وقۋشىلاردىڭ ChatGPT-دى پايدالانۋىن شەكتەۋ كەرەك - دەپۋتات
استانا. KAZINFORM - ءماجىلىس دەپۋتاتى داۋلەت مۇقايەۆ مەكتەپ وقۋشىلارىنا جاساندى ينتەللەكتىنى پايدالانۋعا شەكتەۋ ەنگىزۋدى ۇسىندى.
- ارينە، تەحنولوگيانىڭ دامىعانى جاقسى عوي، ءبىراق ۋاقىت وتە كەلە مۇنىڭ ءبارى ميىمىزدىڭ شەكتەلۋىنە ءارى ونىڭ ويلانباۋىنا الىپ كەلەتىن سەكىلدى. قازىردىڭ وزىندە مەكتەپ وقۋشىلارى اراسىندا ەشقانداي تاپسىرمانى ورىنداماي، جاساندى ينتەللەكت - Chat GPT گە سالىپ، تاپسىرمانىڭ بارلىعى وسى ەكەن دەپ وتىرا بەرەدى. مەنىڭ ويىمشا، مەكتەپ جاسىنداعى وقۋشىلارعا قانداي دا ءبىر شەكتەۋلەر قويىلۋى كەرەك سياقتى، - دەدى دەپۋتات داۋلەت مۇقايەۆ پارلامەنت ماجىلىسىندە ج ي تۋرالى زاڭ جوباسىن تالقىلاۋ كەزىندە.
ونىڭ پايىمىنشا، بۇل شەكتەۋلەر بولماسا، كەيىننەن ونىڭ سالدارى وسكەلەڭ ۇرپاق ءۇشىن كەرى اسەرىن تيگىزەدى.
- ەگەر شەكتەۋ قويىلماسا، ەرتەڭگى كۇنى وقۋشىلارىمىز ستۋدەنت بولىپ، كەيىننەن ەڭبەك نارىعىنا ارالاسقان كەزدە، سونىڭ زاردابىن 20 جىلدان كەيىن كورەمىز. مۇنى ەلىمىزگە كەلە جاتقان ۇلكەن قاۋىپتىڭ ءبىرى دەپ سانايمىن. زاڭ جوباسىن جۇمىس توبىندا قاراستىرۋ كەزىندە وسى ۇسىنىسقا ءمان بەرۋ كەرەك، - دەدى دەپۋتات.
بۇدان بۇرىن حابارلانعانداي، بۇگىن پارلامەنت ماجىلىسىندە «جاساندى ينتەللەكت تۋرالى» زاڭ جوباسى مەن ىلەسپە قۇجات تانىستىرىلدى.
زاڭ جوباسى اياسىندا ديپفەيكتەردى قۇرۋ ارەكەتتەرى ءۇشىن قىلمىستىق جاۋاپكەرشىلىك جازاسىن ەنگىزۋ مۇمكىندىگى تالقىلانادى.
