گونكونگتان استانا مەن الماتىعا رەيستەر اشىلۋى مۇمكىن

استانا. KAZINFORM - مەملەكەت باسشىسىنىڭ حالىقارالىق اۋە حابتارىن دامىتۋ جانە ىشكى اۋەجايلار ارقىلى جۇك تاسىمالداۋ كولەمىن ۇلعايتۋ جونىندەگى تاپسىرماسىن ىسكە اسىرۋ اياسىندا كولىك ۆيتسە-ءمينيسترى تالعات لاستايەۆ باستاعان قازاقستاندىق دەلەگاتسيا گونكونگ حالىقارالىق اۋەجايىندا بولدى. بۇل تۋرالى كولىك مينيسترلىگى ءمالىم ەتتى.

گونكونگ حالىقارالىق اۋەجايى 14 جىل قاتارىنان جۇك كولەمى بويىنشا الەمدە ءبىرىنشى ورىندا تۇر. 2024 -جىلى اۋەجايدىڭ جۇك اينالىمى 4,9 ميلليون توننانى قۇرادى.

- ساپار بارىسىندا گونكونگ كولىك-لوگيستيكالىق بيۋروسى ديرەكتورىنىڭ ورىنباسارى كەلۆين مامەن جانە گونكونگ اۋەجايىنىڭ باس ديرەكتورى ۆيۆەن چەنگپەن، سونداي-اق ايماقتىڭ جەتەكشى اۋە كومپانيالارى قاتارىنا جاتاتىن Hong Kong Airlines ،Cathay Pacific جانە Hong Kong Air Cargo باسشىلارىمەن كەزدەسۋلەر ءوتتى، - دەپ حابارلادى ۆەدومستۆودان.

كەلىسسوزدەر بارىسىندا گونكونگ اۋە كومپانيالارىنىڭ 5- اۋە ەركىندىگىن پايدالانا وتىرىپ، الماتى مەن استاناعا جولاۋشىلار رەيسىن اشۋ جانە قازاقستان مەن گونكونگ اراسىنداعى جۇك اۋە تاسىمالدارىن ارتتىرۋ جوسپارلارى تالقىلاندى.

بۇعان دەيىن حابارلانعانداي، شىمكەنت - سەۋل باعىتىندا جاڭا اۋە رەيسى اشىلادى.