ونلاين قۇرباندىق شالۋ: ارنايى سايت ىسكە قوسىلدى

استانا. KAZINFORM - ەلىمىزدە بيىل دا ونلاين فورماتتا قۇرباندىق شالۋ مۇمكىندىگى جاسالادى. بۇل تۋرالى قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى ايتتى.

- بيىل دا ەلىمىزدە قۇربان شالۋ ونلاين جانە وففلاين فورماتتا وتەدى. ءدىني باسقارما حالىققا قولايلى جاعداي جاساۋ ماقساتىندا قۇربان شالۋ ءراسىمىن قاشىقتان وتكىزۋگە ارنالعان qurban.muftyat.kz سايتىن ىسكە قوستى. دىنىمىزدە قۇرباندىق شالۋ ءراسىمىن باسقا بىرەۋگە تاپسىرىپ، ونى وكىل ەتە الادى. ەگەر ءوزى بارا الماسا، ءبىر كىسىگە ءوتىنىش جاساپ، قۇربان شالۋعا رۇقسات ەتىلگەن. دەمەك ونلاين فورماتتا قۇربان شالۋعا تاپسىرىس بەرە الاسىزدار، - دەدى باس ءمۇفتي ق م د ب- دا وتكەن باسپا ءسوز ءماسليحاتىندا.

ونىڭ ايتۋىنشا، مۇنداي قۇرباندىقتان تۇسكەن ەت مۇقتاج جاندارعا جەتكىزىلەدى.

ق م ب د مالىمەتىنە ساي، ونلاين تۇردە قۇربان شالام دەۋشىلەر سايت ارقىلى قۇرباندىق مالىن تاڭداپ، Kaspi QR ارقىلى تولەم جاساي الادى. قوي مەن ەشكىنى جەكە ادام، ءال ىرى قارا مەن تۇيە مالىن ءبىر نەمەسە 7 ادام بىرىگىپ شالسا بولادى.

تاپسىرىس ءساتتى وتسە، ۇيالى تەلەفونعا SMS حابارلاما كەلەدى. قۇرباندىق شالىنعان سوڭ ونىڭ فوتو جانە بەينە ەسەبى تاپسىرىس بەرۋشى كورسەتكەن نومىرگە جىبەرىلەدى.

ايتا كەتەيىك، بۇعان دەيىن قۇربان ايت مەرەكەسى ناقتى قاي كۇنى باستالاتىنىن حابارلاعان ەدىك.