گونكونگ ونلاين-تاكسي قىزمەتتەرىن رەتتەمەك
استانا. KAZINFORM - گونكونگ بيلىگى Uber سياقتى ونلاين- تاكسي اگرەگاتورلارىنىڭ قىزمەتىن زاڭمەن رەتتەۋدى ۇسىندى. بۇل تۋرالى Kazinform Reuters اگەنتتىگىنە سىلتەمە جاساپ حابارلايدى.
بۇل باستاما ءداستۇرلى تاكسي سەكتورىنىڭ تابىسى ازايىپ، نارىقتاعى تەڭسىزدىككە شاعىمدانۋىنا بايلانىستى كوتەرىلگەن.
ۇسىنىلعان زاڭ جوباسىنا سايكەس، ونلاين- پلاتفورمالار مىندەتتى تۇردە ليتسەنزيا الۋعا جانە ءبىرقاتار تالاپتى ورىنداۋعا ءتيىس. رۇقساتسىز قىزمەت كورسەتكەندەرگە ايىپپۇل مەن باس بوستاندىعىنان ايىرۋ جازاسى قاراستىرىلعان.
Uber جولاۋشىلار قاۋىپسىزدىگىن ارتتىرۋعا باعىتتالعان شارالاردى قولداسا دا، اۆتوكولىك سانىنا شەكتەۋ قويۋ تابىسقا كەرى اسەر ەتۋى مۇمكىن دەپ سانايدى. اگرەگاتوردىڭ جۇرگىزگەن ساۋالناماسى بويىنشا، گونكونگتەگى جۇرگىزۋشىلەردىڭ %80 ى قاتاڭ كۆوتا مەن جوعارى ليتسەنزيالىق الىمداردان قاۋىپتەنەدى.
گونكونگ اكىمشىلىگىنىڭ باسشىسى دجون لي ونلاين- سەرۆيستەر مەن ءداستۇرلى تاكسي قىزمەتىنىڭ قاتار ءومىر سۇرۋىنە جاعداي جاساۋ قاجەت ەكەنىن ايتتى.
كۆوتا جۇيەسى بويىنشا ناقتى ۇسىنىستار 2026 -جىلدىڭ العاشقى جارتىسىندا ۇسىنىلادى. ال قاجەتتى زاڭنامالىق تۇزەتۋلەر بيىل ءۇشىنشى توقساندا ەنگىزىلۋى مۇمكىن.
ايتا كەتەيىك، گونكونگتان استانا مەن الماتىعا رەيستەر اشىلۋى مۇمكىن.
