وقۋشىلاردىڭ ماماندىق تاڭداۋىنا قاتىستى مونيتورينگ باستالدى
استانا. KAZINFORM - ى. التىنسارين اتىنداعى ۇلتتىق ءبىلىم اكادەمياسى ەل مەكتەپتەرىندە كاسىپتىك باعدار بەرۋ جۇيەسىنە كەشەندى مونيتورينگ جۇرگىزەدى.
مونيتورينگتىڭ باستى ماقساتى وقۋشىلارعا كورسەتىلەتىن كاسىپتىك باعدارلاۋ جۇمىسىنىڭ تيىمدىلىگىن باعالاۋ جانە ونىڭ ولاردىڭ بولاشاق ءبىلىم بەرۋ باعىتىن تاڭداۋعا ناقتى اسەرىن انىقتاۋ. زەرتتەۋ قورىتىندىسى مەكتەپتەر اراسىنداعى ايىرماشىلىقتاردى كورسەتەتىن سالىستىرمالى دەرەكتەر قالىپتاستىرۋعا مۇمكىندىك بەرەدى.
مونيتورينگ ەكى باعىت بويىنشا جۇزەگە اسىرىلادى:
ءبىرىنشى باعىتتاعى جۇمىس «كەلەشەك مەكتەپتەرى» جەلىسىندەگى ءبىلىم بەرۋ ۇيىمدارىن قامتيدى. بۇل مەكتەپتەردە 7-9 -سىنىپ وقۋشىلارى «Smart Bolashaq» كورپوراتيۆتىك قورىنىڭ سيفرلىق پلاتفورماسى ارقىلى تەستىلەۋدەن وتەدى. تەستىلەۋ ولاردىڭ قابىلەتى مەن بەيىمىن انىقتاۋعا باعىتتالعان. وقۋشىلار تەستىلەۋدى ۇيالى تەلەفون ارقىلى دا تاپسىرا الادى، ال ۇيىمداستىرۋ- تەحنيكالىق سۇيەمەلدەۋ تەگىن قامتاماسىز ەتىلەدى.
سونىمەن قاتار 7-9 -سىنىپ وقۋشىلارىنىڭ اتا-انالارى اراسىندا ساۋالناما جۇرگىزىلىپ، ولاردىڭ كاسىپتىك باعدار بەرۋ جۇيەسى تۋرالى حاباردارلىعى مەن بۇل ۇدەرىسكە قاتىسۋ دەڭگەيى باعالانادى.
ەكىنشى باعىت اۋىل مەكتەپتەرىن قامتيدى. وڭىرلىك ىرىكتەمە نەگىزىندە 8-9 -سىنىپ وقۋشىلارى اراسىندا ساۋالناما جۇرگىزىلىپ، ولاردىڭ كاسىبي باعدارعا قاتىستى كوزقاراستارى مەن قاجەتتىلىكتەرى زەردەلەنەدى.
مونيتورينگ ناتيجەلەرى مەكتەپتەردەگى كاسىپتىك باعدار بەرۋ جۇيەسىن جەتىلدىرۋگە، ءتيىمدى تاجىريبەلەردى انىقتاۋعا جانە وقۋشىلاردىڭ سانالى تۇردە ماماندىق تاڭداۋىنا جاعداي جاساۋعا باعىتتالعان شەشىمدەر قابىلداۋعا نەگىز بولماق.
ايتا كەتەلىك مەكتەپتەردە ءبىلىم ساپاسىن باعالاۋ ءۇشىن حالىقارالىق زەرتتەۋ جۇرگىزىلەتىنى تۋرالى جازعان ەدىك.
