وقۋ-اعارتۋ ءمينيسترى مەكتەپتەگى تاربيە ماسەلەسىنە قاتىستى تۇسىنىك بەردى

استانا. KAZINFORM - ق ر وقۋ-اعارتۋ ءمينيسترى عاني بەيسەمبايەۆ ءبىلىم بەرۋ ۇيىمدارىندا قوردالانعان ماسەلەلەرگە قاتىستى پىكىر ءبىلدىردى.

بۇگىن ۇكىمەت ۇيىندە بولعان باسپا ءسوز ءماسليحاتىندا تىلشىلەر الەۋمەتتىك جەلىدە سالادا قوردالانعان ماسەلەلەر بويىنشا وقۋ-اعارتۋ ءمينيسترىنىڭ وتستاۆكاسى تۋرالى باستاما كوتەرىلىپ جاتقانىن جانە بۇعان ۆەدومستۆو باسشىسى قالايشا جاۋاپ بەرەتىنىن سۇرادى.

ءوز كەزەگىندە عاني بەيسەمبايەۆ سالادا ءبىراز جۇمىس اتقارىلىپ جاتقانىن، تاربيەگە قاتىستى باعدارلاما بىلتىردان باستاپ بۇكىل مەكتەپتەرگە ەنگىزىلگەنىن ايتتى.

«بۇعان دەيىن نەگىزگى ەكپىن اكادەميالىق ءبىلىمدى كوتەرۋگە قاتىستى بولسا، كەيىنگى كەزدەرى ورىن العان وقيعالارعا بايلانىستى تاربيە جۇمىسىن كۇشەيتۋگە باعىتتالدى... بۇل جۇمىس جالعاسىن تابادى. ارينە، وزگەرىستەر بار. وسى باعىتتاعى وڭ ناتيجەنى كورىپ وتىرمىز. قوردالانعان ماسەلەلەردى دە قاراپ وتىرمىز. جالپى، كەز كەلگەن ماسەلە كوپتەگەن جاعداياتقا بايلانىستى. كەشەگى ماڭعىستاۋداعى بالالاردىڭ ۋلانۋىنا بايلانىستى وقيعاعا توقتالساق، بۇل جەردە ءتيىستى زاڭدارعا وزگەرىستەر ەنگىزىلدى. سوندىقتان تاماقپەن اينالىساتىن جەكە كاسىپكەرلەر زاڭداردى تولىققاندى ورىنداۋى كەرەك»، - دەدى ۆەدومستۆو باسشىسى.

سونىمەن قاتار مينيستر اقتوبە وبلىسىنداعى وقيعا بويىنشا جيىن وتكىزىلگەنىن جانە اكىمنىڭ ورىنباسارلارىنا ماسەلەنى قاتاڭ باقىلاۋعا الۋ الگوريتمى جاسالعانىن ايتتى.

«وتستاۆكاعا قاتىستى ماسەلە ءمينيستردىڭ قۇزىرەتىندە ەمەس. ءبىزدىڭ نەگىزگى ماقساتىمىز - ءتيىستى مىندەتتەردى اتقارۋ، ەلدىڭ سەنىمىن اقتاۋ جانە پرەزيدەنتتىڭ تاپسىرماسىن ساپالى ورىنداۋ»، - دەدى ع. بەيسەمبايەۆ.

بۇل تۇرعىدا ۇكىمەت باسشىسىنىڭ ورىنباسارى تامارا دۇيسەنوۆا قوعامدا بولىپ جاتقان كەلەڭسىز جاعدايلار تەك مەكتەپكە نەمەسە وقۋ-اعارتۋ مينيسترلىگىنە قاتىستى ەمەس ەكەنىن اتاپ ءوتتى.

«جالپى، ۆەدومستۆوارالىق سۇراق دەپ سانايمىن. مينيستر وسى كەلەڭسىز جايتتاردى رەتتەۋگە قاتىستى ءتيىستى باعدارلامانى ۇكىمەتكە تانىستىردى. سول باعدارلامانى ورىنداۋعا مۇمكىندىك بەرەمىز»، - دەدى ت. دۇيسەنوۆا.

اۆتور
رۋسلان عابباسوۆ