وقۋشىلار كۇزگى كانيكۋلدا قانشا كۇن دەمالادى

استانا. KAZINFORM - قازاقستاندىق مەكتەپتەردە ءبىرىنشى توقسان اياقتالۋدا. كۇزگى كانيكۋل كەزەڭى 2025 -جىلعى 27-قازاندا باستالىپ، 2-قاراشانى قوسا العاندا جەتى كۇنگە سوزىلادى. بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى حابارلادى.

مەكتەپ وقۋشىلارىنىڭ كۇزگى دەمالىستاعى بوس ۋاقىتىن ءتيىمدى وتكىزۋ جانە جەكە تۇلعالىق قاسيەتتەرىن دامىتۋ ماقساتىندا «ادال ازامات» ءبىرتۇتاس تاربيە باعدارلاماسى اياسىندا ءىس-شارالار جوسپارى ۇسىنىلادى.

جوسپار پاتريوتيزم، ادىلەتتىلىك جانە جاۋاپكەرشىلىك سياقتى قۇندىلىقتاردى دامىتۋعا باعىتتالعان ءىس-شارالاردى قامتيدى:

* «بالالار كىتاپحاناسى» جوباسىن ىسكە اسىرۋ شەڭبەرىندە «دەمالىستا كىتاپ وقيمىز» ءىس-شاراسى؛
* «بۋللينگتەن قورعان!» قاۋىپسىزدىك ساباعى؛
* «مەكتەپ تەاترىنىڭ» جۇمىسىن ۇيىمداستىرۋ ۇسىنىلادى.

ەڭ باستىسى، بالالاردىڭ قاۋىپسىزدىگىن قامتاماسىز ەتۋ. وسى ماقساتتا اتا- انالارمەن بىرگە جول-كولىك جاراقاتتارىنىڭ الدىن الۋ ءىس-شارالارىنا، مەكتەپتىڭ ىشكى ءتارتىبىن ساقتاۋ، بالالاردىڭ كوشەدە قاۋىپسىزدىگى، ۇيدەگى ءورت قاۋىپسىزدىگى جانە كيبەرقاۋىپسىزدىك شارالارىنا ەرەكشە نازار اۋدارۋ قاجەت.

ايتا كەتەيك، بۇل ءىس-شارالار ءبىلىم بەرۋ ۇيىمدارىنا ادىستەمەلىك ۇسىنىم رەتىندە جولدانادى.

ايتا كەتەلىك وقۋشىلار اراسىندا العاش رەت قارجىلىق ساۋاتتىلىق پەن سيفرلىق قاۋىپسىزدىك وليمپياداسى وتەتىنى تۋرالى جازعان ەدىك.