گوندۋراستاعى ۇشاق اپاتىنان قازا تاپقاندار سانى 12 گە جەتتى

استانا. KAZINFORM - گوندۋراستىڭ باتىسىنداعى رواتان ارالىندا ۇشاق اپاتىنان قازا تاپقاندار سانى 12 ادامعا جەتتى. بۇل تۋرالى گوندۋراس ۇلتتىق پوليتسياسى الەۋمەتتىك جەلىدە حابارلادى، دەپ جازادى Report.

- رواتان ارالىنداعى ۇشاق اپاتىنان 12 ادام قازا تاۋىپ، بەسەۋى امان قالدى، - دەلىنگەن حاباردا.

قازىرگى ۋاقىتتا قۇتقارۋشىلار ۇشاق بورتىندا بولعان تاعى ءبىر ادامدى ىزدەستىرىپ جاتىر.

بۇعان دەيىن گوندۋراستىڭ باتىسىنداعى رواتان ارالىنداعى اەرودرومنان ۇشىپ شىعىپ، كەيىن كوپ ۇزاماي ۇشاق تەڭىزگە قۇلاپ، كەم دەگەندە التى ادام قازا تاپقانىن حابارلاعان ەدىك.

پوليتسيا سونداي-اق، «33 جولاۋشىعا ارنالعان Jetstream 41 ۇلگىلى ۇشاعى ۇشۋ كەزىندە مەحانيكالىق اقاۋعا تاپ بولىپ، اپاتقا ۇشىراعانىن» مالىمدەگەن. ۇشاق ۇشۋ-قونۋ جولاعىنان شامامەن ءبىر شاقىرىم جەردە تەڭىزگە قۇلاعان.