وقۋشى قىزدار قاتارلاسىنان اقشا بوپسالاعان: مەكتەپ ديرەكتورى قىزمەتىنەن كەتتى
قونايەۆ. KAZINFORM - الماتى وبلىسى قاراساي اۋدانى كەمەرتوعان اۋىلىنداعى وقۋشىلاردىڭ قاتارلاسىنا كۇش كورسەتىپ، اقشا بوپسالاعان شۋدان كەيىن مەكتەپ ديرەكتورى قىزمەتىنەن كەتتى.
قۇرداسىنا پسيحولوگيالىق قىسىم كورسەتىپ، ودان اقشا تالاپ ەتكەن قىزداردىڭ وقيعاسىنان كەيىن كەمەرتوعان ورتا مەكتەبىنىڭ ديرەكتورى دارحان ناكىسبەكوۆ ورنىن بوساتتى.
بۇل اقپاراتتى ءوڭىر اكىمدىگى راستادى.
«مەكتەپ ديرەكتورى ءوز ءوتىنىشى نەگىزىندە جۇمىستان بوساتىلدى»، - دەپ اتاپ ءوتتى الماتى وبلىسى اكىمدىگىنىڭ باسپا ءسوز قىزمەتىنەن.
وسىعان دەيىن قاراساي اۋدانىنىڭ پوليتسيا قىزمەتكەرلەرى 15 جاسار وقۋشىدان اقشا بوپسالاۋعا قاتىسى بار كامەلەتكە تولماعان قىزداردىڭ اتا-انالارىن انىقتاپ، ولاردى جاۋاپقا تارتقانى تۋرالى جازعان ەدىك.
قازىر يۋۆەنالدى پوليتسيا قىزمەتكەرلەرى تەرگەۋدىڭ تولىقتىعى مەن وبەكتيۆتىلىگىن قامتاماسىز ەتۋگە، سونداي-اق بولاشاقتا مۇنداي جاعدايلاردىڭ الدىن الۋعا باعىتتالعان پروفيلاكتيكالىق ءىس-شارالاردى قولعا الدى.
اۆتور
الما مۇقانوۆا
