ون توعىزىنشى جەڭىس: شاۆكات راحمونوۆ يرلانديالىق فايتەر يەن گەرريدى جەڭدى

استانا. KAZINFORM - قازاقستاندىق شاۆكات راحمونوۆ (18-0) لاس- ۆەگاستا (ا ق ش، نيەۆادا شتاتى) UFC 310 تۋرنيرىندە يرلانديالىق فايتەر يەن گەرريمەن جەكپە-جەككە شىعىپ، تورەشىلەردىڭ ءبىراۋىزدان شەشىمىمەن قارسىلاسىنان باسىم ءتۇستى.

يرلانديالىق فايتەر دە بۇعان دەيىن ەشقاشان جەڭىلىپ كورگەن جوق ەدى. قازىرگە دەيىن 15 جەكپە- جەگىنىڭ بارلىعىندا قارسىلاستارىن قاپى قالدىرىپ كەتتى.

بۇگىنگى جەكپە-جەك بەس راۋندقا جوسپارلانعان بولاتىن. ناتيجەسىندە تورەشىلەردىڭ ءبىراۋىزدان شەشىمىمەن جەڭىس شاۆكاتقا بەرىلدى.

وسىلايشا قازاقستاندىق سپورتشى كاسىبي مانسابىندا ون توعىزىنشى مارتە جەڭىسكە جەتىپ وتىر. ال يەن گەرري العاش رەت جەڭىلىستىڭ اشى ءدامىن تاتتى.

ايتا كەتسەك، بۇل شاۆكاتتىڭ تورەشىلەر شەشىمىمەن جەڭىسكە جەتكەن العاشقى جەكپە-جەگى. بۇعان دەيىنگى سايىستاردا ول جەكپە-جەكتى مەرزىمىنەن بۇرىن اياقتادى.

ەندىگى كەزەكتە شاۆكاتتىڭ ورتا سالماقتاعى UFC چەمپيونى بەلال مۋحاممادپەن (24-3) جەكپە-جەگى ءوتۋى مۇمكىن. العاشقى ولاردىڭ جەكپە-جەگى بۇگىنگى تۋرنيرگە جوسپارلانعان ەدى. دەگەنمەن امەريكالىقتىڭ دەنساۋلىعىنا بايلانىستى ول وتپەي قالدى.

ەسكە سالساق، بۇدان بۇرىن UFC-ءدىڭ YouTube ارناسىندا قازاقستاندىق شاۆكات راحمونوۆ (18-0) پەن يرلانديالىق يەن گەرري (15-0) اراسىندا وتەتىن جەكپە-جەككە ارنالعان فيلم جارىق كوردى.

ءادىلجان ۇمبەت