆتالانمەن ەمدەۋ
شيپاجايدىڭ ەمدەۋ-ساۋىقتىرۋ بولىمشەسىنە ليۋبوۆ كوناپليەۆا باسشىلىق جاسايدى. ۇزاق جىلدارى بويى استاناعى پرەزيدەنت ءىس باسقارماسىنا قاراستى مەديتسينالىق ورتالىقتا لاۋازىمدى قىزمەت اتقارعان ول زەينەتكە شىققاننان كەيىن شيپاجاي باسشىلىعىنىڭ شاقىرۋىمەن بۋرابايعا قونىس اۋدارعان.
«شيپاجايىمىزدىڭ باسىم باعىتى - مەملەكەتتىك قىزمەتشىلەر مەن ولاردىڭ وتباسى مۇشەلەرىنە، رەسپۋبليكا جانە تمد ەلدەرى تۇرعىندارىنا وڭالتۋدىڭ 10 باعىتى بويىنشا قىزمەت كورسەتۋ. ولار جۇرەك- قان تامىرى، تىنىس الۋ مۇشەلەرى، تىرەك- قوزعالىس اپپاراتى، جۇيكە جۇيەسى، قان تامىرى اۋرۋلارى سياقتى دەرتتەر. دەگەنمەن، باسىم باعىتىمىز تىرەك- قوزعالىس اپپاراتى مەن جۇرەك- قان تامىرى جۇيەسى سانالادى. قازىرگى ۋاقىتتا ەمدەۋدىڭ جاڭا ءتۇرىن ەنگىزىپ جاتىرمىز. ول - ناۆتالانمەن ەمدەۋ. بۇل مۇناي ءونىمى جانە بۇرىندارى قازاقستاندا قولدانىلعان ەمەس. ازەربايجاننان اكەلىنگەن ناۆتالانمەن ەمدەۋدى ءبىزدىڭ شيپاجايمىز ەڭ ءبىرىنشى بولىپ قولعا الدى»، - دەدى ليۋبوۆ كوناپليەۆا.
ناۆتالانمەن ەم-دوم جاسايتىن ءباتيما قاماروۆا ونىڭ مۇنايدان جاسالعان كۇشتى ءدارى ەكەندىگىن ايتادى. 70 تەن استام اۋرۋعا ەم بۇل ءدارىنى ادامدار 12 عاسىردان بەرى ەمدىك باعىتتا قولدانىپ كەلەدى ەكەن.
«ول قاننىڭ تۇتقىرلىعىن تومەندەتەدى، يممۋنيتەتتى كوتەرەدى. وكپەنىڭ جۇمىسىن جاقسارتادى. اعزاداعى قابىنۋ پروتسەستەرىن توقتاتادى. انالگەتيكالىق اسەرى بار. بۋىن، تىرەك-قوزعالىس جۇيەسىنە اسەرى مول. ەكزەما، پسورياز سياقتى الەمدە كەزدەسەتىن كەز كەلگەن دەرماتيت اۋرۋلارىن ەمدەيدى. ازەربايجان كەڭەس زامانىنان-اق وسى ناۆتالانمەن ەمدەۋ جۇيەسىن جولعا قويعان. قازاقستان ازاماتتارى ءدال وسى ەمدى الۋ ءۇشىن سول ەلگە باراتىن. ال ءبىز ناۆتالانمەن ەمدەۋدى وسىدان جارتى جىل بۇرىن قولعا الدىق. العاشقى ۋاقىتتا ەم الۋشىلار سانى از بولاتىن. بۇگىندە كۇنىنە كەمىندە 10 ادام وسى ەمدى الىپ جاتىر. سۇرانىس ارتۋدا. ەمدەلۋشىلەر ءبىر- بىرىنەن دە ەستىپ كەلەدى»، - دەدى دارىگەر.
ونىڭ اتاپ وتۋىنشە، ونكولوگياعا شالدىققاندار، تۋبەركۋلەزدىڭ اشىق تۇرىنە ۇشىراعاندار، اعزاسىندا وتكىر جۇقپالى اۋرۋى، قان قىسىمى، جۇرەك اۋرۋى بارلار ناۆتالانمەن ەم الا المايدى.
ليۋبوۆ كوناپليەۆانىڭ ايتۋىنشا، شيپاجايدا فيزيكالىق تەراپيەۆتيكالىق كابينەتتەر، تيپتىك سۋمەن ەمدەۋ ورنى جانە سەبەزگى زالى، بالشىقپەن ەمدەۋ ورنى، ۋرولوگيا، ستوماتولوگيا، ماسساج جانە ەم- شارالار كابينەتتەرى، ىشەكتى مونيتورلىق تازالاۋ كابينەتى، ينگالياتور، فيتوبار، زەرتحانالىق- دياگنوستيكالىق بولىمشە، كوسمەتولوگيالىق كابينەت، ءدارىحانا ورنالاسقان. ەمدەۋ عيماراتىندا وتكىزىلگەن تەراپيانىڭ تيىمدىلىگى مەن قاۋىپسىزدىگىن باقىلاۋعا مۇمكىندىك بەرەتىن قۋاتتى اسپاپتىق بازا بار.
اۆتور
مارلان جيەمباي
